india vs US : भारताने रशियासोबत असं कृत्य केलं की अमेरिकेच वाढलं टेन्शन!, काय घडलं नेमकं?

India Joins Russia Zapad 2025 : भारत आणि अमेरिका यांच्यातील संबंध सध्या काहीसे तणावाचे आहेत. विशेषतः रशियाकडून भारताने कच्च्या तेलाची खरेदी सुरू ठेवल्यामुळे अमेरिकेने भारतावर 50 टक्क्यांपर्यंत जकात शुल्क (टॅरिफ) लादले आहे.

अमेरिकेच्या या अन्याय्य धोरणापुढे न झुकता भारताने आपली भूमिका ठाम ठेवली आहे. याच तणावाच्या वातावरणात, भारताने रशियासोबत असा एक निर्णय घेतला आहे, ज्यामुळे अमेरिकेची चिंता आणखी वाढणार आहे.

रशियाच्या 'Zapad-2025' लष्करी सरावात भारताचा सहभाग

रशिया आणि बेलारूसने आयोजित केलेल्या 'Zapad-2025' या मोठ्या लष्करी सरावात भारताने सहभाग घेतला आहे. या सरावामध्ये ६५ भारतीय सैनिक सहभागी झाले होते, अशी माहिती भारतीय संरक्षण मंत्रालयाने दिली.

१२ ते १६ सप्टेंबर या पाच दिवसांच्या कालावधीत हा संयुक्त सराव पार पडला. हा सराव भारत आणि रशिया यांच्यातील जुन्या आणि मजबूत संरक्षण संबंधांचे प्रतीक आहे.

लष्करी सराव आणि पुतिन यांचे निरीक्षण

या सरावामध्ये सुमारे १ लाख सैनिकांनी सहभाग घेतला होता. यात अण्वस्त्र बॉम्बर, युद्धनौका आणि जड तोफखान्यांचा वापर करण्यात आला. रशियाचे राष्ट्रपती व्लादिमीर पुतिन यांनी स्वतः लष्करी गणवेशात या सरावाला भेट दिली.

त्यांनी या मोठ्या प्रमाणावरील सरावाची पाहणी केली आणि संभाव्य धोक्यांना तोंड देण्यासाठी दोन्ही देशांची तयारी मजबूत करण्याची गरज असल्याचे सांगितले. रशिया आणि बेलारूसमधील ४१ प्रशिक्षण स्थळांवर हा सराव पार पडला, ज्यात ३३३ विमाने आणि २४७ नौदल जहाजांचा समावेश होता.

भारताच्या सहभागामुळे अमेरिकेची चिंता वाढली

आज, भारत-अमेरिका संबंधांमध्ये व्यापार आणि इतर मुद्द्यांवरून तणाव असताना, रशियासोबत भारताचा सहभाग विशेष लक्षवेधी ठरला आहे. रशियन वृत्तसंस्था 'TASS' नुसार, भारताच्या या सहभागाचा उद्देश रशियासोबतचे "सहकार्य आणि परस्पर विश्वास" अधिक दृढ करणे हा आहे.

मात्र, तज्ज्ञांच्या मते, भारताच्या या भूमिकेमुळे अमेरिकेची चिंता वाढू शकते. अमेरिका भारताला आशियामध्ये चीनला प्रति-समतोल म्हणून पाहतो. अशा परिस्थितीत, रशियासोबत भारताची वाढती जवळीक अमेरिकेच्या धोरणकर्त्यांसाठी प्रश्न निर्माण करू शकते.

अमेरिकेचाही पहिल्यांदाच सहभाग

या वर्षीच्या 'Zapad-2025' सरावाचे आणखी एक वैशिष्ट्य म्हणजे यामध्ये केवळ भारतच नव्हे, तर इराण, बांगलादेश, बुर्किना फासो आणि कांगो यांसारख्या देशांनीही सहभाग घेतला. पण सर्वात महत्त्वाची गोष्ट म्हणजे, रशियाने युक्रेनवर केलेल्या आक्रमणानंतर पहिल्यांदाच अमेरिकेने रशियाच्या आमंत्रणावरुन या सरावाचे निरीक्षण केले.

हा बदल जागतिक राजकारणात नवीन समीकरणे तयार होत असल्याची चिन्हे दर्शवतो. भारताचा रशियासोबतचा हा लष्करी सराव अमेरिकेला एक स्पष्ट संदेश देतो की भारत आपल्या राष्ट्रीय हितासाठी कोणत्याही देशाच्या दबावाखाली येणार नाही.