जळगाव ग्रामीणमध्ये काट्यांमध्ये फुलणार 'गुलाब', पण देवकर की पाटील? विजयाची माळ कुणाच्या गळ्यात

Jalgaon Rural Assembly Election : जळगाव ग्रामीण मतदारसंघात यावेळी एक अटीतटीची आणि लक्षवेधी लढत रंगणार आहे. एकनाथ शिंदे यांच्या नेतृत्वाखालील शिवसेनेचे मंत्री गुलाबराव पाटील आणि शरद पवार यांच्या राष्ट्रवादी काँग्रेसचे नेते गुलाबराव देवकर हे आमने-सामने येत आहेत. या दोघांमध्ये तब्बल दहा वर्षांनंतर होत असलेली ही लढत संपूर्ण राज्याचे लक्ष वेधून घेणार आहे.

मतदारसंघाचा इतिहास आणि मंत्रीपदाची परंपरा

जळगाव ग्रामीण मतदारसंघाची स्थापना 2009 मध्ये करण्यात आली. या मतदारसंघात धरणगाव आणि जळगाव तालुक्यातील गावांचा समावेश आहे. विशेष म्हणजे, हा मतदारसंघ मंत्रीपद देणारा मतदारसंघ म्हणून ओळखला जातो. 2009 मध्ये राष्ट्रवादी काँग्रेसचे आमदार गुलाबराव देवकर यांना कृषी आणि परिवहन राज्यमंत्रीपद मिळाले होते. तर 2014 मध्ये गुलाबराव पाटील यांनी सहकार राज्यमंत्रीपद मिळवले आणि पुढे पाणी पुरवठा आणि स्वच्छता मंत्रीपद भूषविले. त्यामुळे या लढतीचे राजकीय महत्त्व अधिक आहे.

दोन पक्षांच्या फुटीनंतर पहिली निवडणूक

काही महिन्यांपूर्वी शिवसेना आणि राष्ट्रवादी काँग्रेस पक्षात मोठी फूट पडली. शिवसेना एकनाथ शिंदे आणि उद्धव ठाकरे गटात विभागली, तर राष्ट्रवादी काँग्रेस शरद पवार आणि अजित पवार यांच्या गटात विभागली गेली. या विभाजनानंतर होणारी ही पहिली विधानसभा निवडणूक असल्याने आरोप-प्रत्यारोपांच्या फैरी झडत आहेत आणि कार्यकर्त्यांमध्ये मोठी चुरस निर्माण झाली आहे.

महायुतीचा बालेकिल्ला

जळगाव जिल्हा हा महायुतीचा बालेकिल्ला मानला जातो. गेल्यावेळी अमळनेर आणि रावेर वगळता 9 जागांवर महायुतीचे उमेदवार विजयी झाले होते. लोकसभा निवडणुकीतही महायुतीला जळगाव जिल्ह्यात मोठे यश मिळाले होते. जळगाव ग्रामीण मतदारसंघात महायुतीच्या स्मिता वाघ यांना 60 हजारांहून अधिक मताधिक्य मिळाले होते. त्यामुळे आगामी निवडणुकीत महायुती आणि महाविकास आघाडी यांच्यातील संघर्ष तीव्र होण्याची शक्यता आहे.

मुख्य मुद्दे आणि प्रचाराचे मुद्दे

गुलाबराव पाटील यांनी विकासकामे, रस्ते, पिण्याचे पाणी, शेत रस्ते, आणि आरोग्य सुविधा या मुद्यांवर भर दिला आहे. त्यांनी आपल्या कार्यकाळात केलेल्या कामांचा प्रचार सुरू केला आहे. तर राष्ट्रवादी काँग्रेसचे गुलाबराव देवकर बेरोजगारी, म्हसावद येथील अपूर्ण उड्डाणपुल, आणि कवयित्री बहिणाबाई चौधरी स्मारकाचे बांधकाम यासारख्या मुद्द्यांवर प्रचार करत आहेत.

मागील निवडणुकांचे निकाल

वर्ष 2009 मध्ये जळगाव ग्रामीण मतदारसंघाची पुनर्रचना झाल्यानंतर झालेल्या पहिल्या निवडणुकीत राष्ट्रवादीचे गुलाबराव देवकर विजयी झाले होते. त्यांनी शिवसेनेचे गुलाबराव पाटील यांच्यावर निसटता विजय मिळवला होता. 2014 मध्ये पाटील यांनी 31 हजारांहून अधिक मतांनी देवकर यांचा पराभव केला आणि आपले वर्चस्व प्रस्थापित केले. 2019 मध्ये युती असतानाही भाजपचे बंडखोर चंद्रशेखर अत्तरदे यांनी आव्हान दिले होते, परंतु पाटील यांनी हे बंड मोडून 46 हजारांहून अधिक मतांनी विजय मिळविला.

शिवसेना बंडानंतरचे बदल

शिंदे गटात सामील झाल्यानंतर गुलाबराव पाटील हे एकनाथ शिंदे यांच्या जवळचे मानले जातात. शिंदे गटाच्या बंडानंतर त्यांचे महत्त्व वाढले आहे. त्यामुळे आगामी निवडणुकीत त्यांचे भवितव्य आणि मतदारसंघातील समीकरणे या लढतीत महत्वाची भूमिका बजावतील. जळगाव ग्रामीण मतदारसंघातील निवडणूक या वेळी अत्यंत चुरशीची आणि राज्याच्या राजकीय समीकरणांना दिशा देणारी ठरणार आहे. शिवसेना आणि राष्ट्रवादी काँग्रेसच्या फूटीनंतर होणारी ही पहिलीच निवडणूक असल्याने प्रचाराची रणधुमाळी आणि मतदारांचे कौल यावर सर्वांचे लक्ष केंद्रित आहे.