इंजिन बिघडलं की आणखी काही? अहमदाबादमध्ये एअर इंडियाचं विमान कसं क्रॅश झालं?

गुजरातच्या अहमदाबाद शहरात आज सकाळी भीषण विमान दुर्घटना घडली. एअर इंडियाचं बी787 ड्रीमलायनर प्रकारचं प्रवासी विमान (VT-ANB), जे अहमदाबादहून लंडनच्या गॅटविक विमानतळाकडे निघालं होतं, ते उड्डाणानंतर काही मिनिटांतच मेघानीनगर परिसरात कोसळलं.

या विमानात एकूण 242 प्रवासी होते - ज्यामध्ये 2 वैमानिक, 10 केबिन क्रू आणि 230 प्रवासी असल्याची माहिती आहे. या दुर्घटनेत सर्वजण मृत्युमुखी पडल्याची भीती व्यक्त करण्यात येत आहे.

इंजिन बिघाड की इमारतीला धडक? संभाव्य कारणांचा शोध

विमान कोसळण्यामागचं नेमकं कारण अद्याप स्पष्ट झालेलं नसून दोन प्रमुख शक्यता चर्चेत आहेत. काही प्राथमिक अहवालांनुसार, टेकऑफनंतर पाचव्या मिनिटाला इंजिनमध्ये तांत्रिक बिघाड झाल्याचा अंदाज व्यक्त करण्यात येत आहे.

तर काही प्रत्यक्षदर्शींनी सांगितलं की, विमानाने शहरातील एका रहिवासी इमारतीला धडक दिली, ज्यामुळे प्रचंड स्फोट झाला आणि संपूर्ण विमान जळून खाक झालं.

काळ्या धुराचे लोट आणि आगीचा तांडव

अपघाताच्या ठिकाणी आगीच्या ज्वाळा आणि काळ्या धुराचे लोट मोठ्या प्रमाणावर आकाशात उठताना दिसले. धारपूर परिसरातूनही ही दृश्यं स्पष्टपणे पाहता आली. विमान ज्या इमारतीवर कोसळलं, ती इमारतही मोठ्या प्रमाणात ध्वस्त झाली आहे. अपघातानंतर तातडीने अग्निशमन दलाच्या 7 गाड्या, पोलीस आणि एनडीआरएफच्या पथकांनी घटनास्थळी धाव घेतली. सध्या मदत आणि बचावकार्य युद्धपातळीवर सुरू आहे.

पायलट आणि तांत्रिक माहिती

हे विमान कॅप्टन सुमित सभरवाल यांच्या नेतृत्वाखाली उड्डाण करत होतं, ज्यांना 8200 तासांचा अनुभव आहे. त्यांच्या सहकारी फर्स्ट ऑफिसर क्लाइव्ह कुंदर यांच्याकडे 1100 तासांचा अनुभव होता.

दोघेही या दुर्घटनेत मृत्युमुखी पडल्याची भीती आहे. एटीसीच्या माहितीनुसार, विमान धावपट्टी क्रमांक 23 वरून 1.39 वाजता (IST) टेकऑफ झालं. काही वेळाने मेडे कॉल दिला गेला, मात्र त्यानंतर कोणताही संवाद झाला नाही. विमान थेट मेघानीनगरच्या सीमेजवळ जमिनीवर आदळलं.

रुग्णालयात आपत्कालीन व्यवस्था, शहरात भीतीचं वातावरण

विमानतळाजवळील सिव्हिल हॉस्पिटलमध्ये तात्काळ सर्व डॉक्टरांच्या रजा रद्द करण्यात आल्या आहेत. जखमी आणि मृतदेहांची ओळख पटवण्यासाठी वैद्यकीय व पोलिस प्रशासन सज्ज आहे. अपघातामुळे संपूर्ण शहरात भीतीचं वातावरण निर्माण झालं असून, नागरिकांमध्ये मोठा संभ्रम आणि असुरक्षिततेची भावना आहे.

सोशल मीडियावर अपघाताचे व्हिडिओ व्हायरल

या अपघातानंतर काही मिनिटांतच सोशल मीडियावर दुर्घटनेचे अनेक व्हिडिओ व्हायरल झाले आहेत. त्यामध्ये विमानाच्या अपघातानंतर उठणारा काळा धूर, जळालेली इमारत आणि आगीचे भयावह दृश्य स्पष्ट दिसत आहेत.

सरकारी तपास आणि एअर इंडियाचा निवेदन अपेक्षित

सध्या एअर इंडिया आणि नागरी विमान मंत्रालयाने घटनास्थळावर तपासणी सुरू केली आहे. अपघाताची सखोल चौकशी करण्यात येणार असून, ब्लॅक बॉक्स शोधण्याचे प्रयत्न सुरू आहेत. एअर इंडियाकडून लवकरच अधिकृत निवेदन जाहीर होणार आहे.