पाकिस्तान हादरले! जाफर एक्सप्रेसवर पुन्हा बॉम्बहल्ला: BRGसंघटनेने जबाबदारी स्वीकारली, नेमका वाद काय?

Pakistan train blast 2025 : पाकिस्तानमधील रेल्वे वाहतूक पुन्हा एकदा दहशतवाद्यांच्या निशाण्यावर आली आहे. मंगळवार, ७ ऑक्टोबर रोजी रावळपिंडीहून क्वेट्टाला जाणाऱ्या जाफर एक्सप्रेसवर आयईडी बॉम्बस्फोटाद्वारे भीषण हल्ला करण्यात आला. या हल्ल्यात अनेक प्रवासी गंभीर जखमी झाले असून, ट्रेनचे अनेक डबे रुळावरून घसरले आहेत.

या हल्ल्याची जबाबदारी बलुच रिपब्लिकन गार्ड्स (Baloch Republican Guards - BRG) या दहशतवादी संघटनेने स्वीकारली आहे. बलुच आर्मीने रुळांवर रिमोट कंट्रोल आयईडी बॉम्ब ठेवला होता, ज्यामुळे मोठा स्फोट होऊन ट्रेनचे मोठे नुकसान झाले.

स्फोटामुळे ट्रेन रुळावरून घसरली; अनेक प्रवासी जखमी

पीटीआय (PTI) वृत्तसंस्थेच्या माहितीनुसार, हा स्फोट इतका जोरदार होता की त्यामुळे जाफर एक्सप्रेस रुळावरून बाजूला झाली. जखमी प्रवाशांना तात्काळ मदत मिळावी यासाठी सुरक्षा कर्मचारी आणि बचाव पथके तातडीने घटनास्थळी पोहोचले. जखमींना जवळच्या रुग्णालयात दाखल करण्यात आले आहे. या हल्ल्यामुळे प्रवाशांमध्ये भीतीचे वातावरण निर्माण झाले आहे.

Additional footage of attack on #JaffarExpress:
📍#SultanKot area of #Shikarpur district, #Sindh
4x passengers injured in the blast & firing.#Baloch Republican Guards have claimed responsibility for the attack #Balochistan @SherBah46958042 pic.twitter.com/deuwdsZe5Q

— Mahalaxmi Ramanathan (@MahalaxmiRaman) October 7, 2025

बलुच आर्मीकडून हल्ल्याची जबाबदारी आणि सैनिकांच्या मृत्यूचा दावा

जाफर एक्सप्रेसवरील या दहशतवादी हल्ल्यानंतर बलुच रिपब्लिकन गार्ड्सने एका निवेदनाद्वारे या हल्ल्याची जबाबदारी स्वीकारली आहे. त्यांनी म्हटले आहे की:

"आज, बलुच रिपब्लिकन गार्ड्सच्या स्वातंत्र्यसैनिकांनी सुलतान कोट येथे जाफर एक्सप्रेसवर आयईडी स्फोट घडवून आणला. पाकिस्तानी सैनिक ट्रेनमध्ये प्रवास करत असतानाच हा स्फोट घडवण्यात आला. यात अनेक पाकिस्तानी सैनिकांचा मृत्यू झाला असून, बरेच जण जखमी झाले आहेत."

बलुच लिबरेशन आर्मीने (Baloch Liberation Army - BLA) या हल्ल्याची जबाबदारी घेत, भविष्यात स्वातंत्र्यासाठी अशा आणखी कारवाया करणार असल्याचे स्पष्ट केले आहे.

याच वर्षी जाफर एक्सप्रेसवर झालेला हा तिसरा मोठा हल्ला

चिंतेची बाब म्हणजे, जाफर एक्सप्रेसवर या वर्षात झालेला हा तिसरा मोठा दहशतवादी हल्ला आहे. यापूर्वीही या रेल्वेला लक्ष्य करण्यात आले होते.

११ मार्च २०२५

हा सर्वात महत्त्वाचा हल्ला होता, जेव्हा ट्रेनचे अपहरण करण्यात आले होते. या हल्ल्यात सुरक्षा कर्मचाऱ्यांसह २६ जणांचा मृत्यू झाला होता. तथापि, सुरक्षा दलांनी नंतर त्वरित प्रत्युत्तर देत ३३ दहशतवादी मारले आणि ३५४ अपहरणकर्त्यांना सुखरूप वाचवले होते.

१० ऑगस्ट २०२५

मस्तुंग येथे आयईडी बॉम्बच्या स्फोटामुळे जाफर एक्सप्रेसचे सहा डबे रुळावरून घसरले होते. या घटनेत चार जण जखमी झाले होते.

जून २०२५

सिंधमधील जेकबाबाद जिल्ह्यात झालेल्या स्फोटात जाफर एक्सप्रेसचे चार डबे रुळावरून घसरले होते. सुदैवाने, या घटनेत कोणीही गंभीर जखमी झाले नव्हते.

या वारंवार होणाऱ्या हल्ल्यांमुळे पाकिस्तानमधील रेल्वे वाहतुकीच्या सुरक्षेवर मोठे प्रश्नचिन्ह उभे राहिले आहे. बलुच संघटना सातत्याने पाकिस्तानी सैन्यांना लक्ष्य करत असल्याने, या भागात अशांतता आणि तणाव वाढला आहे.