आता 'घरबसल्या' बदला आधार कार्डवरील मोबाईल नंबर; UIDAI च्या नवीन ॲपची मदत घेऊन करा 'ही' 5 सोपी कामे!

How to Update Aadhar Mobile Number : आधार कार्ड हे आज देशातील सर्वात जास्त वापरले जाणारे ओळखपत्र आहे. जवळपास प्रत्येक सरकारी आणि खासगी सेवेसाठी आधारची गरज पडते. युनिक आयडेंटिफिकेशन अथॉरिटी ऑफ इंडिया १४० कोटींहून अधिक लोकांना आधार कार्ड जारी करते. वेळोवेळी आधारमधील मोबाईल नंबर, पत्ता किंवा इतर माहिती अपडेट करण्याची गरज भासते. यासाठी मोबाईल नंबर सर्वात महत्त्वाची माहिती असते, कारण सर्व पडताळणी ओटीपीद्वारेच होते.

पूर्वी मोबाईल नंबर बदलण्यासाठी नागरिकांना आधार केंद्रावर जावे लागत होते, जिथे लांबच लांब रांगा आणि वेळेची मोठी अडचण होती. मात्र, आता UIDAI ने ही प्रक्रिया पूर्णपणे डिजिटल केली आहे. आता तुम्ही तुमचा मोबाईल नंबर घरी बसून आधार ॲपद्वारेच अपडेट करू शकता.

घरातून आधारमध्ये मोबाईल नंबर अपडेट करण्याची प्रक्रिया

UIDAI ने स्पष्ट केले आहे की, आधार ॲपवरून मोबाईल नंबर अपडेट करण्यासाठी कोणतेही कागदपत्र जमा करावे लागणार नाहीत आणि कोणत्याही प्रत्यक्ष भेटीची गरज पडणार नाही. म्हणजेच, संपूर्ण प्रक्रिया मोबाईलवरच पूर्ण होईल. जर तुमच्या फोनमध्ये आधार ॲप इन्स्टॉल नसेल, तर ते डाऊनलोड करून सेटअप करणे आवश्यक आहे.

ॲप सेटअप करण्यासाठी काय करावे?

१. सर्वात आधी आधार ॲप इन्स्टॉल करा.
२. तुमचा आधार नंबर टाकून लॉगिन करा.
३. नोंदणीकृत नंबरवर आलेल्या ओटीपीची पडताळणी करा.
४. आता ६ अंकी लॉगिन पिन (PIN) सेट करा.

असा करा मोबाईल नंबर अपडेट (५ सोपी कामे)

तुमचा आधार ॲप सेटअप झाल्यानंतर, तुम्ही खालील ५ सोप्या कामांद्वारे तुमचा मोबाईल नंबर अपडेट करू शकता.

ॲप उघडा आणि लॉगिन करा: ॲप उघडून ६ अंकी पिन टाका आणि लॉगिन करा.
अपडेटचा पर्याय निवडा: खाली स्क्रोल करून 'My Aadhaar Update' हा पर्याय निवडा.
मोबाईल नंबर अपडेट निवडा: 'Mobile Number Update' या पर्यायावर क्लिक करा. माहिती वाचून 'Continue' (पुढे जा) बटण दाबा.
ओटीपी आणि फेस ऑथेंटिकेशन: तुमचा नवीन मोबाईल नंबर टाका आणि ओटीपीद्वारे त्याची पडताळणी करा. यानंतर चेहऱ्याची पडताळणी (Face Authentication) होईल.
शुल्क भरा: त्यानंतर पेमेंट पेज उघडेल, जिथे तुम्हाला ₹७५ रुपये शुल्क भरावे लागेल. तुम्ही UPI / कार्ड / नेट बँकिंग अशा कोणत्याही पद्धतीने पेमेंट करू शकता. पेमेंट पूर्ण होताच तुमचा मोबाईल नंबर अपडेट होईल.

एकाच फोनमध्ये ५ आधार कार्ड सुरक्षित

UIDAI ने नुकतेच आधारचे नवीन मोबाईल ॲप लॉन्च केले आहे. या ॲपमध्ये एकाच फोनमध्ये ५ लोकांचे आधार कार्ड सुरक्षित ठेवण्याची सुविधा आहे. सुरक्षिततेसाठी या ॲपमध्ये फेस ऑथेंटिकेशन सारखी आधुनिक तंत्रज्ञान जोडण्यात आले आहे, जेणेकरून कोणत्याही चुकीच्या माहितीची देवाणघेवाण किंवा गैरवापर होऊ नये. ॲपमध्ये युपीआयप्रमाणे क्यूआर स्कॅन करून आधार माहिती शेअर करण्याची प्रणाली देखील देण्यात आली आहे.