थलापती विजयने सगळा गेमचं पलटवला ! विजय तब्बल एवढ्या जागांवर आघाडीवर

तामिळनाडू विधानसभा निवडणुकीच्या सुरुवातीच्या कलानं संपूर्ण राज्याला हादरवून सोडलं आहे. सुपरस्टार विजय याच्या 'तमिळगा वेट्टरी कझगम' (TVK) या पक्षाने राजकारणात अनपेक्षित मुसंडी मारत प्रस्थापित सत्ताधाऱ्यांसमोर मोठे आव्हान उभे केले आहे. सुरुवातीच्या ट्रेंडमध्ये विजयचा पक्ष तब्बल ८४ जागांवर आघाडीवर असून, तामिळनाडूच्या राजकारणात एका नव्या इतिहासाची पुनरावृत्ती होताना दिसत आहे.

राजकीय समीकरणे आणि कल

तामिळनाडूमध्ये सत्ता स्थापनेसाठी ११८ या जादूई आकड्याची आवश्यकता आहे. सध्याच्या कलानुसार, मुख्यमंत्री एम.के. स्टॅलिन यांच्या नेतृत्वाखालील DMK आणि काँग्रेस युती (SPA) फक्त ५४ जागांवर आघाडीवर आहे. दुसरीकडे, AIADMK आणि भाजप युती (NDA) ६० जागांवर पुढे आहे. मात्र, या दोन्ही मोठ्या आघाड्यांना मागे टाकत थलापती विजयच्या टीव्हीके पक्षाने ७३ पेक्षा जास्त जागांवर आपली दमदार उपस्थिती नोंदवली आहे.

द्विध्रुवीय राजकारणाला सुरुंग

२३ एप्रिल २०२६ रोजी तामिळनाडूच्या सर्व २३४ जागांवर एकाच टप्प्यात मतदान पार पडले. गेल्या अनेक दशकांपासून तामिळनाडूत केवळ DMK आणि AIADMK यांच्यातच सत्तेची लढत होत असे. मात्र, या निवडणुकीत विजय यांच्या एन्ट्रीने या 'द्विध्रुवीय' राजकारणाचे समीकरण पूर्णपणे बदलले आहे. विजय यांनी सर्व २३४ जागांवर आपले उमेदवार उभे केले होते, ज्याचा मोठा फटका प्रस्थापित पक्षांना बसताना दिसत आहे.

मैदानातले दिग्गज चेहरे

या निवडणुकीत अनेक बड्या नेत्यांची प्रतिष्ठा पणाला लागली आहे. मुख्यमंत्री एम.के. स्टॅलिन कोलाथूर मतदारसंघातून निवडणूक लढवत आहेत, तर त्यांचे चिरंजीव उदयनिधी स्टॅलिन चेपॉक-तिरुवल्लिकेनी मधून रिंगणात आहेत. माजी मुख्यमंत्री एडप्पादी के. पलानीस्वामी (EPS) आपल्या एडप्पादी बालेकिल्ल्यातून लढत आहेत. स्वतः विजय यांनी तिरुचिरापल्ली ईस्ट आणि पेरम्बूर अशा दोन जागांवरून निवडणूक लढवली आहे. याशिवाय भाजपचे प्रदेशाध्यक्ष के. अन्नामलाई आणि एनटीकेचे सीमन यांच्या कामगिरीकडेही सर्वांचे लक्ष आहे.

एक्झिट पोल आणि विजयचा 'फॅक्टर'

निवडणुकीपूर्वी आलेल्या एक्झिट पोलमध्ये संमिश्र अंदाज वर्तवण्यात आले होते. 'Axis My India' ने विजयच्या पक्षाला ९८-१२० जागा मिळतील आणि तो सर्वात मोठा पक्ष ठरेल, असा अंदाज वर्तवला होता, जो आताच्या कलानुसार खरा ठरताना दिसत आहे. या उलट काही पोल्सनी स्टॅलिन यांच्या पुनरागमनाचा अंदाज दिला होता.

'रिसॉर्ट पॉलिटिक्स'ची तयारी

विजयाच्या पक्षाला तरुण पिढी आणि पहिल्यांदा मतदान करणाऱ्या मतदारांनी मोठा पाठिंबा दिला आहे. निकालाचे कल स्पष्ट होत असतानाच आता घोडेबाजार आणि 'रिसॉर्ट पॉलिटिक्स'ची चर्चाही सुरू झाली आहे. संभाव्य फोडाफोडी टाळण्यासाठी 'टीव्हीके'ने महाबलीपुरम जवळील एक खासगी रिसॉर्ट आधीच बुक केले असून, आपल्या विजयी उमेदवारांना तिथे सुरक्षित ठेवण्याची योजना आखली आहे.