विश्व वन्यजीव दिवस 2025: काय आहे यावर्षीची थीम? या दिवसाचे महत्व काय? इतिहास काय? वाचा...

जागतिक वन्यजीव दिन दरवर्षी 3 मार्च रोजी साजरा केला जातो. पृथ्वीतलावरील जीवनाच्या अफाट विविधतेचा हा आंतरराष्ट्रीय उत्सव आहे. लुप्त होत चाललेल्या प्रजाती आणि नैसर्गिक वातावरणाचे संरक्षण करण्याचे आवाहन करण्यासाठी हा दिवस साजरा केला जातो. युनायटेड नेशन्सद्वारे 2013 मध्ये या दिवसाची सुरुवात करण्यात आली. हा दिवस भविष्यातील पिढ्यांसाठी शाश्वत जीवन आणि वन्यजीव संरक्षणाचे महत्त्व अधोरेखित करतो.

काय आहे यावर्षीची थीम

"वन्यजीव संरक्षण वित्त: लोक आणि ग्रहामध्ये गुंतवणूक" ही जागतिक वन्यजीव दिन 2025 ची थीम आहे. पर्यावरण, अर्थव्यवस्था आणि मानवी कल्याण राखण्यासाठी वन्यजीवांची भूमिका गरजेची आहे. ही गरज ओळखून त्यांचे संवर्धन करण्यासाठी नाविन्यपूर्ण आर्थिक उपायांवर चर्चा करण्याचे आव्हान करण्यात आले आहे. पृथ्वीवरील संतुलन राखण्यासाठी वनस्पती आणि प्राणी आवश्यक आहेत. परंतु वाढते पर्यावरणीय धोके, अधिवास नष्ट करणे आणि वन्यजीवांचा अवैध व्यापार यामुळे अनेक प्रजाती धोक्यात आल्या आहेत. या वर्षीची थीमद्वारे पृथ्वीवरील प्रजाती आणि त्यांच्या अधिवासांचे संरक्षण करणाचे आव्हान करण्यात आले आहे.

काय आहे या दिवसाची पार्श्वभूमी

20 डिसेंबर 2013 रोजी संयुक्त राष्ट्र महासभेने (UNGA) एका ठरावाअंतर्गत संयुक्त राष्ट्रसंघ जागतिक वन्यजीव दिन म्हणून 3 मार्चची औपचारिक स्थापना केली. CITES सचिवालय (कन्व्हेन्शन ऑन इंटरनॅशनल ट्रेड इन एन्डेंजर्ड स्पीसीज ऑफ वाइल्ड फौना अँड फ्लोरा) या कार्यक्रमासाठी जागतिक समन्वयक म्हणून नियुक्त करण्यात आले होते.
3 मार्चची तारीख निवडण्यात आली कारण याच दिवशी 1973 CITES अधिवेशनावर स्वाक्षरी करण्यात आली होती. आंतरराष्ट्रीय व्यापाराचे नियमन करून लुप्तप्राय प्रजातींचे अस्तित्व सुनिश्चित करण्याच्या उद्देशाने एक महत्त्वाचा करार केला होता. जागतिक वन्यजीव दिन प्रथम थायलंडने प्रस्तावित केला होता, जो नंतर संयुक्त राष्ट्रांच्या आमसभेने स्वीकारला.