Dussehra 2025 Date : 1 की 2 ऑक्टोबर, कधी आहे दसरा?,शस्त्रपूजेचा शुभ वेळ, तारीख अन् योग जाणून घ्या!

Dussehra 2025 Date : दसरा (Dussehra) ज्याला विजयादशमी (Vijayadashami) असेही म्हटले जाते. वाईटावर चांगल्याच्या विजयाचे प्रतीक असलेला हा एक प्रमुख हिंदू सण आहे. याच दिवशी भगवान श्रीरामाने रावणाचा वध केला आणि देवी दुर्गेने महिषासुराचा पराभव केला, असे मानले जाते.

या वर्षी, दसरा 2025 हा सण कधी आहे, असा प्रश्न तुम्हाला अनेकांना पडतो. तर यंदाचा दसरा गुरुवार, 2 ऑक्टोबर 2025 रोजी साजरा केला जाईल. याच दिवशी शारदीय नवरात्र 2025 आणि दुर्गा पूजा 2025 ची सांगता होईल. विशेष म्हणजे, हा दिवस गांधी जयंती म्हणून साजरा केला जाणार आहे. कारण, यंदा गांधी जयंतीच्या दिवशी दसरा आला आहे.

दशमी तिथी आणि रावण दहनाच्या वेळा

दसरा हा सण दशमी तिथीला साजरा केला जातो. या वर्षीच्या दशमी तिथीच्या वेळा खालीलप्रमाणे आहेत:

• दशमी तिथी प्रारंभ : १ ऑक्टोबर २०२५, संध्याकाळी ७:०१ वाजता
• दशमी तिथी समाप्ती : २ ऑक्टोबर २०२५, संध्याकाळी ७:१० वाजता
• सूर्यास्त वेळ : २ ऑक्टोबर २०२५, संध्याकाळी ६:०६ वाजता

रावण दहन हे सूर्यास्तानंतर सुरू होणाऱ्या प्रदोष काल दरम्यान केले जाते, जे वाईटाच्या अंताचे प्रतीक मानले जाते.

शस्त्र पूजेसाठी अत्यंत शुभ योग

दसरा हा सण विशेषतः शस्त्र पूजा आणि आयुध पूजेसाठी महत्त्वाचा मानला जातो. या वर्षी दसऱ्याला काही अत्यंत शुभ योग तयार होत आहेत, ज्यामुळे हा दिवस अधिक फलदायी ठरणार आहे.

रवि योग, सुकर्म योग, धृती योग यापैकी रवि योग हा पूजा, शस्त्र पूजा, वाहन खरेदी आणि नवीन प्रकल्प सुरू करण्यासाठी सर्वोत्तम मानला जातो. शस्त्र पूजेचा शुभ काळ - दुपारी 2:09 ते दुपारी 2:56 पर्यंत असणार आहे.

दसऱ्याचे महत्त्व काय?

दसरा हा केवळ एक धार्मिक सण नाही, तर तो संपूर्ण समाजाला नैतिक संदेश देतो. प्रामुख्याने दसरा विजयाचे प्रतीक मानले जाते. दसरा हा सण धर्माचा अधर्मावर, चांगल्याचा वाईटावर आणि सत्याचा असत्यावर विजय दर्शवतो.

विविधतेतील एकता

दसरा हा सण संपूर्ण भारतात वेगवेगळ्या स्वरूपात साजरा केला जातो. उत्तर भारतात रामलीला आणि रावण दहन, पूर्व भारतात : दुर्गा पूजा आणि विसर्जन, दक्षिण भारतात: आयुध पूजा आणि विद्यारंभ.

दसरा आपल्याला हा संदेश देतो की, जीवनात वाईट शक्तींवर नेहमीच चांगल्याचा विजय होतो. हा सण लोकांना वासना, क्रोध, आसक्ती, लोभ आणि अहंकार यांसारख्या पापांचा त्याग करण्यास प्रेरित करतो. देवी दुर्गा आणि भगवान राम यांच्या विजयाचे प्रतीक असलेला हा उत्सव शक्ती, धैर्य आणि धार्मिकतेचे महत्त्व अधोरेखित करतो. या शुभ दिवशी आपणही आपल्या जीवनातील वाईट सवयींचा त्याग करून एका नव्या आणि सकारात्मक दिशेने वाटचाल सुरू करू शकता!