NEET PG 2025चा निकाल जाहीर, स्कोअरकार्ड कसे डाऊनलोड करायचे, जाणून घ्या पुढील प्रोसेस काय?

NEET PG 2025 Result : वैद्यकीय क्षेत्रात करिअर करू इच्छिणाऱ्या विद्यार्थ्यांसाठी एक महत्त्वाची बातमी आहे. नॅशनल बोर्ड ऑफ एक्झामिनेशन इन मेडिकल सायन्सेस (NBEMS) ने NEET PG 2025 चा निकाल जाहीर केला आहे. ज्या उमेदवारांनी ही परीक्षा दिली होती, ते आता NBEMS च्या अधिकृत वेबसाइट natboard.edu.in वर जाऊन आपला निकाल तपासू शकतात.

स्कोअरकार्ड डाउनलोड करण्याची प्रक्रिया

NBEMS ने दिलेल्या माहितीनुसार, निकाल जाहीर झाला असला तरी, वैयक्तिक स्कोअरकार्ड 29 ऑगस्टपासून उपलब्ध होतील. हे स्कोअरकार्ड फक्त 6 महिन्यांसाठी वैध असतील, त्यामुळे उमेदवारांना भविष्यातील प्रवेश प्रक्रियेसाठी ते वेळेवर डाउनलोड करून घ्यावे लागतील.

परीक्षा कधी व कशी झाली?

• परीक्षा कधी: NEET PG 2025 ची परीक्षा ३ ऑगस्ट रोजी घेण्यात आली होती.
• शिफ्ट: सर्वोच्च न्यायालयाच्या आदेशानुसार ही परीक्षा फक्त एकाच शिफ्टमध्ये, सकाळी ९ ते दुपारी १२:३० या वेळेत घेण्यात आली.
• उमेदवार संख्या: देशभरातून २.४२ लाखांहून अधिक विद्यार्थ्यांनी ही परीक्षा दिली.
• उद्देश: या परीक्षेचा मुख्य उद्देश शैक्षणिक वर्ष २०२५-२६ साठी एमडी, एमएस, डीएनबी, डीएनआरबी आणि पीजी मेडिकल डिप्लोमा अभ्यासक्रमांमध्ये प्रवेश देणे हा आहे.

मूल्यांकन प्रक्रिया घ्या जाणून!

NBEMS ने स्पष्ट केले आहे की, परीक्षेतील प्रत्येक प्रश्नाचे तज्ज्ञ प्राध्यापकांनी पुनरावलोकन केले. यात कोणताही तांत्रिकदृष्ट्या चुकीचा प्रश्न आढळला नाही. त्यामुळे सर्व प्रश्नांचे मूल्यांकन योग्य मानले गेले.

या वर्षी परीक्षा फक्त एकाच शिफ्टमध्ये झाल्याने 'सामान्यीकरण' (normalization) प्रक्रिया लागू करण्यात आलेली नाही. त्यामुळे, सर्व उमेदवारांचे मूल्यांकन एकाच आधारावर करण्यात आले आहे.

निकाल कसा चेक करावा?

उमेदवार खालील सोप्या पद्धती वापरून आपला निकाल तपासू शकतात:

• प्रथम NBEMS च्या अधिकृत वेबसाइट nbe.edu.in वर जा.
• 'NEET PG' टॅबवर क्लिक करा.
• आता 'निकालाची लिंक' दिसेल, त्यावर क्लिक करा.
• निकालाची पीडीएफ फाइल तुमच्या समोर उघडेल.
• त्यामध्ये तुमचा अर्ज क्रमांक शोधून तुमचा निकाल तपासा.
• भविष्यातील संदर्भासाठी निकाल डाउनलोड करून सेव्ह करा.