लॉ कॉलेजच्या क्लासमध्ये युवतीची गोळी झाडून हत्या अन् युवकाची आत्महत्या;हृदयाचा थरकाप उडवणारा Video

Punjab Law College Student Murder Suicide Video : पंजाबमधील तरनतारन जिल्ह्यातून एक अत्यंत धक्कादायक आणि थरकाप उडवणारी घटना समोर आली आहे. एका विधी महाविद्यालयाच्या (Law College) भर वर्गात एका विद्यार्थ्याने आपल्याच सहकाऱ्याची गोळी झाडून हत्या केली आणि त्यानंतर स्वतःवरही गोळी झाडून जीवनयात्रा संपवली. या घटनेमुळे संपूर्ण शैक्षणिक वर्तुळात आणि परिसरात दहशतीचे वातावरण पसरले आहे.

नेमकं काय घडलं? (सीसीटीव्ही फुटेजचा थरार)

ही घटना सोमवारी सकाळी ९ वाजेच्या सुमारास घडली. कॉलेजमध्ये वर्गाचे कामकाज सुरू होण्यापूर्वी सर्व विद्यार्थी वर्गात जमा होत होते. सीसीटीव्ही फुटेजमधून समोर आलेल्या माहितीनुसार, संदीप कौर (२०) ही विधी शाखेच्या प्रथम वर्षाची विद्यार्थिनी आपल्या मैत्रिणीसोबत बाकावर बसली होती.

#BREAKING A young man shot dead a student of Law College in Usma village of Tarn Taran and then committed suicide by shooting himself
woman has been identified as Sandeep Kaur, and the man as Prince Raj, a resident of Mallian village in Tarn Taran.#PunjabPolice #Tarntaran pic.twitter.com/XReXMWWRul

— Ravi Pandey🇮🇳 (@ravipandey2643) February 9, 2026

त्याचवेळी आरोपी विद्यार्थी प्रिन्स राज सिंग वर्गात आला. त्याने सरळ संदीपजवळ जाऊन तिच्याशी काही वेळ वाद घातला. वाद वाढत असतानाच प्रिन्सने अचानक पिस्तूल काढले आणि संदीपच्या डोक्यात गोळी झाडली. गोळी लागताच संदीप रक्ताच्या थारोळ्यात जमिनीवर कोसळली. संदीपचा मृत्यू झाल्याचे पाहताच, क्षणाचाही विलंब न लावता प्रिन्सने पिस्तूल पुन्हा लोड केले आणि स्वतःच्या डोक्यात गोळी झाडून घेतली. दोघांचाही जागीच मृत्यू झाला असून, वर्गातील इतर विद्यार्थी या घटनेने पूर्णपणे हादरून गेले आहेत.

हत्येचे कारण: एकतर्फी प्रेम?

पोलिसांनी दिलेल्या प्राथमिक माहितीनुसार, ही घटना एकतर्फी प्रेमातून घडल्याचा संशय आहे. अशी चर्चा आहे की, ८ फेब्रुवारी रोजी व्हॅलेंटाईन डेच्या पार्श्वभूमीवर प्रिन्सने संदीपला प्रपोज केले होते. मात्र, संदीपने त्याचा प्रस्ताव फेटाळून लावला होता. याच रागातून प्रिन्सने हे टोकाचे पाऊल उचलल्याचे पोलीस तपासात समोर येत आहे.

कुटुंबाचा आरोप आणि आक्रोश

मृत संदीप कौरच्या घरी आई, सहा बहिणी आणि एक लहान भाऊ असा परिवार आहे. तिचे वडील हयात नाहीत. संदीपच्या आईने, हरजिंदर कौर यांनी कॉलेज व्यवस्थापनावर गंभीर आरोप केले आहेत. त्या म्हणाल्या की, "मला फोनवर सांगण्यात आले की मुलीचे किरकोळ भांडण झाले असून ती जखमी आहे. पण जेव्हा मी कॉलेजमध्ये पोहोचले, तेव्हा माझ्या मुलीचा मृतदेह रक्ताने माखलेला होता. कॉलेजमध्ये कोणतीही सुरक्षा नाही, कुणीही पिस्तूल घेऊन वर्गात कसे येऊ शकते?"

प्रशासकीय आणि पोलीस तपास

घटनेची माहिती मिळताच पोलिसांनी महाविद्यालय सील केले असून एसीपी जगबीर यांनी तपासाची चक्रे फिरवली आहेत.

शस्त्राचा पुरवठा: आरोपी प्रिन्स राजकडे पिस्तूल कुठून आले? त्याच्या वडिलांकडे परवानाधारक शस्त्र आहे का किंवा त्याने बेकायदेशीररीत्या ते मिळवले होते का, याचा शोध सुरू आहे.

सुरक्षेतील त्रुटी: महाविद्यालयाच्या प्रवेशद्वारावर विद्यार्थ्यांची तपासणी का केली जात नव्हती? कॉलेज प्रशासनाकडून झालेल्या हलगर्जीपणाबाबत पालकांनी कारवाईची मागणी केली आहे.

कायदेशीर कारवाई : पोलिसांनी याप्रकरणी खुनाचा गुन्हा दाखल केला असून पुढील चौकशी सुरू आहे.