पाकमधील किराना हिल्सवरील हल्ल्याचं सत्यं काय? खरचं न्युक्लिअर ठिकाणांवर हल्ला झाला?

ऑपरेशन सिंदूरबाबत, लष्कराने सोमवारी पत्रकार परिषदेत सांगितले की, आम्ही पाकिस्तानच्या किराना हिल्स अणुसुविधेवर हल्ला केलेला नाही. सॅटेलाईट इमेजरीमध्ये सरगोधा येथील मुशाफ एअरबेसच्या धावपट्टीवर हल्ला झाल्याचे दिसून आले, ज्याचा संबंध किराना हिल्सखाली असलेल्या भूमिगत अणुभट्टीशी असल्याचे सांगण्यात येत आहे.

यानंतर, पाकिस्तानच्या या अणुस्थळालाही तळांमध्ये घुसणाऱ्या शस्त्रांनी लक्ष्य केल्याचा अंदाज वर्तवला जात होता.

किराना हिल्सवर हल्ला झाला नाही

जेव्हा एअर मार्शल ए.के. भारती यांना विचारण्यात आले की भारताने किराना हिल्सवर हल्ला केला होता का? तर ते म्हणाले, 'किराना हिल्समध्ये काही अणुभट्टी आहे हे सांगितल्याबद्दल धन्यवाद, आम्हाला त्याबद्दल माहिती नव्हती.' आम्ही किराना हिल्सवर हल्ला केलेला नाही, तिथे काहीही असो, किंवा कालच्या ब्रीफिंगमध्ये आमच्याकडून असे काहीही नमूद करण्यात आले नव्हते.

भारतीय सशस्त्र दलांनी पाकिस्तानच्या किराना हिल्स अणुस्थळाला लक्ष्य केलेले नाही, अशी पुष्टी हवाई ऑपरेशन्सचे महासंचालक (डीजीएओ) एअर मार्शल एके भारती यांनी केली आहे. प्रत्युत्तर म्हणून, भारताने पाकिस्तानच्या ११ हवाई तळांना लक्ष्य करून नष्ट केले आहे, ज्यात सरगोधा आणि नूर खान सारख्या महत्त्वाच्या लष्करी तळांचा समावेश आहे.

एके भारती यांनी यावेळी सांगितले की, आमचे सर्व लष्करी तळ, यंत्रणा पूर्णपणे कार्यरत आहेत आणि भविष्यात गरज पडल्यास त्यांच्या पुढील मोहिमेसाठी सज्ज आहेत. ते म्हणाले की, आम्ही दाखवलेल्या फोटोंवरून स्पष्टपणे दिसून येते की ते तुर्की ड्रोन असोत किंवा इतर कुठूनही आलेले ड्रोन असोत, आमची काउंटर-ट्रॉन सिस्टीम पूर्णपणे सक्षम आहे. तसेच, ड्रोनचा सामना करण्यासाठी आमच्या स्वदेशी तंत्रज्ञानाने हे दाखवून दिले आहे की आम्ही कोणत्याही तंत्रज्ञानाचा सामना करू शकतो.

किराना हिल्स का महत्वाच्या आहेत?

किराना हिल्समधील भूमिगत सुविधा सरगोधा एअरबेसपासून सुमारे ८ किमी अंतरावर आहे. सुमारे ७० चौरस किलोमीटर क्षेत्रात पसरलेल्या या सुविधेचा संपूर्ण परिसर पाकिस्तान सरकारने व्यापलेला आहे. हा परिसर कोणत्याही प्रकारच्या धोक्यापासून पूर्णपणे सुरक्षित मानला जात होता. या ठिकाणाशी रस्ते, रेल्वे आणि हवाई वाहतूक थेट जोडलेली आहे.

१९९० च्या सुमारास पाकिस्तानने अणुचाचणीची तयारी केल्याचे अमेरिकन उपग्रहाने टिपले तेव्हा जगाला या ठिकाणाची माहिती मिळाली. तथापि, अमेरिकेच्या आक्षेपानंतर या चाचण्या रद्द करण्यात आल्या. पण तरीही अशी भीती आहे की पाकिस्तानने आपली अण्वस्त्रे येथे लपवली आहेत.

लष्कराने काल फोटो प्रसिद्ध केले

रविवारी झालेल्या संयुक्त पत्रकार परिषदेत, लष्कराने पाकिस्तानमधील अनेक ठिकाणी हवाई संरक्षण रडार, हवाई तळ आणि इतर लष्करी प्रतिष्ठानांना झालेल्या नुकसानाचे फोटो दाखवले. एअर मार्शल भारती यांनी पुष्टी केली होती की ऑपरेशन दरम्यान पसरूर, चुनियान आणि आरिफवाला येथील हवाई संरक्षण रडार नष्ट झाले होते.

ऑपरेशन सिंदूर अंतर्गत भारतीय हवाई दलाने (IAF) ११ पाकिस्तानी लष्करी आस्थापनांवर अचूक हल्ले केले, त्यानंतर उपग्रह प्रतिमांवरून पायाभूत सुविधा आणि जमिनीचे मोठ्या प्रमाणात नुकसान झाल्याची पुष्टी झाली आहे. यामध्ये रफीकी, मुरीदके, चकलाला, रहीम यार खान, सकर, चुनियान, पसरूर आणि सियालकोट येथील रडार केंद्रे, कमांड अँड कंट्रोल सेंटर आणि दारूगोळा डेपो यांचा समावेश होता.