अजित पवार विमान अपघात: घातपाताचा संशय? अमोल मिटकरींचा 'सुसाईड बॉम्बर' व 'हिप्नोटिझम'चा दावा

Amol Mitkari on Ajit Pawar plane crash : राज्याचे माजी उपमुख्यमंत्री अजित पवार यांच्या अपघाती निधनाने महाराष्ट्र अजूनही सावरलेला नसताना, आता या अपघाताभोवती संशयाचे धुके अधिक गडद होऊ लागले आहे. राष्ट्रवादी काँग्रेसचे आमदार अमोल मिटकरी यांनी या प्रकरणात थेट 'सुसाईड बॉम्बर' आणि 'पायलटचे संमोहन' यांसारखे शब्द वापरून राजकीय वर्तुळात मोठी खळबळ उडवून दिली आहे.

मिटकरींचे गंभीर आरोप आणि उपस्थित केलेले प्रश्न

अमोल मिटकरी यांनी रविवारी प्रसारमाध्यमांशी बोलताना या अपघाताबाबत अनेक तांत्रिक आणि संशयास्पद बाबींवर बोट ठेवले आहे. राजीव गांधी यांच्या हत्येचा संदर्भ देत मिटकरींनी शंका उपस्थित केली की, अजितदादांच्या विमानात आत्मघातकी बॉम्बरचा वापर झाला असावा का?

विमानाचे पायलट सुमित कपूर यांना कोणी संमोहित केले होते का किंवा त्यांना काही आमिष दाखवण्यात आले होते का, असा सवाल त्यांनी विचारला आहे. अपघाताच्या काही काळ आधीच (डिसेंबर २०२५ मध्ये) VSR कंपनीने आपल्या प्रत्येक पायलटचा ५० कोटी रुपयांचा विमा उतरवला होता. ही बाब मिटकरींना अत्यंत संशयास्पद वाटत आहे.

'MAYDAY' कॉलचा अभाव

आणीबाणीच्या प्रसंगी पायलट 'मेडे' (MAYDAY) कॉल देतात, मात्र या प्रकरणात तसा कोणताही कॉल दिला गेला नाही. तसेच, विमानाने टेक-ऑफ घेतल्यावर पुण्याच्या दिशेने वळणे शक्य असतानाही तसे का झाले नाही, यावर त्यांनी प्रश्नचिन्ह उपस्थित केले आहे.

VSR कंपनीच्या भूमिकेवर प्रश्नचिन्ह

ज्या कंपनीच्या विमानाने अजित पवार प्रवास करत होते, त्या VSR कंपनीवर मिटकरींनी गंभीर आरोप केले आहेत: १. हे विमान वर्षभरापासून नादुरुस्त किंवा बंदी असलेल्या स्थितीत होते का? २. प्रवासाच्या वेळी शेवटच्या क्षणी पायलट का बदलण्यात आले? ३. विमा उतरवण्यामागे कंपनीचा काही पूर्वनियोजित कट होता का?, "हा केवळ अपघात नसून एक मोठा कट असू शकतो. पायलेटला हिप्नोटाइज करून हे कृत्य करायला लावले का, याचा सखोल तपास झाला पाहिजे." - अमोल मिटकरी

पुढील दिशा कशी असणार?

या प्रकरणातील गूढ वाढवणारी आणखी एक गोष्ट म्हणजे रोहित पवार यांची आगामी पत्रकार परिषद. मिटकरींच्या मते, १० तारखेला होणाऱ्या या परिषदेत रोहित पवार काही महत्त्वाचे पुरावे सादर करू शकतात. दरम्यान, मिटकरी यांनी मुख्यमंत्री देवेंद्र फडणवीस यांची भेट घेण्यासाठी मंगळवारची वेळ मागितली असून, ते या सर्व पुराव्यांची सखोल चौकशी करण्याची मागणी करणार आहेत.