फटाक्यांमधून निघणारा धूर आणि ठिणग्यांमुळे डोळे गमावण्याची वेळ येऊ शकते! सुरक्षेचे 'हे' करा उपाय

Diwali 2024 Firecrackers Burst in Kerala How to Protect Eyes : दिवाळी सणाला आनंदच आनंद..सण साजरा करण्यासाठी प्रत्येकजण सज्ज आणि आतूर असतात. फटाके आणि दिवाळी हे तर समीकरणच आहे. पण फटाके फोडतानाच केरळच्या एका मंदिरात भीषण स्फोट आणि आग लागली.

अशा घटना घडू नये आणि फटाक्यामुळे डोळ्यांना इजा होणार नाही, याची कशी आपण काय काळजी घेतली पाहीजे याची जाणीव सर्वांना असायला हवी. कारण फटाके पेटवताना थोडीशी निष्काळजीपणा आपल्या आरोग्यासाठी, विशेषतः डोळ्यांसाठी हानिकारक ठरू शकतो.

डोळ्यांना जळजळ आणि संसर्ग

फटाक्यांचा धूर आणि ठिणग्यांमुळे डोळ्यांना जळजळ, खाज सुटणे आणि संसर्ग होऊ शकतो. त्यामुळे या दिवाळीत सुरक्षितपणे फटाके वापरताना डोळ्यांचे रक्षण करण्यासाठी या गोष्टींची विशेष काळजी घ्यावी.

काय सांगतात नेत्रतज्ज्ञ

नेत्रतज्ज्ञांच्या मते, फटाक्यांमधून निघणारा तेजस्वी प्रकाश आणि धुरामुळे डोळ्यांना गंभीर नुकसान होऊ शकते. या धुरामुळे आणि रसायनांमुळे डोळ्यांची जळजळ, लालसरपणा, सूज आणि दृष्टीच्या समस्या देखील होऊ शकतात. फटाक्यांमधून निघणाऱ्या रसायनांपासून आणि प्रदूषणापासून तुमच्या डोळ्यांचे रक्षण करण्यासाठी आम्ही काही टिप्स घेऊन आलो आहोत.ज्या फटाक्यांच्या प्रदूषण आणि रसायनांपासून तुमच्या डोळ्यांचे रक्षण करू शकतात.

संरक्षणात्मक चष्मा घाला

फटाके फोडताना संरक्षक चष्मा घालणे सर्वात महत्त्वाचे आहे. हे चष्मे धूर, ठिणग्या आणि हानिकारक रसायनांपासून डोळ्यांचे संरक्षण करतात, त्यामुळे कोणत्याही प्रकारच्या दुखापतीपासून संरक्षण मिळते.

मुलांना दूर ठेवा

लहान मुलांना फटाक्यांपासून दूर ठेवा आणि त्यांना स्वतः फटाके पेटवू देऊ नका. ते फटाक्यांच्या जवळ असल्यास त्यांचे निरीक्षण करा आणि त्यांनी डोळ्यांचे संरक्षण धारण केल्याची खात्री करा.

फुलझाड लावताना दक्षता घ्या

सामान्यत: दिवाळीमध्ये फुलझाड, भुईचक्कर हे फारसे हाणीकारक फटाके नाही पण ते वर उडून डोळ्यात जाऊ शकतात. स्पार्कलरच्या ठिणग्या डोळ्यांत शिरून कॉर्नियाला इजा होऊ शकते, जर ठिणग्या चुकून डोळ्यांत गेल्यास ते डोळ्यांच्या दृष्टीसाठी धोकादायक ठरू शकते.

फटाके पेटवल्यानंतर लगेच दूर जा

खाली असलेल्या फटाक्याला वाकून पाहू नका, कारण यामुळे धूर किंवा ठिणग्या थेट डोळ्यांत जाऊ शकतात, जे अत्यंत धोकादायक असू शकतात.

अंतरावरून फटाके फोडा

फटाके फोडताना किमान चार फूट अंतर ठेवा. त्यामुळे फटाक्यांचा धूर किंवा ठिणग्या डोळ्यांत जाण्याचा धोका कमी होतो.

हे करा उपाय

• फटाक्यांच्या धुरामुळे किंवा ठिणग्यांमुळे डोळ्यात जळजळ होत असेल तर लगेच धुवा.
• थंड पाण्याने डोळे धुवा, यामुळे डोळ्यांना आराम मिळेल आणि धुराचे हानिकारक कण निघून जातील.
• आयड्राॅप वापरा, जर डोळ्यांमध्ये कोरडेपणा किंवा थोडासा जळजळ होत असेल तर तुम्ही डॉक्टरांनी सुचवलेले आय ड्रॉप्स वापरू शकता. यामुळे डोळ्यांना आराम आणि आर्द्रता मिळेल.

हे तर महत्वाचेच..

फटाके पेटवताना नेहमी एक बादली पाणी आणि प्राथमिक उपचार किट जवळ ठेवा. यामुळे कोणतीही अनुचित घटना घडल्यास त्वरित मदत मिळेल.

डॉक्टरांशी संपर्क साधा: कोणत्याही कारणास्तव तुम्हाला जळजळ, वेदना किंवा डोळ्यांना कोणतीही दुखापत जाणवत असल्यास, ताबडतोब डॉक्टरांशी संपर्क साधा आणि त्यांचा सल्ला घ्या. डॉक्टरांच्या सल्ल्याशिवाय कोणतेही औषध घेऊ नका. या सुरक्षा उपायांचा अवलंब करून, तुम्ही केवळ तुमच्या डोळ्यांची सुरक्षा सुनिश्चित करू शकत नाही तर तुम्ही आणि तुमच्या कुटुंबासोबत सुरक्षित आणि आनंदी दिवाळीचा आनंद घेऊ शकता.