माघ पौर्णिमेच्या दिवशी लाखो भाविकांनी एकत्र येऊन पवित्र स्नान केलं, पुढील शाही स्नान कधी ?

Magh Purnima Snan Mahakumbh 2025: महाकुंभ मेळ्यासाठी प्रयागराज येथे भाविकांची मोठी गर्दी झाली आहे. माघ पौर्णिमेचे स्नान हे एक प्रमुख आकर्षण राहिले आहे. 12 फेब्रुवारी रोजी माघ पौर्णिमेच्या दिवशी प्रयागराज येथील त्रिवेणी संगम येथे लाखो भाविकांनी पवित्र स्नान केलं आहे.

उत्तर प्रदेशचे मुख्यमंत्री योगी आदित्यनाथ यांनी त्यांच्या कार्यालयातून कार्यक्रमाचे निरीक्षण केले. याठिकाणी कोणत्याही भाविकाची गैरसोय होणार नाही याची काळजी घेण्याचे निर्देश प्रशासनाला दिले.

माघ पौर्णिमेचे धार्मिक महत्त्व

माघ पौर्णिमा हा हिंदू धर्मात एक विशेष दिवस मानला जातो. कल्पवासींसाठी हा दिवस आणखी महत्त्वाचा आहे कारण जे भक्त संगमच्या काठावर राहतात आणि महिनाभर साधना करतात, ते या दिवशी त्यांचे उपवास आणि तपश्चर्या संपवतात. या दिवशी संगमावर स्नान करणे, दान करणे आणि पूजा करणे याला विशेष महत्त्व देण्यात आलं आहे.

'नो व्हेईकल झोन' घोषित

गर्दी नियंत्रित करण्यासाठी आणि सुरळीत वाहतूक सुनिश्चित करण्यासाठी प्रयागराजला 'नो व्हेईकल झोन' घोषित करण्यात आलं आहे. फक्त अत्यावश्यक आणि आपत्कालीन सेवांना परवानगी देण्यात आली आहे.

माघ पौर्णिमेला स्नानासाठी भाविकांची गर्दी

माघ पौर्णिमेला लाखो भाविकांनी त्रिवेणी संगमात स्नान केले. प्रशासनाच्या मते या स्नान महोत्सवापर्यंत महाकुंभातील भाविकांची संख्या 45 कोटींपेक्षा जास्त झाली आहे. तसेच शेवटच्या स्नानापर्यंत ही संख्या 50 कोटींपेक्षा जास्त होण्याची अपेक्षा आहे.

विद्यार्थ्यांसाठी ऑनलाइन वर्ग

गर्दी आणि रहदारी लक्षात घेऊन, विद्यार्थ्यांना कोणतीही गैरसोय होऊ नये म्हणून प्रयागराजमधील सर्व माध्यमिक शाळांमध्ये 7 ते 12 फेब्रुवारी दरम्यान ऑनलाइन वर्ग सुरू करण्यात आले.

डीआयजी आणि एसएसपींनी दिली माहिती

प्रयागराजचे डीआयजी वैभव कृष्णा म्हणाले की, गर्दी नियंत्रण आणि वाहतूक व्यवस्थापनासाठी परिसरात विस्तृत व्यवस्था करण्यात आली आहे. "सर्व काही नियंत्रणात आहे, भाविक नियमांचे पालन करत आहेत आणि स्नान सुरळीत सुरू आहे." कुंभ एसएसपी राजेश द्विवेदी यांनीही सांगितले की, भाविकांची ये-जा सुरळीत सुरू आहे.

पुढील शाही स्नान कधी ?

महाकुंभ 2025 चा समारोप 26 फेब्रुवारी रोजी महाशिवरात्रीच्या अंतिम अमृत स्नानाने होईल. याआधी वसंत पंचमी 3 फेब्रुवारी रोजी आणि माघ पौर्णिमा स्नान 12 फेब्रुवारी रोजी साजरे केले जात आहे. माघ पौर्णिमेला लाखो भाविकांनी संगमात धार्मिक स्नान केले.

स्नानोत्सव कोणत्याही अडचणीशिवाय पार पडावा यासाठी प्रशासनाकडून कडक सुरक्षा व्यवस्था करण्यात आली होती. कल्पवास संपल्यानंतर 10 लाखांहून अधिक भाविक महाकुंभातून निघाले. महाशिवरात्री स्नानापर्यंत प्रयागराजमध्ये भाविकांची गर्दी असणार आहे.