Corona: बाधितांचा आकडा गेला 3800 पुढे; 48 तासांमध्ये किती लोकांचा मृत्यू; महाराष्ट्रात स्थिती काय?

India Coronavirus Update News : देशात कोरोना विषाणूच्या सक्रिय रुग्णांची संख्या 3,783 वर पोहोचली आहे. आरोग्य विभागाच्या वेबसाइटनुसार, 22 मे रोजी भारतात 257 रुग्ण होते. तर दुसरीकडे, 9 दिवसांत कोरोना रुग्णांमध्ये तेराशे टक्के वाढ झाली आहे. केरळमध्ये सर्वाधिक 1400 रुग्ण आहेत. त्याच वेळी, महाराष्ट्रात 485 सक्रिय रुग्ण आहेत आणि दिल्लीत 436 रुग्ण आहेत.

दोन दिवसांत किती जणांचा झाला मृत्यू?

जानेवारीपासून देशभरात कोरोनामुळे 28 मृत्यू झाले आहेत. यापैकी गेल्या 2 दिवसांत 21 जणांचा मृत्यू झाला आहे. शनिवारी, बेंगळुरूमध्ये 63 वर्षीय एका पुरूषाचा मृत्यू झाला. त्याला दोन्ही लसींसह बूस्टर डोस देखील मिळाला होता. त्याच वेळी, दिल्लीत 60 वर्षीय एका पुरूषाचा मृत्यू झाला. महाराष्ट्र आणि केरळमध्ये सर्वाधिक 7 जणांचा मृत्यू झाला आहे.

कर्नाटक सरकारच्या वतीने नवीन नियमावली लागू

कर्नाटक सरकारने शनिवारी सार्वजनिक एडवायझरी जारी केली आहे. यामध्ये गर्दीच्या ठिकाणी मास्क घालण्याचे, शारीरिक अंतर राखण्याचे आणि स्वच्छतेची विशेष काळजी घेण्याचे आवाहन करण्यात आले आहे. ताप, खोकला, छातीत दुखणे किंवा श्वास घेण्यास त्रास होत असल्यास, ताबडतोब चाचणी घेण्यास सांगण्यात आले आहे.

7 महिन्यांनंतर या राज्यात पहिला रुग्ण

मिझोराममध्ये 2 जणांमध्ये कोविड-19 ची पुष्टी झाली आहे. आरोग्य विभागाच्या अधिकाऱ्यांनी सांगितले की, राज्यात असा शेवटचा रुग्ण आढळल्यानंतर 7 महिन्यांनी कोविडचे रुग्ण आढळले. मिझोराममध्ये कोविड-19 चा शेवटचा रुग्ण ऑक्टोबर 2024 मध्ये नोंदवला गेला होता, त्यादरम्यान राज्यात 73 जणांना विषाणूची लागण झाली होती.

ऐझॉलजवळील फाल्कन येथील झोरम मेडिकल कॉलेज आणि हॉस्पिटल (ZMCH) मध्ये रुग्णांवर उपचार सुरू आहेत. राज्य आरोग्य विभागाच्या एकात्मिक रोग देखरेख कार्यक्रमाने (IDSP) लोकांना घाबरू नका असे आवाहन केले आहे.

आयडीएसपीने लोकांना कोविड प्रोटोकॉलचे पालन करण्याचा, नियमितपणे हात धुण्याचा, हँड सॅनिटायझरचा वापर करण्याचा आणि गर्दीच्या ठिकाणी जाण्यापासून दूर राहण्याचा सल्ला दिला आहे.

महाराष्ट्रातील कोविड रुग्णांची स्थिती काय?

महाराष्ट्र सरकारच्या आकडेवारीनुसार, शनिवारी कोविडचे 68 नवीन रुग्ण आढळले. तर जानेवारी 2025 पासून मुंबईत एकूण 749 रुग्ण आढळले आहेत. जानेवारीपासून राज्यात 9,592 कोविड-19 चाचण्या घेण्यात आल्या आहेत.

जम्मू आणि काश्मीरमध्ये किती रुग्ण, जाणून घ्या?

त्याच वेळी, गुरुवारी जम्मू आणि काश्मीरमध्ये कोविड-19 चे दोन रुग्ण आढळले. दोन्ही रुग्ण केरळचे आहेत आणि श्रीनगरमधील सरकारी दंत महाविद्यालयात शिक्षण घेत आहेत.

भारतात कोविडचे 4 नवीन प्रकार आढळले

भारतातील अनेक राज्यांमध्ये कोविडच्या प्रकरणांमध्ये वाढ होत असताना, देशात चार नवीन प्रकार आढळले आहेत. आयसीएमआरचे संचालक डॉ. राजीव बहल यांनी माध्यमांशी बोलताना ही माहिती दिली. ते म्हणाले की, क्षिण आणि पश्चिम भारतातून अनुक्रमित केलेले प्रकार LF.7, XFG, JN.1 आणि NB.1.8.1 सीरीजमधील आहेत. इतर ठिकाणांहून नमुने घेतले जात आहेत आणि नवीन प्रकारांची तपासणी करता यावी म्हणून अनुक्रमित केले जात आहे. प्रकरणे फार गंभीर नाहीत आणि लोकांनी काळजी करू नये, फक्त सावधगिरी बाळगावी.