असदुद्दीन ओवेसी यांनी संसदेत दिला 'जय पॅलेस्टाईन'चा नारा
नवी दिल्ली: हैदराबादचे खासदार आणि एआयएमआयएमचे प्रमुख असदुद्दीन ओवेसी यांनी 18 व्या लोकसभेच्या कामकाजाच्या दुसऱ्या दिवशी खासदार म्हणून शपथ घेतली. शपथ घेताना ओवेसींनी 'जय पॅलेस्टाईन'चा नारा दिला आहे. यानंतर आता नवा वाद निर्माण झाला आहे.
वास्तविक, हंगामी अध्यक्षांनी असदुद्दीन ओवेसी यांना लोकसभा सदस्य म्हणून शपथ घेण्यासाठी बोलावले. बिस्मिल्लाचे पठण करून ओवेसी यांनी खासदार म्हणून शपथ घेतली. खासदारपदाची शपथ घेतल्यानंतर त्यांनी बाहेर पडताना 'जय भीम, जय तेलंगणा आणि नंतर जय पॅलेस्टाईन'चा नारा दिला. त्यामुळे भाजप खासदारांनी संसदेत गदारोळ सुरू केला.
पाचव्यांदा निवडणूक जिंकून ओवेसी संसदेत पोहोचले
हैदराबाद लोकसभा मतदारसंघातून असदुद्दीन ओवेसी सलग पाचव्यांदा विजयी झाले आहेत. यावेळी असदुद्दीन ओवेसी यांना एकूण 6,61,981 मते मिळाली आणि त्यांनी भाजपच्या माधवी लता यांचा 3,38087 मतांनी पराभव केला. यापूर्वी 2019 च्या निवडणुकीत, ओवेसी यांनी एकूण 58.95% मतांसह विजय मिळवला होता.
Sworn in as member of Lok Sabha for the fifth time. Inshallah I will continue to raise issues of India’s marginalised with sinceritypic.twitter.com/OloVk6D65B
— Asaduddin Owaisi (@asadowaisi) June 25, 2024
ओवेसी किती वेळा जिंकले?
ऑल इंडिया मजलिस-ए-इत्तेहादुल मुस्लीमीन (एआयएमआयएम) प्रमुख असदुद्दीन ओवेसी 2004 मध्ये हैदराबाद लोकसभा मतदारसंघातून निवडणूक जिंकून पहिल्यांदा संसदेत पोहोचले. यानंतर त्याने 2009, 2014, 2019 आणि 2024 मध्ये आपली विजयी मालिका सुरू ठेवली.
सोशल मीडियावर युजर्सनी साधला निशाणा
ओवेसींच्या या वक्तव्यावर सोशल मीडियावरील यूजर्स संतापले. हँडलवरील एका वापरकर्त्याने पोस्टमध्ये म्हटले की, भारताने तुम्हाला मत दिले आहे, पॅलेस्टाईनला नाही. आणखी एका वापरकर्त्याने ओवेसींना उद्देशून लिहिले, तुम्ही पॅलेस्टाईनमध्ये का जात नाहीत आणि तेथे राहायला सुरुवात करत नाहीत. हा काय मूर्खपणा आहे. या प्रकरणी ओवेसींवर कारवाई झाली पाहिजे, अशी संतप्त मागणी एका युजरने केली.
आपल्या देशाच्या संसदेत दुसऱ्या देशाच्या घोषणा देण्यापेक्षा आणखी काही लज्जास्पद असू शकत नाही, असेही अनेक युजर्सने म्हटले आहे. ओवेसींच्या या कृतीचा अनेक युजर्सने निषेध केला आहे.
पहिल्याच दिवशी पंतप्रधान मोदींनी शपथ घेतली
अठराव्या लोकसभेचे पहिले अधिवेशन सोमवारी (24 जून) सुरू झाले, ज्यामध्ये पंतप्रधान नरेंद्र मोदी, त्यांच्या मंत्रिपरिषदेचे सदस्य तसेच इतर नवनिर्वाचित सदस्यांनी सभागृहाचे सदस्य म्हणून शपथ घेतली. कार्यवाहक सभापती (प्रोटेम स्पीकर) भर्त्रीहरी महताब यांनी सभागृहाचे कामकाज चालवले आणि सदस्यांना शपथ दिली.
नुकत्याच पार पडलेल्या लोकसभा निवडणुकीनंतर पंतप्रधान मोदी सलग तिसऱ्यांदा सत्तेत परतले आहेत. मोदी आणि त्यांच्या मंत्रिमंडळाने 9 जून रोजी शपथ घेतली.
Click it and Unblock the Notifications
Sign in with Google