अक्कलकोटमध्ये भाजपच; सचिन कल्याणशेट्टी दुसऱ्यांदा विजयी

Akkalkot Assembly Result 2024- अक्कलकोट हा महाराष्ट्रातील धार्मिक स्थळांच्या दृष्टिकोनातून सर्वात महत्त्वाचा मतदार संघ. महाराष्ट्रातील अनेक लोकांचे श्रद्धास्थान असलेल्या श्री स्वामी समर्थ यांची भूमी म्हणजे अक्कलकोट.महाराष्ट्र विधानसभा निवडणुकीच्या पार्श्वभूमीवर या मतदारसंघात झालेली लढत अत्यंत लक्षवेधी होती. भाजपचे विद्यमान आमदार सचिन कल्याणशेट्टी आणि काँग्रेसचे नेते सिद्धाराम म्हेत्रे यांच्या लढतीत सचिन कल्याण शेट्टी यांनी हा मतदार संघ सहज आपल्या खिशात घातला, आणि भाजपच्या खात्यात आणखी एका जागेची नोंद झाली. सचिन कल्याणशेट्टी यांना 1, 48,105 मते मिळाली तर त्यांचे विरोधी सिद्धराम म्हेत्रे यांना 98,533 मतांवर समाधान मानावे लागले.

धार्मिक स्थळामुळे राज्यात चर्चा

अलीकडच्या काळातील राजकारणात धार्मिक भावना आणि सद्भावना हा एक महत्त्वाचा विषय आहे. धार्मिक श्रद्धांना आव्हान देऊन सनसनाटी निर्माण करण्याचा प्रयत्न अनेक राजकीय नेत्यांकडून केला जातो. अक्कलकोट ही स्वामी समर्थांची भूमी आहे. महाराष्ट्रातील लाखो भावी अक्कलकोटला येत असतात. श्री स्वामी समर्थांच्या बाबतीत उच्चारला गेलेला प्रत्येक शब्द समर्थ भक्तांच्या मनात घर निर्माण करत असतो. यावेळी विधानसभा निवडणूक देखील त्याला अपवाद नव्हती.

पत्रकाराची चूक मविआला पडली भारी

स्वामी समर्थ यांचा भक्त संप्रदाय संपूर्ण महाराष्ट्रात वसलेला आहे. राष्ट्रवादी काँग्रेसचे संस्थापक शरद पवार यांच्या उपस्थितीत मुंबई परिसरात एका जाहीर कार्यक्रमाचे आयोजन करण्यात आले होते. त्या कार्यक्रमात शरद पवार यांच्या समोरच एका पुरोगामी पत्रकाराने श्री स्वामी समर्थ यांच्यावर टीका केली. त्यामुळे अनेकांच्या भावना दुखावल्या गेल्या. स्वामी समर्थांचा भक्त परिवार संपूर्ण महाराष्ट्रात आहे, आणि त्यामुळे त्या पत्रकाराची चूक महाविकास आघाडीला भारी पडली.

अक्कलकोटला मंत्रीपदाची संधी

अक्कलकोट विधानसभा मतदारसंघात सचिन कल्याणशेट्टी हे भाजपचे उमेदवार प्रतिनिधित्व करत होते. त्यांच्या विरोधात काँग्रेसने सिद्धाराम म्हेत्रे यांना उमेदवारी दिली होती. ही लढत चुरशीची होईल असा अंदाज व्यक्त करण्यात येत होता. नुकत्याच झालेल्या लोकसभा निवडणुकीत महायुतीने अत्यंत कमजोर निकाल दिले. त्यामुळे येथील निकालांच्या संदर्भात संभ्रम निर्माण झाला होता. त्यातही सचिन कल्याणशेट्टी हे राज्याचे उपमुख्यमंत्री देवेंद्र फडणवीस यांच्या जवळचे मानले जातात. या परिसरात झालेल्या अनेक विकास कामांच्या लोकार्पण कार्यक्रमात सचिन कल्याणशेट्टी यांनी देवेंद्र फडणवीस यांचे मनमुराद कौतुक केले आहे. त्यामुळे या मतदारसंघातील लढतीला विशेष महत्त्व प्राप्त झाले होते. अखेरीस भाजपचे सचिन कल्याणशेट्टी यांनी काँग्रेसचे सिद्धाराम म्हेत्रे यांचा पराभव करून विजयश्री खेचून आणली. सचिन कल्याणशेट्टी आणि देवेंद्र फडणवीस यांचे संबंध पाहता अक्कलकोट विधानसभा मतदारसंघाला मोठे गिफ्ट मिळण्याची शक्यता आहे. सचिन कल्याणशेट्टी यांनी मिळवलेला विजय सोलापूरची दशा आणि दिशा बदलून टाकणारा विजय आहे. कल्याण शेट्टी यांच्या माध्यमातून सोलापुरात विविध विकास कामे होतील असा स्थानिकांचा विश्वास आहे. हा विश्वास निर्माण करण्यात सिद्धराम म्हेत्रे अपयशी ठरले आणि त्यांना पुढील परिणाम भोगावे लागले.