अदानी समूहातर्फे मध्य प्रदेशातील गुणा येथे १,०६० कोटी रुपयांच्या सिमेंट ग्राइंडिंग युनिटचे काम सुरू

अदानी समूहाने शनिवारी मध्य प्रदेशातील गुणा येथे त्यांच्या नवीन सिमेंट ग्राइंडिंग युनिटचे भूमिपूजन केल्याची घोषणा केली, जे राज्यातील आणखी एका मोठ्या औद्योगिक गुंतवणुकीचे प्रतीक आहे. अदानी सिमेंटद्वारे विकसित केल्या जाणाऱ्या या प्रकल्पात १,०६० कोटी रुपयांहून अधिक गुंतवणूक केली जाणार असून, याद्वारे सुमारे १,५०० प्रत्यक्ष आणि अप्रत्यक्ष रोजगार निर्माण होण्याची अपेक्षा आहे.

भूमीपूजन समारंभात बोलताना प्रणव अदानी म्हणाले की, हा प्रकल्प मध्य प्रदेशातील औद्योगिक विकास आणि रोजगार निर्मितीला गती देण्याच्या दिशेने एक महत्त्वपूर्ण पाऊल आहे. मुख्यमंत्री डॉ. मोहन यादव यांच्या नेतृत्वाखाली आणि 'पीएम गती-शक्ती' व्हिजनअंतर्गत पायाभूत सुविधा, लॉजिस्टिक आणि औद्योगिक सुविधांमध्ये झालेल्या सुधारणांमुळे मध्य प्रदेश हे गुंतवणुकीचे एक भक्कम केंद्र म्हणून उदयास आले असल्याचे त्यांनी नमूद केले. या कार्यक्रमाला केंद्रीय मंत्री ज्योतिरादित्य सिंधिया, मध्य प्रदेशचे मंत्री, वरिष्ठ शासकीय अधिकारी आणि उद्योगांचे प्रतिनिधी उपस्थित होते.

प्रणव अदानी यांनी अधोरेखित केले की, अदानी समूह सध्या ऊर्जा, पायाभूत सुविधा, लॉजिस्टिक आणि हरित तंत्रज्ञान यांसारख्या क्षेत्रांत सक्रिय असून भारताच्या दीर्घकालीन विकासात योगदान देण्यावर त्यांचा भर आहे. भोपाळ येथील ग्लोबल इन्व्हेस्टर्स समिटमध्ये जाहीर केलेल्या मध्य प्रदेशातील १.१ लाख कोटी रुपयांच्या गुंतवणुकीच्या समूहाच्या वचनबद्धतेचा त्यांनी पुनरुच्चार केला. ही गुंतवणूक हायड्रो पंप्ड स्टोरेज, सिमेंट, खाणकाम, स्मार्ट मीटर आणि औष्णिक ऊर्जा यांसारख्या क्षेत्रांमध्ये पसरलेली आहे.

कंपनीच्या म्हणण्यानुसार, या गुंतवणुकीतून २०३० पर्यंत सुमारे १.२ लाख लोकांसाठी रोजगाराच्या संधी निर्माण होण्याची अपेक्षा आहे. गुणा येथील सिमेंट ग्राइंडिंग युनिट दोन टप्प्यांत विकसित केले जाईल आणि त्याची एकूण वार्षिक उत्पादन क्षमता ४० लाख मेट्रिक टन असेल. पहिल्या टप्प्याचे काम २०२८ पर्यंत पूर्ण करण्याचे उद्दिष्ट ठेवण्यात आले आहे. हा प्रकल्प राबवताना वेग, गुणवत्ता आणि पर्यावरणीय शाश्वतता राखण्यावर भर दिला जाईल, असे कंपनीने म्हटले आहे.

प्रणव अदानी यांनी असेही सांगितले की, हा प्रकल्प कालांतराने राज्य तिजोरीत ६,००० कोटी रुपयांहून अधिक योगदान देईल आणि आसपासच्या प्रदेशातील वाहतूक, पुरवठा साखळी, लघु उद्योग आणि सेवा उद्योगांच्या माध्यमातून स्थानिक आर्थिक क्रियाकलापांना चालना देईल.

कटनी जिल्ह्यातील अमेथा आणि कायमोर येथील प्रकल्पांच्या माध्यमातून अदानी समूहाची मध्य प्रदेशात आधीच लक्षणीय उपस्थिती आहे. अदानी पॉवर सध्या राज्याला १,२०० मेगावॅट वीज पुरवठा करत आहे, तर अतिरिक्त ५,६०० मेगावॅट वीज निर्मिती क्षमतेची तयारी सुरू आहे. कंपनीने लाहोरी, धार, रतलाम आणि उज्जैन येथे पवन ऊर्जा प्रकल्प सुरू केले असून नजीकच्या भविष्यात उज्जैनमध्ये आणखी एक सिमेंट कारखाना उभारण्याची त्यांची योजना आहे.

हा प्रकल्प मध्य प्रदेशच्या आणि तेथील तरुणांच्या भविष्यातील गुंतवणूक असल्याचे सांगून प्रणव अदानी म्हणाले की, अदानी समूह राज्याच्या औद्योगिक आणि आर्थिक विकासाच्या प्रवासात भागीदारी करत राहील.