लाडकी बहीण योजनेवर होत असलेल्या टीकेला अजित पवारांचं जोरदार उत्तर

मुंबई : माझी लाडकी बहीण योजनेच्या खर्चावरुन अर्थ विभागाने चिंता व्यक्त केल्याची बातमी समोर आली होती. मुली आणि महिलांसाठी अगोदरच राज्यात योजना सुरु असताना ही योजना कशाला, अशी चिंता राज्याच्या वित्त आणि नियोजन विभागाला व्यक्त केली होती.

लाडकी बहीण योजनेत महिलांना महिन्याला 1500 रुपये मिळतात. लाडकी बहीण योजना ही राज्य सरकारची महत्वाकांक्षी योजना आहे. यावरुन विरोधक सत्ताधारी पक्षावर जोरदार टीका करत आहे. या टीकेला आता उपमुख्यमंत्री आणि राज्याचे अर्थमंत्री अजित पवार यांनी आपल्या सोशल मीडिया अकाऊंटवर विरोधकांना उत्तर दिले आहे.

महाराष्ट्राचा उपमुख्यमंत्री आणि राज्याचा अर्थ व नियोजन मंत्री म्हणून मी स्वतःच 'मुख्यमंत्री माझी लाडकी बहिण' योजना राज्याच्या वर्ष 2024-25 च्या अतिरिक्त अर्थसंकल्पात सादर केली आहे. वित्त व नियोजन, सर्व संबंधित विभाग तसेच राज्य मंत्रिमंडळाच्या मान्यतेनंतरच या योजनेची घोषणा मी…

— Ajit Pawar (@AjitPawarSpeaks) July 27, 2024

काय म्हणाले अजित पवार ?

उपमुख्यमंत्री तथा राज्याचे अर्थमंत्री अजित पवार यांनी आपल्या सोशल मिडिया अकाऊंटवर एक पोस्ट केली आहे. त्यामध्ये ते म्हणातात की, "महाराष्ट्राचा उपमुख्यमंत्री आणि राज्याचा अर्थ व नियोजन मंत्री म्हणून मी स्वतःच 'मुख्यमंत्री माझी लाडकी बहिण' योजना राज्याच्या वर्ष 2024-25 च्या अतिरिक्त अर्थसंकल्पात सादर केली आहे. वित्त व नियोजन, सर्व संबंधित विभाग तसेच राज्य मंत्रिमंडळाच्या मान्यतेनंतरच या योजनेची घोषणा मी राज्याच्या अर्थसंकल्पात केली".

राज्याला एवढी रक्कम खर्च करणे शक्य

चालू आर्थिक वर्षात योजनेसाठी आवश्यक एकूण 35 हजार कोटी रुपयांच्या संपूर्ण रकमेची तरतूद यावर्षीच्याच अर्थसंकल्पात केली आहे. त्यामुळे या योजनेसाठी पैसा कुठून आणणार ?, हा प्रश्नच उद्भवत नाही. महाराष्ट्रासारख्या आर्थिक संपन्न राज्याला एवढी रक्कम खर्च करणे शक्य आहे.

लाडकी बहीण योजनेला कुणाचाही विरोध असण्याचे कारण नाही

राज्यातील माता-भगिनी-मुलींच्या आर्थिक स्वातंत्र्य, स्वावलंबन, पोषण व सर्वांगीण सक्षमीकरणासाठी, मान, सन्मान, स्वाभिमान वाढवण्यासाठी ही रक्कम खर्च करण्याची राज्य शासनाची तयारी आहे. त्यामुळे 'मुख्यमंत्री माझी लाडकी बहीण योजने'ला या राज्यातील कुणाचाही विरोध असण्याचे कारण नाही, असूच शकत नाही.

या योजनेला वित्त विभागाचा विरोध ?

"काही प्रसार माध्यमांमध्ये प्रसिद्ध झालेल्या, या योजनेला वित्त विभागाचा विरोध असल्याच्या बातम्या कपोलकल्पित, वस्तुस्थितीशी, विसंगत, राजकीय हेतूने प्रेरित आहेत. प्रसार माध्यमांनी अशा बिनबुडाच्या बातम्या देणे कृपया थांबवावे. राज्यातील कुणाचाही अशा बातम्यांवर विश्वास बसणार नाही, याची मला खात्री आहे. 'मुख्यमंत्री माझी लाडकी बहीण' योजनेच्या यशस्वीतेसाठी अधिकाधिक भगिनींना यात सहभागी करून घेण्यासाठी आपण सर्वांनी प्रयत्न करूया."