Russia Ukraine War: रशियाचा युक्रेनवर मोठा हल्ला, 600 ड्रोन अन् मिसाईल डागल्या, किती झालं नुकसान!

Russia Ukraine War: मागील तीन वर्षांपासून सुरू असलेल्या युक्रेन-रशिया युद्धाने पुन्हा एकदा भयानक रूप धारण केले आहे. पूर्वी हल्ल्यांचे केंद्र पूर्व युक्रेन किंवा संघर्षग्रस्त क्षेत्रे होती, तर आता हे युद्ध पश्चिम युक्रेनकडेही सरकले आहे.

शनिवारी रशियाने युक्रेनच्या अनेक शहरांवर मोठा हवाई हल्ला केला, ज्यामुळे पुन्हा एकदा हे स्पष्ट झाले की, हे युद्ध आता सीमेपुरते मर्यादित राहिलेले नाही. धक्कादायक बाब म्हणजे, या महिन्यातील हा चौथा मोठा हल्ला होता, ज्यामध्ये रशियाने युक्रेनियन भागांवर सुमारे 600 आत्मघाती ड्रोन आणि दोन डझनहून अधिक क्षेपणास्त्रे डागली.

आश्चर्याची गोष्ट म्हणजे, यावेळी ल्विव्ह, लुत्स्क आणि चेर्निव्हत्सी सारख्या शहरांना लक्ष्य करण्यात आले, जे कायम सुरक्षित शहर मानले जात होते, परंतु, अशा भागांवर देखील रशियाकडून हल्ला करण्यात आलाय.

ट्रम्प यांच्या मदतीच्या घोषणेने रशिया संतप्त!

रॉयटर्सच्या वृत्तानुसार, रशियाच्या अलिकडच्या हवाई हल्ल्यात युक्रेनच्या चेर्निव्हत्सी शहरात दोन नागरिकांचा मृत्यू झाला, ज्यामध्ये 26 वर्षीय महिला आणि 43 वर्षीय पुरूषाचा समावेश आहे. हे शहर रोमानियाच्या सीमेपासून फक्त 40 किलोमीटर अंतरावर आहे, ज्यामुळे या हल्ल्याची गंभीरता आणि प्रादेशिक धोका आणखी वाढतो.

आश्चर्यकारक गोष्ट म्हणजे हा हल्ला अशा वेळी झाला जेव्हा अलीकडेच अमेरिकेचे राष्ट्राध्यक्ष डोनाल्ड ट्रम्प यांनी युक्रेनला लष्करी मदत करण्याचे जाहीर केले होते. अशा परिस्थितीत, प्रश्न उद्भवतो की रशियाने अमेरिकेच्या पाठिंब्याला प्रत्युत्तर देण्यासाठी हा हल्ला केला आहे का?

सुरक्षित भागात हल्ला

हल्ल्यामुळे किमान 14 जण जखमी झाले आहेत, तर शहरातील अनेक निवासी आणि सरकारी इमारतींचे मोठे नुकसान झाले आहे. हल्ल्यानंतर शहरात अनेक ठिकाणी आग लागली, ज्यामुळे गोंधळ निर्माण झाला आणि लोकांमध्ये भीतीचे वातावरण पसरले.

या हल्ल्याचा सर्वाधिक फटका ल्विव्ह शहराला बसला, जिथे 46 निवासी इमारती, एक विद्यापीठ, एक न्यायालय आणि 20 हून अधिक लहान-मोठ्या व्यावसायिक प्रतिष्ठानांचे नुकसान झाले आहे. हा हल्ला पश्चिम युक्रेनमधील त्या शहरांनाही बसत आहे, जे आतापर्यंत युद्धापासून तुलनेने सुरक्षित मानले जात होते.

युक्रेनच्या हवाई दलाने दिले प्रत्युत्तर!

युक्रेनियन हवाई दलाने हल्ल्यादरम्यान लगेचच प्रत्युत्तर दिल्याचा दावा केला, २५ क्षेपणास्त्रे पाडली, ३१९ शाहिद ड्रोन नष्ट केले आणि इलेक्ट्रॉनिक युद्धाद्वारे 258 ड्रोन जाम केले.

या जलद प्रतिसादामुळे पुढील नुकसान टाळण्यास मदत झाली असली तरी, हल्ल्याची तीव्रता इतकी जास्त होती की देशभरात भीती आणि असुरक्षिततेचे वातावरण निर्माण झाले आहे. युक्रेनच्या या संरक्षण कारवाईवरून असे दिसून येते की देशाचे हवाई दल सतत सतर्क आहे, परंतु युद्धाच्या वाढत्या आक्रमकतेमुळे सामान्य नागरिकांचे जीव सतत धोक्यात येत आहेत.