Mohan Bhagwat : मोहन भागवतांनी केले 'हम दो, हमारे तीन'चे समर्थन; म्हणाले-हिंदूंच्या रक्षणासाठी...

Mohan Bhagwat Supports Three Children Policy : राष्ट्रीय स्वयंसेवक संघाचे (RSS) प्रमुख मोहन भागवत यांनी संघाच्या शताब्दी वर्षाच्या निमित्ताने आयोजित एका परिषदेत अनेक महत्त्वाच्या मुद्द्यांवर आपली भूमिका मांडली. भविष्यातील भारताच्या सुरक्षेसाठी आणि लोकसंख्या संतुलन राखण्यासाठी 'हम दो, हमारे तीन' या धोरणाचे त्यांनी समर्थन केले, ज्यामुळे मोठी चर्चा सुरू झाली आहे.

'तीन मुले' धोरणाचे समर्थन

मोहन भागवत म्हणाले की, देशाच्या लोकसंख्या धोरणानुसार प्रजनन दर २.१ असावा, याचाच अर्थ प्रत्येक कुटुंबात तीन मुले असली पाहिजेत. देशाची आणि कुटुंबव्यवस्थेची सुरक्षा राखण्यासाठी हे अत्यंत आवश्यक आहे. त्यांनी स्पष्टपणे सांगितले की, प्रत्येक नागरिकाने या धोरणाचे पालन करणे गरजेचे आहे, जेणेकरून भविष्यात लोकसंख्या संतुलन बिघडणार नाही.

धर्मांतर आणि घुसखोरीवर चिंता

लोकसंख्या असंतुलनासाठी बेकायदेशीर घुसखोरी आणि धर्मांतर ही दोन प्रमुख कारणे असल्याचे भागवत यांनी सांगितले. धर्मांतर हा प्रत्येकाचा वैयक्तिक अधिकार असला तरी, त्यासाठी कोणतेही आमिष किंवा दबाव असू नये, असे त्यांनी म्हटले. तसेच, सरकार जरी घुसखोरी रोखण्यासाठी प्रयत्न करत असले तरी, समाजानेही यामध्ये आपली भूमिका बजावणे महत्त्वाचे असल्याचे त्यांनी अधोरेखित केले.

'हिंदू' हीच आपली ओळख

मोहन भागवत यांनी 'अखंड भारता'च्या संकल्पनेचे समर्थन केले आणि सांगितले की, संघाने नेहमीच विभाजनाला विरोध केला आहे. ते म्हणाले की, "आपल्या सर्वांची एकच ओळख आहे आणि ती म्हणजे हिंदू. आपल्या देशात विविधता असली तरी, आपण सर्वांनी एकतेबद्दल बोलले पाहिजे, असेही त्यांनी सांगितले.

आरक्षण अन् सामाजिक समानता

आरक्षणाबद्दल विचारलेल्या प्रश्नावर भागवत यांनी एक महत्त्वाचे विधान केले. ते म्हणाले की, "जर कोणत्याही वर्गावर अन्याय झाला असेल आणि त्यांना प्रतिनिधित्व मिळाले नसेल, तर त्यांना पाठिंबा मिळाला पाहिजे.

जोपर्यंत वंचित समाजाला स्वतःच्या पायावर उभे राहता येणार नाही, असे वाटेल, तोपर्यंत आरक्षण चालू ठेवले पाहिजे, असेही त्यांनी म्हटले. समाजातील जातीय भेदभाव आणि दरी संपवणे हे संघाचे मुख्य उद्दिष्ट असल्याचेही त्यांनी स्पष्ट केले.