मनपा निवडणूक : आज शेवटच्या दिवशी कुणी घेतली माघार? निवडणुकीआधीच 'हे' उमेदवार बिनविरोध विजयी

Published: Friday, January 2, 2026, 16:08 [IST]

Maharashtra municipal election 2026 : मुंबई/पुणे/नागपूर: राज्यातील २९ महानगरपालिकांच्या निवडणुकीसाठी आजचा दिवस अत्यंत निर्णायक ठरला. दुपारी ३ वाजेपर्यंत अर्ज मागे घेण्याची अंतिम मुदत असल्याने, सकाळपासूनच राजकीय गोटात मोठी हालचाल पाहायला मिळाली. अनेक ठिकाणी बंडखोर उमेदवारांना बसवण्यासाठी वरिष्ठ नेत्यांना स्वतः मैदानात उतरावे लागले, तर काही ठिकाणी अपक्ष उमेदवारांनी माघार घेण्यास नकार दिल्याने चुरस वाढली आहे.

एकीकडे उमेदवारीवरुन भाजपला कार्यकर्ते पदाधिकाऱ्यांच्या रोषाला सामोरे जावे लागले असतानाच एक सुखद गोष्ट म्हणजे भाजपचे काही उमेदवारांचा बिनविरोध विजय निश्चित झाला असून यानंतर शिंदेसेनेचे आणि राष्ट्र्वादी अजित पवार यांच्या पक्षाच्या उमेदवारांनाही विजय साकार झाला आहे.

प्रमुख शहरांमधील स्थिती

नागपूर (नाट्यमय घडामोड)

प्रभाग १३ (ड) मधील अपक्ष उमेदवार किसन गावडे यांना त्यांच्या समर्थकांनी घरातच कोंडून ठेवले, जेणेकरून ते भाजपच्या दबावाखाली अर्ज मागे घेऊ शकणार नाहीत. यामुळे नागपुरात मोठा राजकीय पेच निर्माण झाला होता.

पुणे (बंडखोरीचे आव्हान)

पुणे महानगरपालिकेत ४१ प्रभागांतील १६५ जागांसाठी जोरदार चुरस आहे. येथे दुपारी १ वाजेपर्यंत सुमारे ७० हून अधिक उमेदवारांनी माघार घेतली होती, तरीही काही प्रमुख बंडखोर मैदानात कायम आहेत.

मुंबई (BMC)

मुंबईत २२७ जागांसाठी मोठ्या प्रमाणावर अर्ज आले होते. महायुती आणि महाविकास आघाडीतील जागावाटपाच्या गोंधळामुळे अनेक प्रभागांत मित्रपक्षांचेच उमेदवार एकमेकांसमोर उभे राहिल्याचे चित्र आहे.

टॉप-३ राजकीय 'हॅपनिंग'

१. भाजपचे 'डॅमेज कंट्रोल'

अनेक ठिकाणी माजी नगरसेवकांना तिकीट नाकारल्यामुळे त्यांनी अपक्ष अर्ज भरले होते. त्यांना शांत करण्यासाठी देवेंद्र फडणवीस आणि चंद्रशेखर बावनकुळे यांनी स्वतः काही उमेदवारांशी संपर्क साधल्याची चर्चा आहे.

२. मविआमध्ये बिघाडी

काही प्रभागांमध्ये शिवसेना (UBT), काँग्रेस आणि राष्ट्रवादी (SP) या तिन्ही पक्षांच्या अधिकृत उमेदवारांनी अर्ज मागे न घेतल्याने 'फ्रेंडली फाईट' अटळ आहे.

३. वंचितचा अपक्षांना पाठिंबा

मुंबईसह काही शहरांत जिथे उमेदवार मिळाले नाहीत, तिथे वंचित बहुजन आघाडीने सक्षम अपक्ष उमेदवारांना पाठिंबा जाहीर करून सर्वांच्या अडचणी वाढवल्या आहेत.

कल्याण-डोंबिवलीत महायुतीचा विजय

या महानगरपालिकेत महायुतीने सर्वाधिक १० जागा बिनविरोध जिंकून मोठी आघाडी घेतली आहे. तर अनेक ठिकाणी विरोधी पक्षांच्या उमेदवारांचे अर्ज छाननीत बाद झाल्यामुळे किंवा तांत्रिक कारणास्तव फेटाळले गेल्यामुळे भाजप आणि शिवसेना (शिंदे गट) उमेदवारांचा मार्ग मोकळा झाला.

महाराष्ट्रातील महानगरपालिका निवडणुकांसाठी अर्ज मागे घेण्याच्या आज २ जानेवारी २०२६ रोजीच्या मुदतीनंतर समोर आलेल्या माहितीनुसार, बिनविरोध निवडून आलेल्या प्रमुख उमेदवारांची यादी पुढे आली आहे.

राज्यात एकूण २२ उमेदवार बिनविरोध निवडून आले.

बिनविरोध निवडून आलेल्यात भाजपचे १२ शिवसेनेचे (शिंदे) ७, राष्ट्रवादीचे (अजित पवार) २ आणि इतर १ उमेदवाराचा समावेश आहे.