बॉलिवूडला पुन्हा एक धक्का, 'या' प्रसिद्ध अभिनेत्री आणि पार्श्वगायिकेचं निधन! आज अंत्यसंस्कार

Actress & Singer Sulakshana Pandit Passes Away : हिंदी चित्रपटसृष्टीतील ७० च्या दशकातील प्रसिद्ध अभिनेत्री आणि पार्श्वगायिका सुलक्षणा पंडित यांचे गुरुवारी, ७१ व्या वर्षी निधन झाले. त्यांच्या निधनाने बॉलिवूडमध्ये शोककळा पसरली आहे. त्यांच्या कुटुंबीयांनी दिलेल्या माहितीनुसार, मुंबईतील नानावटी रुग्णालयात रात्री ८ वाजण्याच्या सुमारास हृदयविकाराच्या झटक्याने त्यांचे निधन झाले. त्यांचा पार्थिवावर आज, शुक्रवारी (७ नोव्हेंबर) दुपारी अंत्यसंस्कार करण्यात येणार आहेत.

प्रदीर्घ आजारपणानंतर घेतला अखेरचा श्वास

सुलक्षणा पंडित यांचे भाऊ आणि संगीतकार ललित पंडित यांनी या दुःखद बातमीला दुजोरा दिला आहे. ललित पंडित यांनी सांगितले की, सुलक्षणा पंडित बऱ्याच काळापासून आजारी होत्या. त्यांच्या निधनाने चाहते आणि चित्रपटसृष्टीतील त्यांच्या सहकाऱ्यांनी तीव्र दुःख व्यक्त केले आहे. सर्वांनी त्यांना त्यांच्या काळातील सर्वात शालीन आणि प्रतिभावान कलाकारांपैकी एक म्हणून आदराने स्मरण केले आहे.

पंडीत यांचे अजरामर गाणे अन् कारकिर्द

सुलक्षणा पंडित यांनी अभिनेत्री आणि गायिका म्हणून आपली ओळख निर्माण केली होती. त्यांनी अनेक चित्रपटांमध्ये आपल्या अभिनयाची छाप पाडली, तसेच पार्श्वगायिका म्हणून अनेक अविस्मरणीय गाणी गायली. "चलते चलते", "संकल्प", "अपनापन" यांसारख्या चित्रपटांतील त्यांची गाणी आजही लोकप्रिय आहेत. त्यांच्या जाण्याने भारतीय चित्रपटसृष्टीने एक हरहुन्नरी कलाकार गमावला आहे.

सुलक्षणा पंडित: हिंदी चित्रपट अभिनेत्री आणि पार्श्वगायिका

सुलक्षणा पंडित या हिंदी चित्रपटसृष्टीतील एक प्रसिद्ध अभिनेत्री आणि गायिका आहेत, ज्यांनी संगीत आणि अभिनय या दोन्ही क्षेत्रांत आपला ठसा उमटवला.

वैयक्तिक जीवन आणि संगीत वारसा

सुलक्षणा यांचा जन्म हरियाणा राज्यातील हिसार (आताचे फतेहाबाद) जिल्ह्यातील पीलीमंदोरी गावात एकासंगीत घराण्यात झाला. वडील प्रताप नारायण पंडित (कुशल शास्त्रीय गायक) तर काका प्रसिद्ध शास्त्रीय गायक पंडित जसराज आणि जनसंघ नेते वसंत कुमार पंडित (राजगडचे माजी खासदार) हे होते.

• सुलक्षणा पंडित यांना तीन भाऊ (मनधीर, जतिन आणि ललित पंडित) आणि तीन बहिणी ( माया अँडरसन, स्वर्गीय संध्या सिंह आणि विजयता पंडित) आहेत.
• सुलक्षणा पंडीत यांचे भाचे यश पंडित (टीव्ही अभिनेता), भाची श्रद्धा पंडित आणि श्वेता पंडित (पार्श्वगायिका) आहेत. त्यांची चुलत बहीण हेमलता यासुद्धा पार्श्वगायिका आहेत.
• संगीत प्रवास
• सुलक्षणा यांनी वयाच्या अवघ्या नऊव्या वर्षापासून गायला सुरुवात केली.
• त्यांचे मोठे भाऊ मंधीर पंडित (जे पूर्वी संगीतकार जोडी 'मंधीर-जतिन' मध्ये होते) हे मुंबईत त्यांचे नेहमीचे साथीदार होते.
• किशोर कुमार आणि मोहम्मद रफी यांसारख्या दिग्गजांसोबत अनेक लाइव्ह कॉन्सर्ट करून त्या एक प्रमुख पार्श्वगायिका बनल्या.

वैयक्तिक संघर्ष आणि आरोग्य

• अभिनेता संजीव कुमार यांनी त्यांचा लग्नाचा प्रस्ताव नाकारल्यानंतर सुलक्षणा यांनी आयुष्यभर अविवाहित राहण्याचा निर्णय घेतला. त्यांना काम मिळणे थांबल्यानंतर त्यांना आर्थिक अडचणींचा सामना करावा लागला.
• बाथरुममध्ये पडून त्यांची खुब्याचे हाड तुटले. यानंतर त्यांना चार शस्त्रक्रिया कराव्या लागल्या, ज्यामुळे त्या सार्वजनिक जीवनात फार कमी दिसतात आणि त्या काही प्रमाणात विकलांग झाल्या आहेत.
• जुलै २०१७ मध्ये त्यांनी आरजे विजय अकेला यांना एक सविस्तर रेडिओ मुलाखत दिली, ज्यात त्यांनी त्यांच्या अभिनय आणि गायन कारकिर्दीबद्दल चर्चा केली. ही त्यांची अखेरची मुलाखत ठरली होती.