..तर बाळासाहेबांनी अशा नेत्यांचं थोबाड फोडलं असतं; मुख्यमंत्री एकनाथ शिंदे का संतापले

Eknath Shinde on Arvind Sawant : ठाकरे गटाचे खासदार अरविंद सावंत यांनी शिंदेंच्या शिवसेनेतील महिला उमेदवार सायना एनसी यांच्याविरोधात वादग्रस्त विधान केले. त्यावरुन राज्यात चांगलाच वाद पेटला. भाजप शिवसेनेकडून अरविंद सावंत यांच्यावर जोरदार हल्लाबोल केला जात आहे.

त्यावर आता मुख्यमंत्री एकनाथ शिंदे यांनी प्रतिक्रिया दिली. तर महिलांबाबत वादग्रस्त विधान करणाऱ्या नेत्यांचं बाळासाहेब ठाकरेंनी थोपाडं फोडलं असतं, असे म्हणत त्यांनी अरविंद सावंत यांच्यावर जोरदार निशाणा साधला.

काय म्हणाले होते अरविंद सावंत?

निवडणुकीचा प्रचार करत असताना ठाकरे गटाचे खासदार अरविंद सावंत यांनी शायना एनसी यांच्याबाबत प्रतिक्रिया देताना वादग्रस्त विधान केले. ते म्हणाले की, 'त्या आयुष्यभर भाजपात राहिल्या आणि आता शिवसेना (एकनाथ शिंदे) पक्षात आल्या. पण इथे इम्पोर्टेड चालत नाही. आमच्या इथे ओरिजनल माल चालतो'. त्यांच्या या विधानावर आता शायना एनसी यांनी आक्षेप घेतला. त्यांनी पोलिस ठाणे गाठून वक्तव्यावरु तक्रार दाखल केली. त्यानंतर अरविंद सावंत यांच्यावर गुन्हा दाखल झाला.

भारतीय जनता पक्षाच्या नेत्या शायना एनसी यांना मुंबादेवी विधानसभा मतदारसंघातून विधानसभेसाठी उतरवण्यात आले. हा मतदारसंघ शिंदेंच्या शिवसेनेच्या वाट्याला आल्याने या ठिकाणी शायना एनसी यांनी शिवसेनेते प्रवेश केला. व या ठिकाणाहून त्या मैदानात उतरल्या आहेत. तर शायना एनसी यांच्याविरोधात काँग्रेस पक्षाने अमिन अमीरअली पटेल यांना पुन्हा एकदा मैदानात उतरवलं आहे.

काय म्हणाले मुख्यमंत्री शिंदे?

खासदार अरविंद सावंत यांच्या विधानावर मुख्यमंत्री शिंदे यांनी प्रतिक्रिया दिली. ते म्हणाले की, शायना एनसीबाबत जे विधान केलंय त्याचा मी निषेध करतो. बाळासाहेब असते तर अशा नेत्यांचं थोबाड फोडलं असतं. लाडक्या बहिणीच्या बाबत असं विधान करणाऱ्यांना जनता माफ करणार नाही, त्यांना जनताच उत्तर देईल, असेही ते म्हणाले.

अरविंद सावंतांनी काय केले स्पष्टीकरण?

अरविंद सावंत यांच्यावर गुन्हा दाखल झाल्यानंतर आता खुद्द खासदार अरविंद सावंत यांनी प्रतिक्रिया दिली. ते म्हणाले की, पोलिसांचं कौतुक नोटीस न देता गुन्हा दाखल केलाय. पोलीस स्थानकात गोळी झाडली गेली, ठाण्यात अत्याचार झाला, महिला पत्रकाराला बोलले काय गुन्हा दाखल झाला? सत्तेत असाल तर काही करा, गुन्हा दाखल होणार नाही.

मला बदनाम करण्याचे कटकारस्थान

खासदार अरविंद सावंत म्हणाले की, मला बदनाम करण्याचे कटकारस्थान रचलं गेलंय. ती माझी मैत्रिण होती, मी तिचा अपमान कशाला करेल. ही ढोंगी लोकं आहेत. तुमच्या पक्षात सत्तेत असाल तर काहीही करा असं आहे. तुम्हाला एथिक्स नाहीत. तुम्ही भ्रष्ट लोकं आणि ते आरोप करतात तेव्हा वाईट वाटतं. काहीच नाही करता येत अरविंद सावंत वर मग त्यालाच बदनाम करा.

नोटीस न देता एफआयआर दाखल कसं करु शकतात? संजय राठोडांविरोधात गप्प का राहिलात? ऐन निवडणुकीत यांचा काही वापर करता येईल का? म्हणून सर्व आहे हे.. ही सर्व मोदींची चेले मंडळी आहेत. कायदेशीर कारवाईला सामोरे जावू.