'नमो भारत रॅपिड रेल'चा संपूर्ण कॉरिडॉर सज्ज; जाणून घ्या रेल्वे मार्ग, वेग, भाडे आणि त्यातील सुविधा!

दिल्ली आणि मेरठमधील प्रवासाचे अंतर आता तासांऐवजी मिनिटांवर आले आहे. पंतप्रधान नरेंद्र मोदी यांच्या हस्ते दिल्ली-मेरठ आरआरटीएस (RRTS) कॉरिडॉरच्या संपूर्ण भागाचे लोकार्पण करण्यात येणार असून, २२ फेब्रुवारी रोजी संध्याकाळी ६ वाजता 'नमो भारत रॅपिड रेल' सर्वसामान्यांच्या सेवेत दाखल होणार आहे. सराय काले खान ते मोदीपुरम हा 80 किमीचा प्रवास आता अवघ्या 55 मिनिटांत पूर्ण होणार आहे.

भारताची पहिली प्रादेशिक रॅपिड ट्रान्झिट सिस्टम (RRTS)

नमो भारत ही देशातील पहिलीच अशी रेल्वे सेवा आहे जी मेट्रो आणि भारतीय रेल्वे यांच्यातील दुवा म्हणून काम करेल. १८० किमी प्रति तास या सर्वोच्च वेगासाठी डिझाइन केलेली ही ट्रेन प्रवाशांना जागतिक दर्जाचा अनुभव देणार आहे.

प्रकल्पाचे वैशिष्ट्य आणि आधुनिक पायाभूत सुविधा

लांबी आणि खर्च : ८२.१५ किमी लांबीच्या या कॉरिडॉरमध्ये ७० किमी एलिव्हेटेड आणि १२ किमी भूमिगत ट्रॅक आहे. यासाठी अंदाजे ₹३०,२७४ कोटी खर्च करण्यात आले आहेत.

मल्टी-मोडल हब : सराय काले खान स्थानक हे एकात्मिक ट्रान्झिट हब म्हणून विकसित केले आहे, जे भविष्यात दिल्ली-अलवर आणि दिल्ली-कर्नाल कॉरिडॉरला जोडले जाईल.

महिला सक्षमीकरण : या सेवेत महिला चालकांचा मोठा सहभाग असून, महिला प्रवाशांसाठी स्वतंत्र कोचची व्यवस्था करण्यात आली आहे.

ट्रेनमधील प्रीमियम सुविधा: बुलेट ट्रेनचा अनुभव

नमो भारत ट्रेनचा आतील भाग एखाद्या बुलेट ट्रेनसारखा वाटतो. प्रवाशांच्या सुखावह प्रवासासाठी खालील सुविधा देण्यात आल्या आहेत.

प्रीमियम कोच: रिक्लाइनिंग सीट्स, मोबाइल आणि लॅपटॉप चार्जिंग पॉइंट्स, लेगरूम आणि पडद्यांची सोय.

डिजिटल कन्सोल : ड्रायव्हरचा कन्सोल पूर्णपणे डिजिटल असून सुरक्षिततेसाठी स्वयंचलित प्लॅटफॉर्म गेट्स बसवण्यात आले आहेत.

इतर सोयी : सामान ठेवण्यासाठी पुरेशी जागा, मॅगझिन होल्डर्स, फूटरेस्ट आणि उभ्या प्रवाशांसाठी विशेष जागा.

मार्ग आणि महत्त्वाची स्थानके

ही सेवा सराय काले खान ते मोदीपुरम दरम्यान धावेल. या मार्गावरील प्रमुख स्थानके खालीलप्रमाणे आहेत. सराय काले खान → न्यू अशोक नगर → आनंद विहार → साहिबाबाद → गाझियाबाद → गुलधर → दुहाई → मुरादनगर → मोदीनगर दक्षिण → मोदीनगर उत्तर → शताब्दी नगर → मेरठ दक्षिण → बेगमपुल → मोदीपुरम.

तसेच, याच मार्गावर मेरठ मेट्रो सेवा देखील प्रवाशांसाठी सुरू करण्यात आली आहे.

गाड्यांचे वेळापत्रक

प्रवाशांना सकाळी लवकर आणि रात्री उशिरापर्यंत ही सेवा उपलब्ध असेल.

• सराय काले खान ते मोदीपुरम: पहिली ट्रेन सकाळी ६:०० वाजता, शेवटची ट्रेन रात्री १०:०० वाजता.
• मोदीपुरम ते सराय काले खान : पहिली ट्रेन सकाळी ६:०१ वाजता, शेवटची ट्रेन रात्री १०:०१ वाजता.
• मेरठ मेट्रो : सकाळी ६ ते रात्री १० वाजेपर्यंत उपलब्ध असेल.

नमो भारत रॅपिड रेलमुळे केवळ प्रवास वेगवान होणार नाही, तर दिल्ली-एनसीआरमधील प्रदूषण आणि वाहतूक कोंडी कमी होण्यास मोठी मदत होणार आहे.