Air India Flight Update: एअर इंडियाने 8 फ्लाइट्स रद्द केल्या; पुणे-मुंबईच्या उड्डाणांवर परिणाम

अहमदाबाद येथे नुकत्याच घडलेल्या एअर इंडिया विमान अपघातानंतर, देशातील हवाई वाहतूक क्षेत्रावर त्याचे पडसाद उमटू लागले आहेत. तांत्रिक अडचणी, सुरक्षा तपासण्या आणि हवामानातील अडथळ्यांमुळे काही फ्लाइट्स रद्द करण्यात आल्या आहेत. त्यातच 20 जून रोजी एअर इंडियाने एकूण 8 उड्डाणे रद्द केल्याचे स्पष्ट झाले आहे. यामध्ये 4 आंतरराष्ट्रीय आणि 4 देशांतर्गत फ्लाइट्सचा समावेश आहे, ज्यात पुणे आणि मुंबईमधून उड्डाण करणाऱ्या फ्लाइट्सही प्रभावित झाल्या आहेत.

कंपनीचं स्पष्टीकरण: देखभाल व ऑपरेशनल कारणांमुळे रद्द

एअर इंडियाने एका अधिकृत निवेदनातून सांगितले की, ही उड्डाणे रद्द करण्यामागे देखभाल व ऑपरेशनल कारणे जबाबदार आहेत. प्रवाशांची गैरसोय टाळण्यासाठी एअरलाइनने पूर्ण परतावा किंवा विनामूल्य रीशेड्युलिंगची सुविधा देण्याचं आश्वासन दिलं आहे.

"प्रवाशांच्या प्रवासात खंड येऊ नये म्हणून आमचे सहकारी पर्यायी व्यवस्था करण्यात गुंतलेले आहेत," असं निवेदनात नमूद करण्यात आलं आहे.

रद्द केलेल्या फ्लाइट्स यादी:

दुबई ते चेन्नई - AI906

दिल्ली ते मेलबर्न - AI308

मेलबर्न ते दिल्ली - AI309

दुबई ते हैदराबाद - AI2204

पुणे ते दिल्ली - AI874

हैदराबाद ते मुंबई - AI2872

चेन्नई ते मुंबई - AI571

अहमदाबाद ते दिल्ली - AI456

प्रवाशांसाठी महत्त्वाच्या सूचना

एअर इंडियाने प्रवाशांना सूचित केलं आहे की त्यांनी त्यांच्या फ्लाइटची स्थिती कंपनीच्या अधिकृत वेबसाइटवर (airindia.com) तपासावी किंवा कस्टमर केअर नंबरवर संपर्क साधावा.

निवेदनात पुढे नमूद आहे की, हवाई मार्गांवरील निर्बंध, हवामान बदल आणि विमाने तपासणीमुळे अडथळे येण्याची शक्यता आहे. यासंदर्भात अपडेट्स वेळोवेळी प्रवाशांना दिल्या जातील.

21 जून ते 15 जुलैदरम्यान आंतरराष्ट्रीय सेवा मर्यादित

गुरुवारी एअर इंडियाने स्पष्ट केले की, 21 जून ते 15 जुलै 2025 या कालावधीत आंतरराष्ट्रीय फ्लाइट्सच्या संख्येत आठवड्याला कपात केली जाणार आहे. त्यासोबतच, तीन मार्गांवरील सेवा तात्पुरत्या स्थगित करण्यात आल्या आहेत.

अहमदाबाद दुर्घटनेचा परिणाम

एअर इंडियाच्या अहमदाबाद-लंडन गॅटविक मार्गावरील ड्रीमलाइनर विमानाच्या अपघातानंतर कंपनीवर तांत्रिक आणि नियामक दबाव वाढला आहे. या दुर्घटनेत 271 जणांचा मृत्यू झाला होता, ज्यामध्ये जमिनीवरील किमान 30 नागरिकांचा समावेश होता.

या घटनेनंतर DGCA ने Boeing 787 विमानांच्या संपूर्ण फ्लीटची सखोल तपासणी करण्याचे आदेश दिले आहेत. त्यामुळे कंपनीवर ऑपरेशनलदृष्ट्या मोठा भार निर्माण झाला आहे.

प्रवाशांनी आपल्या प्रवासाच्या आधी फ्लाइट अपडेट्स नक्की तपासावेत. एअर इंडिया सध्या व्यवस्थापनाच्या दृष्टीने काही कठीण टप्प्यातून जात असून, प्रवाशांच्या सुरक्षिततेसाठीच ही पावलं उचलली जात असल्याचं सांगण्यात आलं आहे.