CM साहेब, माझ्यावर कारवाई करा, पण...; करूर चेंगराचेंगरीवरुन अभिनेता विजय यांचे स्टॅलिन यांना आव्हान

Vijay challenges CM Stalin OverKarur Stampede : तामिळनाडूतील करूर येथे तमिळगा वेट्टी कझगम (TVK) रॅलीत झालेल्या चेंगराचेंगरीच्या दुःखद घटनेनंतर, पक्षाचे प्रमुख आणि अभिनेते विजय यांनी अखेर आपले मौन सोडले आहे. या दुर्घटनेत 41 जणांचा मृत्यू झाल्यानंतर दोन दिवसांनी, मंगळवारी (30 सप्टेंबर 2025) विजय यांनी व्हिडिओ संदेश जारी करून आपली भूमिका स्पष्ट केली. ते म्हणाले मुख्यमंत्री स्टॅलिन हे बदला घेत आहेत, त्यांनी माझ्यावर कारवाई करावी, विनाकारण, माझ्या कार्यकर्त्यांवर कारवाई करू नये, अशी साद घालून त्यांनी सीएमवर गंभीर आरोप देखील केले आहेत.

भावनाविवश होऊन व्यक्त केले दुःख

TVK च्या अधिकृत सोशल मीडिया हँडलवरून पोस्ट केलेल्या व्हिडिओमध्ये विजय यांनी या घटनेबद्दल तीव्र दुःख व्यक्त केले. ते म्हणाले, "माझे हृदय चिंतेने भरले आहे. जे घडायला नको होते ते घडले." ते पुढे म्हणाले की, "माझ्या आयुष्यात मी कधीही अशा दुःखद परिस्थितीचा सामना केलेला नाही." TVK प्रमुखांनी करूर चेंगराचेंगरीतील बळींबद्दल शोक व्यक्त केला आणि जखमींना लवकर बरे होण्याच्या शुभेच्छा दिल्या. राजकारण बाजूला ठेवून, आपल्या पक्षाकडून नेहमीच पोलिसांना सुरक्षित ठिकाणाची परवानगी मागितली जाते, यावर भर दिला.

बाधितांना लवकरच भेटणार

व्हिडिओ संदेशात विजय यांनी स्पष्ट केले की, ते अद्याप करूरला जाऊन बाधित लोकांशी भेटलेले नाहीत. "मी करूरला भेटलो नाही कारण त्यामुळे असामान्य परिस्थिती निर्माण होऊ शकली असती. मी तुम्हाला (पीडित आणि जखमींच्या कुटुंबियांना) लवकरच भेटेन," असे आश्वासन त्यांनी दिले.

मुख्यमंत्री स्टॅलिन यांना थेट आव्हान

या दुर्घटनेनंतर पोलिसांनी त्यांच्या पक्षाच्या सहकाऱ्यांविरुद्ध गुन्हा दाखल केला आहे. या पार्श्वभूमीवर, अभिनेता विजय यांनी तामिळनाडूचे मुख्यमंत्री एमके स्टॅलिन आणि सत्ताधारी द्रविड मुन्नेत्र कळघम (DMK) पक्षाला थेट आव्हान दिले आहे. विजय यांनी स्पष्टपणे सांगितले की, त्यांना या प्रकरणात कारवाईला सामोरे जाण्याचे संकेत मिळाले आहेत.

पक्ष कार्यकर्त्यांना संरक्षण

स्टॅलिन यांना उद्देशून ते म्हणाले, "मुख्यमंत्री, जर तुमच्या मनात सूड घेण्याचे विचार असतील, तर तुम्ही मला काहीही करू शकता, परंतु तुम्ही पक्षाच्या लोकांना हात लावू शकत नाही." ते म्हणाले, "तुम्ही माझ्या घरी किंवा माझ्या कार्यालयात येऊन माझ्याविरुद्ध कोणतीही कारवाई करू शकता, परंतु त्यांच्याविरुद्ध (पक्षाच्या सहकाऱ्यांविरुद्ध) नाही." विजय यांनी दावा केला की, सार्वजनिक सुरक्षेची खात्री करण्यासाठी ते घटनेच्या दिवशी करूरहून लवकर निघाले होते.

TVK नेत्यांवर गुन्हे दाखल!

करूरमध्ये २७ सप्टेंबर रोजी झालेल्या चेंगराचेंगरीप्रकरणी पोलिसांनी TVK च्या काही वरिष्ठ नेत्यांविरुद्ध गुन्हा दाखल केला आहे. यामध्ये पक्षाचे ज्येष्ठ नेते बस्सी एन. आनंद आणि सीटीआर निर्मल कुमार यांचा समावेश आहे. विजय यांनी हे आव्हान अशा वेळी दिले आहे, जेव्हा त्यांचे सहकारी कायदेशीर अडचणींचा सामना करत आहेत.

या व्हिडिओ संदेशाद्वारे विजय यांनी केवळ दुःख व्यक्त केले नाही, तर राजकीय कारवाईला सामोरे जाण्याची तयारी दर्शवत आपल्या पक्ष कार्यकर्त्यांना खंबीर पाठिंबा दिला आहे.