'महाराष्ट्र सैनिकांनो, तूर्तास आंदोलन थांबवा...' राज ठाकरेंचं मनसे सैनिकांसाठी पत्र

Raj Thackeray Letter : मनसे प्रमुख राज ठाकरे यांनी महाराष्ट्रात मराठी भाषेची सक्ती व्हावी, तसेच बॅंकामध्ये ही मराठी भाषा वापरली जावी, याकरिता मनसेने पुढाकार घेतला होता. मुंबईतील मनसेच्या गुढीपाडवा मेळाव्यात राज ठाकरे यांनी मनसे सैनिकांना राज्यातील बँकांमध्ये मराठी भाषा वापरली जाते की नाही हे तपासण्याचे आदेश दिले होते.

मनसे सैनिकांनी महाराष्ट्रातील सर्व बँकांमध्ये जाऊन बॅंक मॅनेजर यांना निवेदन देण्यात आली तर राज्यातील काही जिल्ह्यांमध्ये आंदोलन करण्यात आली. यावेळी मनसे सैनिकांनी बॅंकेत मराठी भाषेचा वापर करण्याची विनंती केली. त्यानंतर अनेक बॅंकामध्ये मराठी भाषेचा वापर ही करण्यात आला आहे. आता या सर्व पार्श्वभूमीवर मनसे प्रमुख राज ठाकरे यांनी आपल्या सोशल मिडीयावर मनसे सैनिकांनासाठी एक पत्र लिहण्यात आलं आहे.

राज ठाकरे यांचं पत्र जश्यास तसं...

माझ्या तमाम महाराष्ट्र सैनिकांना.. सस्नेह जय महाराष्ट्र.

"सर्वप्रथम महाराष्ट्रात मराठीच्या मुद्द्यासाठी तुम्ही पुन्हा एकदा जो एक जोरदार आवाज उठवलात त्यासाठी तुमचं मनापासून अभिनंदन. मी गुढीपाडव्याच्या मेळाव्यात तुम्हाला आदेश दिला होता की महाराष्ट्रातील बँकांमध्ये मराठीत व्यवहार होत आहेत की नाही हे पहा, आणि नसल्यास त्याबद्दलची जाणीव त्या बँकेच्या प्रशासनाला करून द्या. दुसऱ्या दिवशीपासून तुम्ही महाराष्ट्रात सर्वदूर बँकांमध्ये गेलात, तिथे मराठीचा आग्रह धरलात, हे उत्तम झालं; यातून मराठी भाषा आणि मराठी माणूस यांना कोणी गृहीत धरू शकत नाही हा संदेश जसा गेला, तसंच सर्वदूर असलेली महाराष्ट्र नवनिर्माण सेनेची संघटनात्मक ताकद पण दिसली.

पण आता हे आंदोलन थांबवायला हरकत नाही, कारण आपण या विषयांत पुरेशी जागृती केली आहे, आणि हे घडलं नाही तर काय होऊ शकतं याची चुणूक दाखवली आहे. आता मराठी जनतेनेच आग्रह धरायला हवा आणि आपल्या मराठी समाजानेच जर कच खाल्ली, तर मग ही आंदोलने तरी कशासाठी करायची ?

आणि सगळ्यात महत्वाची जबाबदारी सरकारची आहे. रिझर्व्ह बँकेचा नियम त्यांना माहीत आहे आणि त्या नियमाची अंमलबजावणी करून घेणं ही आता सरकारची जबाबदारी आहे. काल कुठेतरी माध्यामांशी बोलताना राज्याचे मुख्यमंत्री म्हणाले की आम्ही कोणाला कायदा हातात घेऊ देणार नाही. तशी इच्छा आम्हालाही नाही, पण तुम्ही कायद्याचे रक्षक आहात, तर मग रिझर्व्ह बँकेच्या नियमाची अंमलबजावणी करणं पण तुमचंच काम नाही का ? तुम्ही बँकांना आणि इतर आस्थापनांना मराठीचा सन्मान करायला लावा, मग आम्ही कायदा हातात घेणार नाही हे नक्की.

माझ्या तमाम महाराष्ट्र सैनिकांना..! pic.twitter.com/S3rYGgoYh0

— Raj Thackeray (@RajThackeray) April 5, 2025

त्यामुळे महाराष्ट्र सैनिकांनो, तूर्तास आंदोलन थांबवा पण या मुद्द्यावरचं लक्ष हटू देऊ नका ! सरकारलाही माझे सांगणे आहे की परत कुठे नियम पाळला जात नसेल, आणि मराठी माणसाला गृहीत धरलं जात असेल, किंवा अपमान केला जात असेल तर पुन्हा तिथे माझे महाराष्ट्र सैनिक त्यांच्याशी चर्चा करायला अवश्य जातील !", असा इशारा ही राज ठाकरे यांनी दिला आहे.

आपला, राज ठाकरे