अलास्कामध्ये ट्रम्प-पुतिन यांच्यात बैठक; मात्र बैठकीपूर्वीच ट्रम्प यांचा मोठा इशारा

अमेरिकेचे राष्ट्राध्यक्ष डोनाल्ड ट्रम्प हे रशियाचे अध्यक्ष व्लादिमीर पुतिन यांच्यासोबत होणाऱ्या बैठकीसाठी वॉशिंग्टनहून अलास्कासाठी रवाना झाले आहेत. ही बैठक आज रात्री १२.३० वाजता होणार असून, संपूर्ण जगाचे लक्ष या बैठकीकडे लागले आहे. या बैठकीत रशिया-युक्रेन युद्धावर तोडगा काढण्याची अपेक्षा व्यक्त केली जात आहे.

ट्रम्प यांचा मोठा दावा आणि इशारा

अलास्कासाठी रवाना होण्यापूर्वी ट्रम्प यांनी माध्यमांना सांगितले की, "पुतिन यांना माझ्या अर्थव्यवस्थेमध्ये रस आहे. जर या चर्चेतून काही प्रगती झाली तर मी त्यावर नक्कीच बोलेन." मात्र, त्यांनी हे स्पष्ट केले की जोपर्यंत रशिया-युक्रेन युद्ध थांबत नाही, तोपर्यंत रशियासोबत कोणताही व्यापार होणार नाही. रॉयटर्सच्या वृत्तानुसार, या बैठकीत युक्रेनमधील युद्धविराम करारावर चर्चा होण्याची शक्यता आहे.

ट्रम्प यांनी या बैठकीला 'मोठा डाव' (High stakes) असे म्हटले आहे. त्यांनी इशारा दिला की, जर ही चर्चा अयशस्वी झाली, तर त्याचे गंभीर परिणाम होऊ शकतात. ट्रम्प यांच्यासोबत अमेरिकेचे परराष्ट्र मंत्री मार्को रुबियो, वित्त मंत्री स्कॉट बेसेंट, वाणिज्य मंत्री हॉवर्ड लट्निक आणि सीआयएचे संचालक जॉन रॅटक्लिफ यांच्यासह अनेक वरिष्ठ अधिकारी या बैठकीत सहभागी होणार आहेत.

पुतिन सध्या कुठे आहेत?

ट्रम्प अलास्कासाठी रवाना झाले असले तरी पुतिन सध्या रशियाच्या सुदूर पूर्व भागातील मगदान शहरात आहेत. क्रेमलिनचे प्रवक्ते दिमित्री पेस्कोव यांनी दिलेल्या माहितीनुसार, पुतिन यांनी तेथील स्थानिक अधिकाऱ्यांची बैठक घेतली आणि एका औद्योगिक प्रकल्पालाही भेट दिली. येथून ते अलास्काकडे रवाना होतील.

झेलेन्स्की यांनी व्यक्त केली अपेक्षा

ट्रम्प-पुतिन यांच्या बैठकीपूर्वी युक्रेनचे राष्ट्राध्यक्ष वोलोडिमिर झेलेन्स्की यांचेही विधान समोर आले आहे. झेलेन्स्की म्हणाले की, "आता युद्ध थांबवण्याची वेळ आली आहे." त्यांनी आशा व्यक्त केली की, या बैठकीतून 'न्यायपूर्ण शांतते'चा मार्ग मोकळा होईल. तसेच, ही बैठक युक्रेन, अमेरिका आणि रशिया यांच्यातील त्रिपक्षीय चर्चेची एक महत्त्वाची संधी असल्याचेही त्यांनी सांगितले.