VIDEO : नशेत महिलेने रेल्वे ट्रॅकवर पळवली कार, पोलिसांची तारांबळ; 15 गाड्यांचे मार्ग वळवले

तेलंगणामधील रंगा रेड्डी जिल्ह्यात रविवारी एक खळबळजनक घटना समोर आली आहे. उत्तर प्रदेशातील 34 वर्षीय महिलेनं नशेच्या अवस्थेत थेट आपली कार रेल्वे ट्रॅकवर चालवत नेली. ही घटना शंकरपल्ली परिसरात घडली असून, त्यामुळे किमान 15 रेल्वेगाड्यांचे मार्ग तातडीने वळवावे लागले. संबंधित महिलेची अटक करण्यात आली असून, तिची मानसिक स्थिती अस्थिर असल्याचा संशय पोलिसांनी व्यक्त केला आहे.

व्हायरल व्हिडिओत ती महिला Kia Sonet कार चालवत थेट रेल्वे ट्रॅकवर घुसताना दिसत आहे. दुसऱ्या एका व्हिडिओमध्ये स्थानिक नागरिक, रेल्वे कर्मचारी आणि पोलीस या गोंधळलेल्या महिलेला गाडीतून बाहेर काढण्याचा प्रयत्न करताना दिसत आहेत. तिसऱ्या क्लिपमध्ये तिचे दोन्ही हात बांधलेले दिसतात आणि ती हिंदीत जोरजोराने ओरडत आहे, "मेरे हाथ खोलो!"

या प्रकारामुळे काही काळासाठी रेल्वे वाहतूक विस्कळीत झाली. बंगळुरू-हैदराबाद एक्सप्रेससह किमान 10 ते 15 गाड्यांचे मार्ग बदलण्यात आले. सोशल मीडियावर व्हिडिओ व्हायरल झाल्यानंतर 'रेल्वे सेवा' अधिकाऱ्यांनी संबंधित युजरकडून माहिती मागवली आहे, जेणेकरून तात्काळ कारवाई करता येईल.

रेल्वे पोलीस दलाच्या अधीक्षक चंदना दीप्ती यांनी माध्यमांना दिलेल्या माहितीनुसार, "प्राथमिक तपासात ही महिला उत्तर प्रदेशातील असून, अलीकडेपर्यंत ती एका बहुराष्ट्रीय कंपनीमध्ये नोकरी करत होती. तिच्या कारमधून आम्हाला तिचे ड्रायव्हिंग लायसन्स आणि पॅन कार्ड सापडले आहेत. मानसिक अस्थैर्याच्या पार्श्वभूमीवर तिने आत्महत्येचा प्रयत्न केला असावा, आणि तो अपघात म्हणून सादर करायचा प्रयत्न केल्याची शक्यता आम्ही तपासत आहोत."

Please Take immediate action. Someone is driving a car on railway track between Lingampally and vikarabad junction @RPF_INDIA @SCRailwayIndia @AshwiniVaishnaw @RailwaySeva pic.twitter.com/U30UEcCtUF

— శిరీష్ (@Shireesh__) June 26, 2025

स्थानिक नागरिकांच्या मदतीने महिलेच्या वाहनाला थांबवण्यात आले. या वेळी ट्रॅकवरील तांत्रिक पथकही घटनास्थळी दाखल झाले. काही वेळासाठी ट्रॅकवरची संपूर्ण वाहतूक थांबवण्यात आली होती. रेल्वे अधिकाऱ्यांनी खबरदारीचा उपाय म्हणून गाड्यांचे मार्ग तात्पुरते वळवले.

या घटनेनंतर रेल्वे ट्रॅकवरील सुरक्षेचा प्रश्न पुन्हा ऐरणीवर आला आहे. रेल्वे प्रशासनाकडून या घटनेची सखोल चौकशी सुरू असून, महिलेवर संबंधित कलमांखाली गुन्हा दाखल करण्यात आला आहे.

दरम्यान, यापूर्वी 2023 मध्ये केरळमधील कन्नूर येथेही अशीच घटना घडली होती. तेव्हा 49 वर्षीय एका व्यक्तीनं नशेत 15 मीटरपर्यंत कार रेल्वे ट्रॅकवर चालवली होती. तसेच राजस्थानमध्ये नुकताच 21 वर्षीय तरुणाला रेल्वे ट्रॅकवर धोकादायक स्टंट करताना व्हिडिओ शूट केल्याप्रकरणी अटक करण्यात आली होती.

रेल्वे ट्रॅकवर वाहन चालवणे केवळ बेकायदेशीर नाही, तर शेकडो प्रवाशांच्या जीवाशी खेळणारे आहे. त्यामुळे अशा गंभीर घटनांकडे केवळ सोशल मीडियाच्या माध्यमातून नव्हे, तर कायदेशीर पातळीवरही कठोर पावले उचलण्याची गरज व्यक्त होत आहे.