"आम्ही एकटे लढणार! काँग्रेसचा मनपा निवडणुकीपुर्वी 'दे धक्का!' वडेट्टीवारांची मोठी घोषणा, मविआचे काय?

Congress To Fight BMC Election Solo : महाराष्ट्राच्या राजकारणात एक मोठी आणि ताजी घडामोड समोर आली आहे. काँग्रेसचे ज्येष्ठ नेते आणि आमदार विजय वडेट्टीवार यांनी मुंबई महानगरपालिकेच्या (BMC) आगामी निवडणुकीसंदर्भात आज (सोमवार, १० नोव्हेंबर २०२५) अत्यंत महत्त्वाची घोषणा केली आहे. जगातील सर्वात मोठ्या महानगरपालिकांपैकी एक असलेल्या मुंबई महानगरपालिकेची निवडणूक काँग्रेस स्वबळावर लढणार असल्याचे त्यांनी स्पष्ट केले आहे.

विजय वडेट्टीवार यांच्या पत्रकार परिषदेतील महत्त्वाचे अपडेट्स

स्वबळाचा निर्णय: "आमच्या मुंबई महानगरपालिकेच्या नेत्यांनी ठरवले आहे की, आम्ही ही निवडणूक स्वतंत्र लढणार आहोत. त्यामुळे कोणाला किती जागा मिळतील, हा प्रश्न निर्माण होत नाही."

श्रेष्ठींशी चर्चा: हा निर्णय स्थानिक पातळीवर हाय कमांडशी चर्चा करून घेण्यात आल्याचे वडेट्टीवार यांनी सांगितले.

मतांच्या विभाजनावर काय म्हणाले विजय वडेट्टीवार?

"आम्ही मुंबईत नेहमी लढत आलो आहोत आणि आमच्या ३० ते ३५ जागा निवडून येत असतात. जर महायुतीचे तीन पक्ष वेगळे लढत असताना त्यांचे विभाजन होत नाही, तर आमच्या विभाजनाची चिंता का करायची?" असा थेट सवाल वडेट्टीवार यांनी विरोधकांना केला.

जिंकणे उद्देश नाही - वडेट्टीवार

वडेट्टीवार यांनी यावेळी कार्यकर्त्यांच्या भावनांना महत्त्व दिले. "निवडून येण्याचे निकष हा घटक आमच्यासाठी दुय्यम आहे. जिंकणे हा आमचा उद्देश नाही, पण कार्यकर्त्यांना न्याय देणे आणि त्यांना निवडणूक लढण्याची संधी देणे हा आमचा मुख्य उद्देश आहे," असे महत्त्वपूर्ण विधान त्यांनी केले.

महाविकास आघाडीबाबत भूमिका

निवडणुकांना अजून वेळ आहे. जर समविचारी पक्षांकडून निवडणुकीत एकत्र येण्याचा प्रस्ताव आला, तर आम्ही नक्कीच विचार करू, असेही त्यांनी स्पष्ट केले.

नाशिकमध्ये वेगळी आघाडी?

वडेट्टीवार यांनी मुंबईत काँग्रेस स्वबळावर लढणार असल्याचे स्पष्ट केले असले तरी, नाशिकमधून मात्र वेगळे राजकीय संकेत मिळत आहेत. आगामी स्थानिक स्वराज्य संस्थांच्या निवडणुकीच्या पार्श्वभूमीवर नाशिकमध्ये झालेल्या पत्रकार परिषदेत महाविकास आघाडी आणि मनसेच्या स्थानिक नेत्यांनी एकत्र येऊन लढण्याची घोषणा केली आहे. नाशिकमध्ये 'महागठबंधन' लवकरच होणार असून, महायुतीचा पराभव करण्यासाठी एकत्र लढण्याचा निर्णय घेण्यात आला आहे.

यावरून स्पष्ट होते की, काँग्रेसने मुंबईत 'स्वबळ' दाखवण्याचा प्रयत्न केला असला तरी, नाशिकसारख्या इतर शहरांमध्ये 'महाविकास आघाडी + मनसे' अशी एकत्रित आघाडी होण्याची शक्यता निर्माण झाली आहे.