Video : पाकिस्तानच्या पंतप्रधानांचं भारताविरोधातील 'ते' वक्तव्य होतंय ट्रोल; युजर्स घेताहेत मज्जा

पाकिस्तानचे पंतप्रधान शाहबाज शरीफ यांनी भारताविरोधात केलेल्या एका वक्तव्याने पुन्हा वादात सापडले आहेत. पाकिस्तान आर्थिक आणि विकासाच्या बाबतीत जर भारतापेक्षा मागे पडला, तर आपले नाव शाहबाज शरीफ नाही, हे त्यांचं वक्तव्य सध्या सोशल मीडियावरही ट्रोल केलं जात आहे.

नेमकं काय म्हणाले शरीफ?

पंतप्रधान शाहबाज शरीफ हे पाकिस्तानच्या पंजाब प्रांतातील डेरा गाजीखान येथे एका सभेत बोलत होते. भाषणादरम्यान ते अति उत्साहीत दिसले. पाकिस्तानच्या समस्या सोडवण्यासाठी सरकारच्या प्रयत्नांबद्दल त्यांनी सुरुवातीला सांगितले. त्यानंतर त्यांनी आपले सरकार पाकिस्तानची स्थिती सुधारण्यासाठी दिवसरात्र काम करत असल्याचाही उल्लेख केला. या विधानानंतर मात्र त्यांची जीभ घसरली व ते भारताविरोधात बरळले.

'हेच' विधान होतंय ट्रोल

भाषणादरम्यान अति उत्साही झालेले शरिफ पुढे म्हणाले, की "आमच्या प्रयत्नांमुळे पाकिस्तान भारतापेक्षा पुढे जाईल. जर तो भारतापेक्षा मागे राहिला, तर माझे नाव शाहबाज शरीफ राहणार नाही." पाकिस्तानला अधिक उंचीवर नेण्यासाठी ते आपली सर्व शक्ती पणाला लावतील, असे आश्वासन त्यांनी दिले. सोबतच भारताला पराभूत करण्याचे आश्वासनही त्यांनी दिले.

भारताविरोधात ओकली गरळ

भाषणात शाहबाज शरीफ यांनी त्यांचे मोठे भाऊ आणि पाकिस्तानचे माजी पंतप्रधान नवाज शरीफ यांचाही उल्लेख केला. ते म्हणाले की, "मी नवाज शरीफ यांचा चाहता आहे. मी त्यांचा अनुयायी आहे. जोपर्यंत माझ्यात ऊर्जा आणि इच्छा आहे तोपर्यंत आपण एकत्र येऊन पाकिस्तानला महान बनवू आणि भारताला पराभूत करू." शरीफ यांच्या भाषणाची हिच पोस्ट सध्या व्हायरल होत आहे. त्यावर भारतीय चांगलीच मजा घेत आहेत. ट्विटरवर पाकिस्तानच्या पंतप्रधानांची खिल्ली उडवली जात असून त्यांच्यावर टीकाही केली जात आहे.