शनिवार ठरला 'अपघातवार'! राज्यात विविध ठिकाणी 13 ठार, 30हून अधिक जखमी! वाचा कुठे-कसा घडला थरार

Maharashtra Accidents news : महाराष्ट्रासाठी आजचा शनिवार हा अत्यंत दुर्दैवी ठरला असून, राज्याच्या वेगवेगळ्या भागांमध्ये झालेल्या भीषण अपघातांच्या मालिकेमुळे १३ जणांना आपला जीव गमवावा लागला आहे, तर ३० हून अधिक जण जखमी झाले आहेत. परभणी, लातूर, गोंदिया, जळगाव, रायगड, लोणावळा आणि नाशिकसह अनेक जिल्ह्यांमध्ये या अपघातांनी हाहाकार माजवला.

अपघातवार: कुठे-कुठे घडल्या दुर्घटना?

१. परभणी: स्विफ्ट-क्रेटा कारची भीषण धडक (३ ठार)

परभणी-वसमत राष्ट्रीय महामार्गावरील रहाटीजवळ स्विफ्ट डिझायर आणि क्रेटा कारची समोरासमोर धडक झाली. दोन्ही कारचा अक्षरशः चुराडा झाला. या भीषण अपघातात बाबाराव साखरे, विमलबाई जाधव आणि कांताबाई कातोरे या तिघांचा जागीच मृत्यू झाला. साईनाथ काकडे आणि हरी जाधव हे दोघे गंभीर जखमी झाले असून, त्यांच्यावर परभणीच्या शासकीय रुग्णालयात उपचार सुरू आहेत. भरधाव वेगातील क्रेटा कार चालकावर ताडकळस पोलिस ठाण्यात गुन्हा दाखल करण्यात आला आहे.

२. गोंदिया: उभ्या ट्रकला ट्रॅव्हल्सची धडक (३ ठार, ११ जखमी)

गोंदिया जिल्ह्यातील देवरी राष्ट्रीय महामार्गावर उभ्या असलेल्या ट्रकला पाठीमागून आलेल्या भरधाव ट्रॅव्हल्सने जोरदार धडक दिली. शुक्रवारी मध्यरात्री १.३० च्या सुमारास घडलेल्या या अपघातात एका महिलेसह तिघांचा बळी गेला आहे. यात ११ जण जखमी झाले असून, त्यापैकी ८ जणांची प्रकृती गंभीर आहे, ज्यामुळे मृतांचा आकडा वाढण्याची भीती आहे. देवरी पोलीस पुढील तपास करत आहेत.

३. लातूर: अहमदपुरात ट्रक-कार अपघात (२ तरुण ठार)

लातूरच्या अहमदपूर येथील रत्नागिरी-नागपूर राष्ट्रीय महामार्गावर भरधाव कार ट्रकवर आदळल्याने मोठा अपघात झाला. कार चालकाचे नियंत्रण सुटल्यामुळे ही घटना घडली. या अपघातात रवीकुमार दराडे (२०) व सागर ससाणे या अहमदपूर येथील २ तरुणांचा मृत्यू झाला.

४. रायगड: दोन दुचाकींची धडक (२ ठार)

रायगडच्या कोलाड पोलिस ठाण्याच्या हद्दीत वरवटे पाले ते संभेस्टॉप दरम्यान असलेल्या छोट्या पुलावर दोन दुचाकींची धडक झाली. या अपघातात दिनेश भिकू पवार व जाबेर इब्राहिम शाह या दोघांचा बळी गेला. यात २ जण किरकोळ जखमी झाले आहेत.

५. लोणावळा: लायन्स पॉइंटजवळ कार-टेम्पोची धडक (२ पर्यटक ठार)

थंड हवेचे ठिकाण म्हणून ओळखल्या जाणाऱ्या लोणावळ्यात लायन्स पॉइंटजवळ कार आणि टेम्पोची समोरासमोर धडक झाली. या अपघातात दोघांचा मृत्यू झाला असून, मृत पर्यटक असल्याची शक्यता आहे. त्यांची ओळख पटवण्याचे काम पोलीस करत आहेत.

इतर ठिकाणी झालेले अपघात

जळगावच्या भाविकांचा अयोध्येत अपघात (१ महिला ठार)

जळगावमधील ३५ भाविकांच्या वाहनाचा उत्तर प्रदेशातील अयोध्या-सुलतानपूर येथे अपघात झाला. यात पिंप्राळा येथील छोटीबाई पाटील (५५) या भाविक महिलेचा मृत्यू झाला, तर २५ ते ३० जण जखमी झाले. जळगावचे जिल्हाधिकारी आणि मंत्री गुलाबराव पाटील यांनी तातडीने प्रयागराज प्रशासनाशी संपर्क साधून जखमींना जळगावात आणण्याचे प्रयत्न सुरू केले आहेत.

पुणे-खोपोली मार्गावर अपघात

पुण्याहून खोपोलीकडे येणाऱ्या एका मालवाहू टेम्पोने कारला धडक दिली. यात ३ जण जखमी झाले, त्यापैकी एकाची प्रकृती गंभीर आहे. या घटनेत सुदैवाने जीवितहानी टळली.

नाशिकमध्ये बस-पिकअपची धडक

नाशिकच्या त्र्यंबक नाका सिग्नलजवळ खासगी प्रवासी बस आणि पिकअपची जोरदार धडक झाली. पिकअप रस्त्यावर उलटला, पण दोन्ही वाहनांत प्रवासी नसल्याने मोठी जीवितहानी टळली.

जालना: ट्रॅक्टर कारवर उलटला

जालन्याच्या अंबड तालुक्यातील चौका घाट चढत असताना ऊसाने भरलेला ट्रॅक्टर मागे घसरून थेट एका कारवर उलटला. कारमधील पडेगाव येथील कुटुंब जखमी झाले. या घटनेमुळे चौका घाटात २ तास वाहतूक विस्कळीत झाली होती.