इराण-इस्रायल संघर्ष भीषण वळणावर; डोनाल्ड ट्रम्प यांचा इशारा : तातडीने तेहरान सोडा !

मध्यपूर्वेत सध्या इराण आणि इस्रायल यांच्यात सुरू असलेला संघर्ष अधिकच तीव्र होत चालला आहे. युद्धजन्य स्थितीमुळे संपूर्ण जागतिक स्तरावर चिंतेचे वातावरण आहे. या पार्श्वभूमीवर अमेरिकेचे माजी राष्ट्राध्यक्ष डोनाल्ड ट्रम्प यांनी एक खळबळजनक वक्तव्य करत नागरिकांना "तातडीने तेहरान शहर रिकामं करा" असा इशारा दिला आहे.

ट्रम्प यांचा कठोर इशारा, 'तेहरान ताबडतोब खाली करा'

डोनाल्ड ट्रम्प यांनी सोशल मीडियावर एक पोस्ट शेअर करत इराणवर कठोर टीका केली. त्यांनी म्हटलं की, "इराणने अणुकरारावर स्वाक्षरी न करण्याचा निर्णय घेतला, हे पूर्णतः अविवेकी पाऊल आहे. हा एक लाजीरवाणा निर्णय आहे आणि त्यामुळे अनेक निष्पाप जीव धोक्यात येतील. इराणकडे अण्वस्त्रं असण्याची परवानगी असता कामा नये. त्यामुळे मी पुन्हा सांगतो, तेहरान शहर तातडीने रिकामं करा."

US President Donald Trump posts, "Iran should have signed the 'deal' I told them to sign. What a shame, and a waste of human life. Simply stated, Iran cannot have a nuclear weapon. I said it over and over again! Everyone should immediately evacuate Tehran!" pic.twitter.com/6CxDGGK9m8

— ANI (@ANI) June 16, 2025

इस्रायलचे जोरदार हल्ले; तेल प्रकल्प आणि गॅस रिफायनरीवर लक्ष्य

इराण-इस्रायल संघर्ष अधिकच उग्र होत चालल्याचं चित्र सध्या समोर येत आहे. इस्रायलने इराणच्या तेल साठवणूक केंद्रे आणि गॅस रिफायनरीसारख्या महत्त्वाच्या स्थळांवर हवाई हल्ले चढवले आहेत. या आक्रमणांमुळे इराणमधील आर्थिक व संरचनात्मक नुकसान मोठ्या प्रमाणावर होत असल्याचं मानलं जातं.

गाझामधील मदत केंद्रावर इस्रायली हल्ला; 38 पॅलेस्टिनी मृत

या पार्श्वभूमीवर एक धक्कादायक घटना घडली आहे. इस्रायली सैन्याने गाझामधील रफाह येथील अन्न वितरण केंद्राजवळ गोळीबार केला. या घटनेत किमान ३८ पॅलेस्टिनी नागरिकांचा मृत्यू झाल्याची माहिती गाझाच्या आरोग्य मंत्रालयाकडून देण्यात आली आहे.

गाझा आरोग्य मंत्रालयाच्या म्हणण्यानुसार, "रोज अन्न घेण्यासाठी येणाऱ्या नागरिकांवर आजपर्यंतचा सर्वात मोठा आणि प्राणघातक हल्ला सोमवारी पहाटे करण्यात आला." या गोळीबारात अनेक नागरिक मृत्युमुखी पडले, तर काहीजण गंभीर जखमी झाले आहेत.

मदत घेणंही जीवावर बेततंय...

गाझा मानवतावादी फाउंडेशनद्वारे अन्न वितरण केंद्रे चालवली जातात. मात्र, इस्रायली लष्कराच्या कडक नियंत्रणामुळे नागरिकांना दररोज जीव धोक्यात घालून मदतीसाठी झोन पार करावे लागतात. या घटनेचा साक्षीदार असलेल्या एका व्यक्तीनं सांगितलं की, "रफाहमधील मदत केंद्रावर पहाटे साडेचारच्या सुमारास इस्रायली सैन्याने गोळीबार केला. त्यामुळे केंद्राजवळ मोठी खळबळ माजली आणि अनेक निष्पाप लोकांचा बळी गेला."

या घटनेवर आंतरराष्ट्रीय माध्यमांमध्ये तीव्र प्रतिक्रिया उमटत असतानाही, इस्रायली लष्कराकडून अधिकृत प्रतिक्रिया देण्यात आलेली नाही. टाइम्स ऑफ इंडियाच्या अहवालानुसार, मृतांपैकी अनेक जण रफाहजवळील केंद्राजवळ जमले होते, तर काही खान युनूसजवळ नवीन केंद्राच्या दिशेने निघाले होते.

गाझामधील संकट गहिरे; 20 लाखांहून अधिक लोक संकटात

गेल्या काही आठवड्यांपासून युद्ध, अन्नटंचाई आणि निर्बंधांमुळे गाझामधील स्थिती गंभीर बनली आहे. मदतीच्या शोधात आलेल्या डझनभर नागरिकांचा मृत्यू झाला आहे, तर शेकडो लोक जखमी झाले आहेत. यामुळे जवळपास 20 लाख पॅलेस्टिनींचं आयुष्य अन्न, पाणी, औषधं आणि सुरक्षेच्या अभावामुळे संकटात आहे.

तणावाचा स्फोट होणार का?

इराण आणि इस्रायलमधील हा संघर्ष आता युद्धाच्या उंबरठ्यावर येऊन ठेपला आहे, असं म्हणणं चुकीचं ठरणार नाही. डोनाल्ड ट्रम्प यांच्या चेतावणीसह इस्रायलचे आक्रमक पवित्रा, गाझातील हल्ले आणि अणुकराराचा वाद हे सगळं मिळून पुढील काही दिवस अत्यंत संवेदनशील ठरू शकतात.