'सुरक्षा बढ़ा लो..,अयोध्येतील राम मंदिराला बॉम्बने उडवून देण्याची पुन्हा धमकी, 15 कलेक्टरांनाही मेल

Ayodhya Ram Mandir Latest News : अयोध्येतील (युपी) राम मंदिरावर बॉम्ब हल्ला करण्याची धमकी देण्यात आली आहे. ही धमकी राम मंदिर ट्रस्टला ई-मेलद्वारे पाठवण्यात आली आहे.

त्याचबरोबर अयोध्येसह आजूबाजूच्या जिल्हाधिकाऱ्यांच्या कार्यालयीन मेलवर देखील राम मंदिर बॉम्बने उडवून देण्याची धमकीचे मेल पाठविण्यात आल्याची माहिती समोर आली आहे. त्यामुळे प्रशासन खडबडून जागे झाले असून तपास कार्य केले जात आहे. मंदिराची सुरक्षा देखील अधिक सतर्क करण्यात आलेली आहे.

सुमारे 15 कलेक्टरांच्या मेलवरही धमकीचा संदेश

मिळालेल्या माहितीनुसार, एकीकडे राम मंदिर ट्रस्टच्या अधिकृत ईमेलवर धमकी आली. तर दुसरीकडे उत्तर प्रदेशातील 10-15 जिल्ह्यांमधील जिल्हाधिकाऱ्यांच्या अधिकृत ई-मेलवर धमक्या आल्या आहेत. त्यामुळे अचानक खळबळ उडाली आहे.

राम मंदिर ट्रस्टला मिळालेल्या ईमेलमध्ये 'सुरक्षा वाढवा अन्यथा मंदिर बॉम्बने उडवून दिले जाईल', असा इशारा देण्यात आला आहे. असाच काहीचा मथळा शासकीय कार्यालयातील इमेलवर देखील असल्याचे सांगितले जात आहे.

सायबर पोलिस ठाण्यात गुन्हा दाखल

सोमवारी रात्री राम जन्मभूमी ट्रस्टच्या मेलवर एक धमकीचा मेल आला. त्यात लिहिले होते- मंदिराची सुरक्षा वाढवा. त्यानंतर अयोध्येच्या सायबर पोलिस ठाण्यात एफआयआर दाखल करण्यात आला. सायबर सेल या प्रकरणाची चौकशी करत आहे.

या जिल्ह्याच्या जिल्हाधिकाऱ्यांनाही धमकीचा मेल

धमकीचा मेल मिळाल्यानंतर, मोठ्या प्रमाणात शोध मोहीम सुरू करण्यात आली. अयोध्यासह, बाराबंकी आणि चंदौलीसह इतर अनेक जिल्ह्यांच्या जिल्हा दंडाधिकाऱ्यांनाही धमकीचे मेल आले आहेत.

बाराबंकी, फिरोजाबाद आणि चंदौलीच्या जिल्हा दंडाधिकाऱ्यांच्या कार्यालयांना बॉम्बने उडवण्याची धमकी देणारा एक मेल आला आहे. मिळालेल्या माहितीनुसार, हे मेल तामिळनाडूहून पाठवण्यात आले आहेत.

जर आपण इतर जिल्ह्यांबद्दल बोललो तर, किमान १०-१५ जिल्ह्यांच्या डीएमच्या अधिकृत माहिती प्रणालीवर धमकीचे ईमेल प्राप्त झाले. जिल्हा दंडाधिकाऱ्यांना पाठवलेल्या मेलमध्ये असे म्हटले आहे की जिल्हाधिकारी कार्यालय बॉम्बने उडवले जाईल.