ओम बिर्ला यांची लोकसभेच्या अध्यक्षपदी निवड, नरेंद्र मोदी, राहुल गांधींनी आसनापर्यंत पोहोचवलं

नवी दिल्ली: भाजप खासदार आणि राष्ट्रीय लोकशाही आघाडीचे (एनडीए) उमेदवार ओम बिर्ला यांची लोकसभेच्या अध्यक्षपदी आवाजी मतदानाने निवड झाली. पंतप्रधान नरेंद्र मोदी यांनी त्यांच्या नावाचा प्रस्ताव मांडला. केंद्रीय मंत्री अमित शहा, राजनाथ सिंह यांच्यासह अनेक दिग्गजांनी या प्रस्तावाला पाठिंबा दिला.

विरोधी पक्षाकडून के. सुरेश यांच्या नावाचा प्रस्ताव होता. यानंतर हंगामी अध्यक्ष भर्तृहरि महताब यांनी सभागृहाचे कामकाज पुढे नेले आणि सर्वांसमोर प्रस्ताव मांडला. आवाजी मतदानाच्या आधारे त्यांनी ओम बिर्ला यांना लोकसभा अध्यक्षपदाची जबाबदारी स्वीकारण्याचे निमंत्रण दिले.

Photo Credit: Sansad TV

यावेळी विशेष बाब म्हणजे पंतप्रधान नरेंद्र मोदी आणि संसदीय कामकाज मंत्री किरेन रिजिजू यांच्यासोबत विरोधी पक्षनेते राहुल गांधी देखील ओम बिर्ला यांना आसनापर्यंत पोहोचण्यासाठी आले होते. इंडिया आघाडीने काल रात्री झालेल्या बैठकीनंतर राहुल यांना विरोधी पक्षनेते म्हणून घोषित केले आहे.

ओम बिर्ला हे सर्वात सक्रिय खासदार होते आणि ते अध्यक्ष म्हणून कठोर निर्णय घेण्यासाठी देखील ओळखले जात होते. राजस्थानमधील कोटा येथून तीन वेळा खासदार राहिलेले ओम बिर्ला हे राजस्थानमध्ये तीन वेळा आमदारही राहिले आहेत. ते भारतीय जनता युवा मोर्चाचे राष्ट्रीय उपाध्यक्ष देखील होते.

Photo Credit: Sansad TV

खासदार म्हणून पहिल्या कार्यकाळात त्यांनी 86 टक्के उपस्थितीसह 671 प्रश्न आणि 163 वादविवादात भाग घेतला. 2019 मध्ये दुसऱ्यांदा खासदार झाल्यानंतर त्यांना लोकसभेचे अध्यक्ष बनवण्यात आले.

ओम बिर्ला यांच्या कार्यकाळात नवीन संसद भवन बांधण्यात आले. तीन फौजदारी कायदे, कलम 370 हटवणे, नागरिकत्व सुधारणा कायदा यासह अनेक ऐतिहासिक कायदेही मंजूर करण्यात आले. त्यांनी 100 लोकसभा खासदारांचे निलंबन आणि संसदेच्या सुरक्षेबाबत काही कठोर निर्णय घेतले.

बिर्ला यांच्या नावावर या विक्रमाची नोंद

एक लोकसभा अध्यक्ष एकापेक्षा जास्त कालावधीसाठी हे पद सांभाळेल असे पाचव्यांदा घडत आहे. काँग्रेस नेते बलराम जाखड हे एकमेव पीठासीन अधिकारी आहेत ज्यांनी सातव्या आणि आठव्या लोकसभेत दोन वेळा काम केले आहे.

#WATCH | BJP MP Om Birla occupies the Chair of Lok Sabha Speaker after being elected as the Speaker of the 18th Lok Sabha.

Prime Minister Narendra Modi, LoP Rahul Gandhi and Parliamentary Affairs Minister Kiren Rijiju accompany him to the Chair. pic.twitter.com/zVU0G4yl0d

— ANI (@ANI) June 26, 2024

काँग्रेसने मंगळवारी रात्री राहुल गांधी यांची लोकसभेतील विरोधी पक्षनेतेपदी निवड केली. काँग्रेसला 16 व्या लोकसभेत 44 तर 17 व्या लोकसभेत 52 खासदार मिळाले. यावेळी पक्षाचे 99 खासदार विजयी झाले आहेत.

मात्र, राहुल गांधींनी वायनाडची जागा सोडल्यामुळे ही संख्या 98 वर आली आहे. असे असतानाही विरोधी पक्षनेतेपद मिळण्यासाठी ते पुरेसे आहे.