India Tariffs: 'भारताने टॅरिफ कमी करण्यास सहमती दर्शवली'; राष्ट्राध्यक्ष ट्रम्प यांचा मोठा दावा

Donald Trump on India Tariffs : अमेरिकेचे अध्यक्ष डोनाल्ड ट्रम्प यांनी शुक्रवारी दावा केला की भारताने अमेरिकन आयातीवरील कर कमी करण्यास अखेर सहमती दर्शविली आहे. त्यांनी या निर्णयाचे श्रेय त्यांच्या प्रशासनाने अनुचित व्यापार पद्धती उघड करण्याच्या केलेल्या प्रयत्नांना दिले. त्यांनी असा दावा केला की भारताने हे पाऊल उचलले आहे कारण शेवटी कोणीतरी ते उघड करत आहे.

भारतावर परस्पर कर लादण्याच्या घोषणेनंतर काही दिवसांनी ट्रम्प यांचे हे भाष्य आले. अमेरिकेने 2 एप्रिलपासून परस्पर शुल्क लादण्याची घोषणा केली आहे. अमेरिकन व्यवसायांना हानी पोहोचवणाऱ्या व्यापार धोरणांना प्रतिसाद म्हणून आम्ही हे पाऊल उचलल्याचा ट्रम्पचा दावा आहे.

'भारत खूप जास्त दर आकारतो'

ट्रम्प म्हणाले, भारत आमच्याकडून खूप जास्त शुल्क आकारतो. तुम्ही भारतात काहीही विकू शकत नाही. बरं, त्यांनी मान्य केलं आहे. त्यांना आता त्यांचे शुल्क कमी करायचे आहे कारण आता कोणीतरी आले आहे जो त्यांना उघड करत आहे. यापूर्वी, अनेक अहवालांमध्ये असे म्हटले होते की, भारत सरकार अमेरिकेतून आयात होणाऱ्या प्रमुख वस्तूंवरील शुल्क कमी करण्याचा विचार करत आहे, तर अनेक क्षेत्रातील कंपन्या व्यवसाय सातत्य सुनिश्चित करण्यासाठी अमेरिकन भागीदारांशी चर्चा करत आहेत.

कंपन्या टॅरिफवर रणनीती आखत आहेत

द इकॉनॉमिक टाईम्समधील एका वृत्तानुसार, ऑटो पार्ट्स, कंझ्युमर इलेक्ट्रॉनिक्स, दागिने आणि कपड्यांमध्ये व्यवहार करणाऱ्या अनेक भारतीय कंपन्या देखील जोखीम कमी करण्याच्या पद्धतींवर रणनीती आखत आहेत. अमेरिकन संसदेच्या संयुक्त अधिवेशनाला संबोधित करताना ट्रम्प यांनी भारतीय आयातीवर परस्पर शुल्क आकारण्याची मागणी पुन्हा एकदा केली तेव्हा ही चर्चा सुरू झाली.

संसदेच्या संयुक्त अधिवेशनात काय म्हणाले ट्रम्प?

डोनाल्ड ट्रम्प हे अमेरिका संसदेच्या संयुक्त अधिवेशात म्हणाले की, भारत आमच्याकडून 100 टक्क्यांहून अधिक कर आकारतो. आमच्या उत्पादनांवर चीनचा सरासरी कर आमच्यापेक्षा दुप्पट आहे. दक्षिण कोरियाचा सरासरी कर चार पट जास्त आहे. हे मित्र आणि शत्रू दोघेही करत आहेत.

ते पुढे बोलताना म्हणाले की, ही व्यवस्था अमेरिकेसाठी योग्य नाही. हे कधीच घडले नाही. परस्पर शुल्क 2 एप्रिलपासून लागू होतील. ते आपल्यावर कोणताही कर लावतील, आम्ही त्यांच्यावर तोच कर लादू. तर ते म्हणाले की, 1 एप्रिलपासून ते लागू कोणताही कर लागू करणार नाही कारण तो दिवस एप्रिल फूल डे आहे. त्यामुळे 2 एप्रिलपासूनच हा नियम लागू होणार आहे.

अनेक दशकांपासून आम्हाला लुटले गेले, आता चालणार नाही

डोनाल्ड ट्रम्प पुढे बोलताना म्हणाले की, जर व्यापारी भागीदार आम्हाला त्यांच्या बाजारपेठेपासून दूर ठेवण्यासाठी गैर-मौद्रिक शुल्क लादतील, तर आम्ही त्यांना आमच्या बाजारपेठेपासून दूर ठेवण्यासाठी गैर-मौद्रिक शुल्क लादू. ते म्हणाले, आपण अब्जावधी डॉलर्स घेऊ आणि अशा नोकऱ्या निर्माण करू ज्या आपण यापूर्वी कधीही पाहिल्या नसतील. आम्हाला अनेक दशकांपासून प्रत्येक देशाने लुटले आहे आणि आम्ही आता हे होऊ देणार नाही.