Who is V Narayanan व्ही नारायणन कोण आहेत?, ISRO चीफपदी का झाली नियुक्ती, वाचा- त्यांची कारकिर्द

V Narayanan appointed as ISRO chief : भारताच्या अंतराळ कार्यक्रमासाठी एक नवीन अध्याय सुरू होणार आहे. व्ही नारायणन यांची इस्त्रोच्या प्रमुखपदी नियुक्ती झाली आहे. एस सोमनाथ यांच्या जागी ते प्रमुख म्हणून काम पाहतील, केंद्र सरकारने त्यांची नियुक्ती केली.एक अनुभवी शास्त्रज्ञ आणि अंतराळ प्रणोदन तज्ञ, 14 जानेवारी 2025 रोजी इस्रोचे प्रमुख म्हणून पदभार स्वीकारतील. ते एस सोमनाथ यांची जागा घेतील आणि ते अवकाश विभागाचे सचिव म्हणूनही काम पाहतील. चला तर जाणून घेऊया, व्ही नारायणन यांची कारकिर्द जाणून घेऊया...!

व्ही नारायणन हे भारतीय अंतराळ संशोधन संस्था (ISRO) चे वरिष्ठ शास्त्रज्ञ आहेत. रॉकेट आणि स्पेसक्राफ्ट प्रोपल्शन क्षेत्रात त्यांना चार दशकांचा व्यापक अनुभव आहे. ते सध्या इस्रोच्या मुख्य केंद्रांपैकी एक असलेल्या लिक्विड प्रोपल्शन सिस्टम्स सेंटर (LPSC) चे संचालक म्हणून कार्यरत आहेत.

व्ही नारायणन यांची निवड का झाली?

प्रारंभ आणि योगदान : 1984 मध्ये ISRO मध्ये सामील झाल्यानंतर, त्यांनी विक्रम साराभाई स्पेस सेंटर (VSSC) मधील साउंडिंग रॉकेट, ASLV (ऑगमेंटेड सॅटेलाइट लॉन्च व्हेईकल) आणि PSLV (ध्रुवीय उपग्रह प्रक्षेपण वाहन) च्या घन प्रणोदन क्षेत्रात महत्त्वाची भूमिका बजावली.

कोणत्या विषयात आहे नैपुण्य : नारायणन हे रॉकेट आणि स्पेस प्रोपल्शन क्षेत्रातील आघाडीचे तज्ञ मानले जातात. प्रक्रिया नियोजन, ॲब्लेटिव्ह नोजल सिस्टीम, कंपोझिट मोटर केस आणि कंपोझिट इग्निटर केस यासारख्या तंत्रज्ञानाच्या विकासात त्यांनी योगदान दिले.

त्यांच्यावर सद्या कोणती जबाबदारी : नारायणन हे LPSC चे संचालक आहेत, ज्याचे मुख्यालय वालियामाला, तिरुवनंतपुरम येथे आहे. केंद्र भारताच्या अंतराळ कार्यक्रमासाठी प्रमुख द्रव प्रणोदन प्रणाली विकसित करते.

नारायणन यांची प्रमुख भूमिका काय असणार आहे?

मंत्रिमंडळाच्या नियुक्ती समितीनुसार, व्ही नारायणन पुढील दोन वर्षांसाठी इस्रोचे प्रमुख आणि अवकाश विभागाचे सचिव म्हणून काम पाहतील. गगनयान आणि चांद्रयान-4 सारख्या भारताच्या महत्त्वाकांक्षी अंतराळ मोहिमांना पुढे नेण्यासाठी ही नियुक्ती महत्त्वाची आहे.

इस्रोच्या भविष्यातील मोहिमा काय आहेत?

गगनयान मिशन : भारताची पहिली मानवी अंतराळ मोहीम.

चांद्रयान-4 मिशन : चंद्रावरील नवीन शोधांचा महत्त्वाकांक्षी प्रकल्प.

स्पेडेक्स (स्पेस डॉकिंग प्रयोग): भारताचे स्वदेशी स्पेस डॉकिंग तंत्रज्ञान, जे फक्त काही देशांकडे आहे.

नारायणन यांच्या नियुक्तीचे महत्त्व

नारायणन यांचे कौशल्य आणि इस्रोमधील त्यांचा प्रचंड अनुभव भारतीय अंतराळ कार्यक्रमाला नवीन उंचीवर नेण्यास मदत करणारा ठरणार आहे. त्यांच्या नेतृत्वाखाली भारत अंतराळ विज्ञान आणि तंत्रज्ञानात स्वावलंबी होऊन जागतिक स्तरावर आपली ओळख आणखी मजबूत करणारी ठरेल, असा विश्वास व्यक्त केला जात आहे.