मोबाईल वापरताना काय काळजी घ्यावी, वेळीच सावध व्हा नाहीतर तुमचा जीव गेलाच समजा, वाचा सविस्तर

How to use mobile phone properly : खिशात ठेवलेल्या मोबाईलचा अचानक स्फोट झाल्यानं त्यात गंभीर जखमी होऊन शिक्षकाचा मृत्यू झाला. तर त्याच्यासोबत असलेला नातेवाईक गंभीर जखमी झाल्याची घटना गोंदिया जिल्ह्यातील अर्जुनी मोरगाव तालुक्यातील सिरेगाव बांध या ठिकाणी शुक्रवारी दि.६ डिसेंबरला घडली. यासह अनेक घटना वारंवार मोबाईलच्या स्फोटामुळे होत असल्याचे उघडकीस आलेले आहे. तरी देखील आपण मोबाईल वापरताना योग्य ती काळजी घेत नाही, त्यामुळे तुम्ही वेळीच सावध व्हा, अन्यथा तुमचाही जीव गेलाच म्हणून समजा, असे म्हटले तरी वावगं ठरणार नाही.

गोंदिया जिल्ह्यात नेमकं काय घडलं?

खिशात ठेवलेल्या मोबाईलचा अचानक स्फोट झाल्यानं त्यात गंभीर जखमी होऊन शिक्षकाचा मृत्यू झाला. तर त्याच्यासोबत असलेला नातेवाईक गंभीर जखमी झाला. ही घटना गोंदिया जिल्ह्यात घडली. या घटनेत सुरेश संग्रामे (वय 55) असं मृतक शिक्षकाचं नाव आहे. तर नत्थु गायकवाड (56) असं गंभीर जखमी असलेल्या इसमाचं नाव आहे. मोबाईल स्फोटाच्या घटना वारंवार घडताना दिसून येत आहे. चला तर जाणून घेऊया, मोबाईल वापरताना काय काळजी घ्यावी, ज्यामुळे आपला जीव धोक्यात जाणार नाही.

या बाबींचे ठेवा विशेष ध्यान..!

• स्मार्टफोन कपडे, कापूस किंवा बेड अशा ज्वलनशील पदार्थांपासून दूर ठेवा.'
• फोनची बॅटरी रिप्लेस करायची असेल तर ओरीजनल ब्रँडची बॅटरीच लावा. कधीही स्वस्त आणि कमी दर्जाची बॅटरी आपल्या फोनसाठी वापरू नका.
• उशीखाली फोन ठेवून झोपणे अत्यंत धोकादायक आहे. कारण यामुळे फोनचे तापमान वाढते आणि त्यावर दाबही पडतो.
• जर फोन सतत वापरून गरम झाला असेल, तर त्याला नॉर्मल होऊ द्या. फोन गरम झाल्यानंतर सतत त्याचा वापर करू नका.
• फोन खराब झाल्यास लोकल शॉपवर दुरुस्त करू नका. कंपनीच्या सर्व्हिस सेंटरमध्येच फोन दुरुस्त करणे सुरक्षित असते. तिथे ओरिजनल पार्ट्स देखील मिळतात.

चार्जिंगसाठी या टिप्स करा फॉलो

- फोन चार्ज करत असताना त्यावर कोणतीही वस्तू ठेवलेली नाही किंवा त्यावर कशाचाही दाब पडत नाही ना याची खात्री करा.

- नेहमी फोनचा ओरिजनल चार्जर वापरा. ड्युप्लिकेट किंवा इतरांच्या फोनचा चार्जर वापरल्यास फोन आणि बॅटरीचे नुकसान होऊ शकतं.

- फोन चार्ज करताना त्यावर ऊन पडत नाही ना याची काळजी घ्या. यामुळे फोनचे नुकसान होऊ शकते.

- रात्रभर फोन चार्जिंगला लावून ठेवू नका. फोन आणि बॅटरीसाठी हानिकारक असतं. - फोन पॉवर सॉकेटद्वारे चार्ज करा. एक्स्टेंशनद्वारे चार्ज करणे टाळा.

ओडिशामघ्ये देखील झाला होता मोबाईलचा स्फोट

ओडिशामध्ये स्मार्टफोनच्या स्फोटात एका तरुणाचा मृत्यू झाल्याची घटना समोर आली आहे. मिळालेल्या माहितीनुसार, ओडिशातील पारादीपमध्ये ही घटना घडली. स्मार्टफोन चार्जिंगला लावून तरुण झोपला होता. बिछान्यावरच चार्जिंगला लावलेल्या फोनचा स्फोट झाला. या स्फोटात त्याचा मृत्यू झाला.