मुंबई कुणाची? पहिल्या सर्व्हेचा धक्कादायक निकाल; ठाकरे बंधू मैदानात, कुणाला किती जागा मिळणार, वाचा

BMC Election 2026 Survey : देशातील सर्वात श्रीमंत महापालिका म्हणून ओळखल्या जाणाऱ्या मुंबई महानगरपालिकेवर यंदा भगवा कुणाचा फडकणार? या प्रश्नाचे उत्तर शोधणारा पहिला सविस्तर सर्व्हे 'व्होट वाईब इंडिया'ने (Vote Vibe India) प्रसिद्ध केला आहे. अमिताभ तिवारी यांनी इंडिया टुडेला दिलेल्या मुलाखतीत मांडलेली आकडेवारी मुंबईच्या राजकारणाची नाडी ओळखून आहे. एकीकडे भाजप आणि शिंदे सेनेची वाढलेली ताकद, तर दुसरीकडे 'ठाकरे बंधू' (उद्धव आणि राज ठाकरे) एकत्र आल्याने निर्माण होणारे भावनिक आव्हान, अशा दुहेरी पेचात ही निवडणूक अडकणार असल्याचे चित्र आहे.

काय सांगतोय 'व्होट वाईब इंडिया'चा सर्व्हे?

मुंबई महापालिकेत एकूण २२७ प्रभाग असून सत्तेसाठी ११४ हा जादुई आकडा आहे. विधानसभा निवडणुकीचा कल कायम राहिल्यास महायुती सत्तेच्या जवळ पोहोचताना दिसत आहे.

पक्षनिहाय संभाव्य जागांची आकडेवारी

राजकीय पक्ष / युती : अंदाजित जागा

• भारतीय जनता पार्टी (BJP) : ८२
• शिवसेना (एकनाथ शिंदे गट) : ३२
• शिवसेना UBT + मनसे (ठाकरे गट) : ७९
• काँग्रेस : १९
• राष्ट्रवादी काँग्रेस (अजित पवार) : ०५
• राष्ट्रवादी काँग्रेस (शरद पवार) : ००
• इतर / अपक्ष : १०

१. भाजपचे वाढते वर्चस्व

महायुती (भाजप, शिंदे गट आणि अजित पवार गट) सध्या सत्तेच्या जादुई आकड्याच्या (११४) अगदी जवळ असल्याचे दिसत आहे. गेल्या ८ वर्षांत भारतीय जनता पक्षाने मुंबईतील प्रत्येक प्रभागात आपले संघटनात्मक जाळे अत्यंत मजबूत केले आहे. विशेषतः उत्तर भारतीय, गुजराती आणि दक्षिण भारतीय मतदारांमध्ये भाजपची पकड घट्ट झाली आहे.

शिंदे गटाची साथ

एकनाथ शिंदे यांच्या नेतृत्वाखालील शिवसेनेने अनेक माजी नगरसेवकांना आपल्याकडे वळवण्यात यश मिळवले आहे. याचा फायदा महायुतीला जागा वाढवण्यात होताना दिसत आहे. सर्व्हेनुसार, महायुतीला एकूण ११४ ते १२० जागा मिळण्याची शक्यता आहे, जे बहुमतासाठी पुरेसे आहे.

२. 'ठाकरे बंधू' आणि भावनिक लाटेचे आव्हान

या निवडणुकीचे सर्वात मोठे आकर्षण म्हणजे उद्धव ठाकरे आणि राज ठाकरे यांची संभाव्य युती किंवा सहकार्य. मराठी मतांचे एकत्रीकरण यंदा भक्कम होईल अशी शक्यता आहे. गेल्या अनेक निवडणुकांमध्ये शिवसेना (UBT) आणि मनसे यांच्यात मराठी मतांचे विभाजन झाल्याचा थेट फायदा भाजपला झाला होता. मात्र, आता हे दोन्ही बंधू 'मराठी अस्मितेच्या मुद्द्यावर एकत्र आल्यास, मराठी मतांची मोठी 'व्होट बँक' तयार होऊ शकते. उद्धव ठाकरे यांच्याबद्दलची सहानुभूती आणि राज ठाकरे यांची आक्रमक भाषणे यामुळे मुंबईत एक भावनिक लाट निर्माण होऊन युतीच्या जागा ७९ च्या ही पुढे जाऊ शकतात, असा अंदाज राजकीय विश्लेषकांनी वर्तवला आहे.

३. 'मराठी-मुस्लिम' फॅक्टर आणि उलटफेर

मुंबईच्या निवडणुकीत यंदा एक नवीन समीकरण पाहायला मिळत आहे, ज्याला मराठी-मुस्लिम फॅक्टर म्हटले जात आहे. मुंबईत ४० टक्के मराठी आणि २० टक्के मुस्लिम मते आहेत. अनेक प्रभागांमध्ये मुस्लिम मतदार जय-पराजय ठरवण्यात निर्णायक भूमिका बजावतात.

लोकसभा आणि विधानसभा निवडणुकीत मुस्लिम मतदारांचा कल उद्धव ठाकरे यांच्या शिवसेनेकडे झुकलेला पाहायला मिळाला. जर हे समीकरण स्थानिक स्वराज संस्थेच्या निवडणुकीतही टिकून राहिले, तर भाजप-शिंदे युतीसमोर मोठे आव्हान उभे राहील आणि निकालात मोठा उलटफेर होऊ शकतो.

४. काँग्रेस आणि महाविकास आघाडीची भूमिका

काँग्रेस मुंबईत आपली स्वतंत्र ओळख टिकवून ठेवण्यासाठी प्रयत्नशील आहे. सर्व्हेनुसार काँग्रेसला १९ जागा मिळण्याचा अंदाज आहे. मुंबईतील मुस्लिम बहुल वॉर्डांमध्ये आणि काही दलित वस्त्यांमध्ये काँग्रेसची आजही ताकद आहे. जर निवडणूक निकालानंतर कोणत्याही एका युतीला स्पष्ट बहुमत मिळाले नाही, तर काँग्रेस आणि राष्ट्रवादी काँग्रेस (शरद पवार गट) यांची भूमिका किंगमेकरची ठरू शकते. तथापि, सध्याच्या सर्व्हेत शरद पवार गटाला मुंबईत संघर्ष करावा लागत असल्याचे चित्र आहे.

सत्तेचा जादुई आकडा आणि सध्याची स्थिती

• एकूण जागा: २२७
• बहुमतासाठी आवश्यक: ११४
• सर्व्हेनुसार महायुती: ११९ (भाजप ८२ + शिंदे ३२ + अजित पवार ५)
• सर्व्हेनुसार विरोधक: ९८ (ठाकरे-मनसे ७९ + काँग्रेस १९)