मोठी बातमी; ट्रम्प यांचा टॅरिफ निर्णयावर यू-टर्न; भारतासाठी गुड न्यूज! 'या' क्षेत्राला दिलासा!

US president donald trump Halts Tariffs on Generic Drugs : अमेरिकेचे राष्ट्राध्यक्ष डोनाल्ड ट्रम्प यांच्या 'टॅरिफ बॉम्ब' धोरणाने जगभरातील अनेक अर्थव्यवस्थांवर थेट परिणाम केलेला आहे. याचा फटका भारतीय अर्थव्यवस्थेवर झालेला आहे. परंतु, भारताने न झुकण्याची भूमिका घेतल्याने आता अमेरिकेने टॅरिफ धोरणासंदर्भात यू-टर्न घेतला आहे.

भारतासाठी एक अत्यंत आनंदाची आणि दिलासादायक बातमी समोर आली आहे. ट्रम्प प्रशासनाने भारतीय जेनेरिक औषधांवर टॅरिफ लादण्याची आपली योजना सध्यासाठी पुढे ढककली आहे. या निर्णयामुळे अब्जावधी डॉलर्सची उलाढाल असलेल्या भारतीय औषध उद्योगाला मोठा दिलासा मिळालेला आहे.

भारतीय औषध उद्योगाचे अमेरिकेतील महत्त्व

भारताला अनेकदा "जगाची फार्मसी" म्हटले जाते आणि याचे प्रमुख कारण म्हणजे अमेरिकेच्या आरोग्यसेवा क्षेत्रातील भारतीय औषधांचे महत्त्वपूर्ण योगदान. वैद्यकीय डेटा विश्लेषण कंपनी IQVIA च्या अहवालानुसार, अमेरिकेत वापरल्या जाणाऱ्या अंदाजे ४७% जेनेरिक औषधे भारतातून आयात केली जातात. मधुमेह, रक्तदाब, कोलेस्टेरॉल आणि विविध अँटीबायोटिक्स यांसारखी जीवनरक्षक औषधे भारतीय कंपन्यांकडून मोठ्या प्रमाणात अमेरिकेत पाठवली जातात. ही औषधे स्थानिक (अमेरिकेत) उत्पादित औषधांपेक्षा लक्षणीयरीत्या कमी किमतीत उपलब्ध असल्याने, अमेरिकेतील नागरिकांना मोठा दिलासा मिळतो. जर टॅरिफ लादले असते, तर भारतीय औषधे अमेरिकेच्या बाजारात महाग झाली असती आणि त्यांची मागणी कमी होऊन अमेरिकन रुग्णांना अधिक पैसे मोजावे लागले असते.

'यू-टर्न' घेण्यामागील कारण

ट्रम्प प्रशासनाने जेनेरिक औषधे आणि त्यांच्या उत्पादनात वापरल्या जाणाऱ्या कच्च्या मालावर (API) कर लादण्याबाबत चौकशी सुरू केली होती. तथापि, 'द वॉल स्ट्रीट जर्नल' मधील वृत्तानुसार, चौकशीनंतर वाणिज्य विभागाने या योजनेची व्याप्ती कमी करण्याची शिफारस केली.

या 'यू-टर्न'मागे मुख्य कारण म्हणजे, अनेक तज्ञांनी व्यक्त केलेली तीव्र चिंता. तज्ञांच्या मते, जेनेरिक औषधांवर कर लादल्यास याचा थेट फटका अमेरिकन नागरिकांच्या आरोग्यावरील खर्चाला बसला असता. परवडणाऱ्या भारतीय औषधांशिवाय अमेरिकेत औषधांचा तुटवडा निर्माण होऊ शकला असता.

ट्रम्प प्रशासनातील एका गटाला उत्पादन अमेरिकेत परत आणायचे होते, पण दुसऱ्या गटाला असे वाटले की असे पाऊल अमेरिकन जनतेसाठी हानिकारक ठरेल. अखेरीस, अमेरिकेतील जनतेच्या आरोग्य आणि किमतींवर होणारा नकारात्मक परिणाम लक्षात घेऊन प्रशासनाने टॅरिफ योजना स्थगित करण्याचा निर्णय घेतला.

जागतिक व्यापार युद्धात दिलासा

डोनाल्ड ट्रम्प यांच्या नेतृत्वाखाली अमेरिकेने जागतिक टॅरिफ युद्ध सुरू केले. चीनवर लादलेल्या शुल्कामुळे अमेरिकन शेतीत जसे मोठे संकट निर्माण झाले होते, त्याचप्रमाणे भारतावर औषध शुल्क लादले गेले असते, तर अमेरिकेच्या आरोग्यसेवा व्यवस्थेवर मोठा गंभीर परिणाम झाला असता.

भारताचा औषध उद्योग जेनेरिक औषधांमध्ये जागतिक स्तरावर आघाडीवर आहे आणि अमेरिकेची बाजारपेठ ही भारताची सर्वात मोठी निर्यात गंतव्यस्थान आहे. अशा परिस्थितीत, ट्रम्प प्रशासनाने टॅरिफ निर्णयाला स्थगिती देणे, हे दोन्ही देशांच्या व्यापार संबंधांसाठी तसेच अमेरिकेतील कोट्यवधी रुग्णांसाठी अत्यंत स्वागतार्ह पाऊल ठरले आहे.