भारत-EU ऐतिहासिक व्यापार करार; 'मदर ऑफ ऑल डील्स'वर शिक्कामोर्तब! या वस्तू होणार स्वस्त!

भारताच्या आर्थिक आणि राजनैतिक इतिहासातील एक सुवर्णक्षण आज साकारला आहे. भारत आणि युरोपियन युनियन (EU) यांच्यात बहुप्रतिक्षित मुक्त व्यापार कराराची (Free Trade Agreement - FTA) घोषणा करण्यात आली आहे. या करारामुळे जागतिक बाजारपेठेत भारताचे स्थान अधिक बळकट झाले असून, लक्झरी कारपासून ते प्रिमियम मद्यापर्यंतच्या अनेक वस्तूंच्या किमतीत मोठी घट होणार आहे.

'सर्व करारांची जननी': पंतप्रधान मोदींचे मोठे विधान

७७ व्या प्रजासत्ताक दिनाचे मुख्य पाहुणे म्हणून उपस्थित असलेले युरोपियन युनियनचे नेते आणि पंतप्रधान नरेंद्र मोदी यांच्यात झालेल्या १६ व्या भारत-ईयू शिखर परिषदेत या करारावर स्वाक्षरी करण्यात आली.

या कराराचे महत्त्व विशद करताना पंतप्रधान मोदी म्हणाले, "हा केवळ व्यापार करार नसून भारत-युरोप संबंधांमधील एक नवीन अध्याय आहे. जगभरात या कराराची 'मदर ऑफ ऑल डील्स' (सर्व करारांची जननी) म्हणून चर्चा होत आहे."

#WATCH | Delhi | PM Narendra Modi, the President of the European Commission, Ursula Von Der Leyen and the President of the European Council, António Luís Santos da Costa, witness the signing and exchange of the political declaration of the conclusion of negotiations of the… pic.twitter.com/SfT1SDjLTJ

— ANI (@ANI) January 27, 2026

काय स्वस्त होणार? सर्वसामान्यांपासून उद्योजकांपर्यंत फायदा

या ऐतिहासिक करारामुळे टॅरिफ स्ट्रक्चरमध्ये (कर रचना) क्रांतिकारी बदल होणार आहेत.

लक्झरी कार्स: युरोपमधून येणाऱ्या लक्झरी गाड्यांवरील आयात शुल्क (Tariff) ११०% वरून थेट १०% वर येणार आहे. यामुळे बीएमडब्ल्यू, मर्सिडीज आणि ऑडी सारख्या गाड्यांच्या किमती लक्षणीयरीत्या कमी होतील.

प्रिमियम मद्य : युरोपियन प्रिमियम वाईन आणि स्पिरिट्सवरील शुल्क कमी झाल्यामुळे या वस्तू आता अधिक परवडणाऱ्या किमतीत उपलब्ध होतील.

इतर क्षेत्रे : व्यापार, सुरक्षा, तंत्रज्ञान आणि स्वच्छ ऊर्जा या क्षेत्रांतही दोन्ही देशांमधील सहकार्य वाढणार आहे.

अँटोनियो कोस्टा यांच्या भावना: "मी भारतीय वंशाचा युरोपियन अध्यक्ष"

युरोपियन कौन्सिलचे अध्यक्ष अँटोनियो कोस्टा यांनी या प्रसंगी अत्यंत भावनिक भाषण केले. त्यांनी आपल्या गोवा कनेक्शनचा उल्लेख करत स्वतःला 'परदेशी भारतीय' म्हटले. "मला माझ्या गोव्यातील ओळखीचा अभिमान आहे. माझ्या वडिलांचे कुटुंब गोव्याचे आहे, त्यामुळे हा करार माझ्यासाठी केवळ अधिकृत करार नसून वैयक्तिक नात्याची वीण आहे," असे कोस्टा यांनी नमूद केले.

अमेरिकेची नाराजी आणि जागतिक पडसाद

भारताच्या या मोठ्या यशामुळे अमेरिका मात्र काहीशी अस्वस्थ असल्याचे चित्र आहे. अमेरिकेचे अर्थमंत्री स्कॉट बेसंट यांनी या करारावर नाराजी व्यक्त करताना म्हटले की, "युरोप स्वतःविरुद्धच्या युद्धाला निधी देत आहे." मात्र, भारताने आपल्या राष्ट्रहिताला प्राधान्य देत या कराराकडे एक मोठी संधी म्हणून पाहिले आहे.