Karwa Chauth करवा चौथ कधी आहे; 9 की 10 ऑक्टोबर? जाणून घ्या तारीख, शुभमुहूर्त, पुजाविधी महत्व अन् कथा

Karwa Chauth 2025 date Auspicious Muhurat Puja and Ritual : पती-पत्नीच्या अतुट नात्याचा, प्रेमाचा आणि समर्पणाचा सर्वात मोठा उत्सव... ज्याची आतुरता प्रत्येक सुवासिनीला असते, तो म्हणजे 'करवा चौथ'. अखंड सौभाग्याची कामना करत, सूर्योदयापासून चंद्रदर्शनापर्यंत चालणाऱ्या या निर्जला व्रताची तारीख जवळ आली आहे. यंदा २०२५ मध्ये हे पवित्र व्रत ९ की १० ऑक्टोबरला आहे? या संभ्रमाला आता पूर्णविराम देत आहोत. पंचांग काय सांगतेय, शुभ मुहूर्त कोणता आहे आणि पूजेची योग्य पद्धत कोणती हे या लेखात आपण जाणून घेऊया.

पंचांगानुसार, चतुर्थी तिथीची सुरुवात ०९ ऑक्टोबर रोजी रात्री १० वाजून ५४ मिनिटांनी होत आहे आणि तिथीची समाप्ती १० ऑक्टोबर रोजी सायंकाळी ०५ वाजून १६ मिनिटांपासून ०६ वाजून २९ मिनिटांपर्यंत होणार आहे. 'उदया तिथी'चे महत्त्व असल्यामुळे, अखंड सौभाग्याचा हा उत्सव १० ऑक्टोबर २०२५ रोजी साजरा केला जाणार आहे, हे निश्चित!

चंद्रोदय आणि पूजेचे शुभ मुहूर्त

करवा चौथचा दिवस हा व्रताचे नियम, पूजा आणि चंद्रदर्शनामुळे खूप महत्त्वाचा असतो. चंद्रोदयाची वेळ शहरांनुसार थोडी बदलू शकते.

• वेळ (१० ऑक्टोबर २०२५)
• करवा चौथ पूजेचा शुभ मुहूर्त सायंकाळी ०५:१६ PM ते ०६:२९ PM पर्यंत
• चंद्रोदय होण्याची वेळ सायंकाळी ०७:४२ PM

करवा चौथची कथा काय आहे?

या व्रतामागे 'करवा' नावाच्या एका दृढनिश्चयी स्त्रीची पौराणिक कथा आहे. करवा नावाच्या स्त्रीने तिच्या पतीला यमराजांपासून वाचवण्यासाठी आपले सर्वस्व पणाला लावले होते. तिच्या निष्ठेने यमराज प्रसन्न झाले आणि त्यांनी तिच्या पतीला जीवदान दिले. तेव्हापासून 'करवा' आणि 'चौथ' (चतुर्थी) एकत्र येऊन हे व्रत 'करवा चौथ' म्हणून ओळखले जाते.

करवा चौथ व्रताची आणि पूजेची खास पद्धत

• करवा चौथ म्हणजे केवळ उपवास नव्हे, तर तो प्रेम, त्याग आणि समर्पण व्यक्त करण्याचा दिवस आहे.
• व्रताची सुरुवात पहाटे सरगी (सासूबाईंनी दिलेले पौष्टिक भोजन) घेऊन केली जाते. त्यानंतर सूर्योदयापासून चंद्रदर्शनापर्यंत निर्जला (पाण्याशिवाय) व्रत पाळले जाते.
• सायंकाळी महिला सोळा शृंगार करून तयार होतात. शुभ मुहूर्तावर करवा (घडा) आणि मातीच्या गणेशजींची पूजा केली जाते.
• पूजेच्या वेळी करवा चौथची कथा आवर्जून ऐकली जाते. कथा ऐकल्याशिवाय व्रत पूर्ण होत नाही, अशी श्रद्धा आहे.
• रात्री चंद्रोदय झाल्यावर, चाळणीतून आधी चंद्रमाचे दर्शन घेतले जाते आणि नंतर त्याच चाळणीतून पतीच्या चेहऱ्याचे दर्शन घेतले जाते.
• चंद्रदेवाला अर्घ्य म्हणजेच जल अर्पण केल्यानंतर, पती आपल्या पत्नीला पाणी पाजून तिचे व्रत पूर्ण करतात.