तमिळ अभिनेते राजेश यांचे निधन; 75 वर्षांचे सुवर्णयुग संपलं; जाणून घ्या राजेश यांच्याविषयी

तमिळ चित्रपटसृष्टीतील ज्येष्ठ आणि बहुआयामी अभिनेते राजेश यांचे आज, २९ मे रोजी पहाटे निधन झाले. वयाच्या ७५व्या वर्षी त्यांनी अखेरचा श्वास घेतला. रिपोर्ट्सनुसार, त्यांना घरातच अचानक श्वासोच्छ्वासास त्रास होऊ लागला. कुटुंबीयांनी त्यांना तत्काळ रामचंद्र रुग्णालयात दाखल करण्याचा प्रयत्न केला, पण वाटेतच त्यांनी प्राण सोडले.

या दुःखद घटनेनंतर तमिळ फिल्म इंडस्ट्रीमध्ये शोककळा पसरली असून अनेक दिग्गज कलाकारांनी आपल्या भावना व्यक्त केल्या आहेत.

राजेश यांना रजनीकांत, कमल हासन यांची भावपूर्ण श्रद्धांजली

सुपरस्टार रजनीकांत यांनी 'X' वर एक भावनिक पोस्ट करत लिहिलं -

"माझा जिवलग मित्र, अभिनेता राजेश याच्या निधनाची बातमी ऐकून मी सुन्न झालो आहे. माझ्या हृदयाला खोलवर वेदना झाल्या आहेत. एक सुंदर व्यक्तिमत्त्व... त्यांच्या आत्म्याला शांती लाभो. त्यांच्या कुटुंबीयांना आणि मित्रमंडळींना माझी शोकसंवेदना."

कमल हासन यांनीही शोक व्यक्त करत म्हटलं -

"सर्वाधिक मागणी असलेल्या कलाकारांमध्ये, माझा प्रिय मित्र राजेश हा असा होता जो सर्वाधिक वाचत असे आणि त्याचं चिंतन करत असे. शेवटच्या श्वासापर्यंत तो उत्साही आणि क्रियाशील राहिला. त्याचं हे अचानक जाणं अत्यंत दु:खद आहे. त्याच्या कुटुंबाला माझ्या संवेदना."

अभिनेत्री कस्तुरी यांनी X वर लिहिलं -

"काय अभिनेते! काय विचारवंत! काय माणूस!
माझ्याशी अँडिपट्टी आणि अॅडम स्मिथच्या नात्याबद्दल चर्चा कोण करेल आता?
Miss you, miss you, my teacher Rajesh sir!"

एक सुवर्णयुगाची सांगता

राजेश यांचा जन्म २० डिसेंबर १९४९ रोजी मन्नारगुडी, तामिळनाडू येथे झाला. त्यांनी १९७४ मध्ये 'अवल ओरु थोडरकथै' या चित्रपटातून पदार्पण केलं. 'कन्नी परुवथिले' (१९७९) मध्ये त्यांना प्रमुख भूमिका मिळाली आणि त्यांच्या अभिनय प्रवासाला नवी दिशा मिळाली.

'अंधा 7 नाटकल,' 'सत्या,' 'महनादी,' 'विरुमंडी,' 'रामाना,' 'ऑटोग्राफ,' 'मास्टर' यांसारख्या गाजलेल्या चित्रपटांमधील भूमिका आजही प्रेक्षकांच्या स्मरणात आहेत. त्यांच्या अभिनयातली सहजता, गहराई आणि संवेदनशीलता ही त्यांची खरी ओळख ठरली.

व्यक्तिगत आयुष्य आणि अन्य रुची

१९८३ मध्ये राजेश यांचा विवाह जोन सिल्व्हिया यांच्याशी झाला होता. त्यांच्या दोन मुलांचा - दिव्या आणि दीपक - असा परिवार आहे. २०१२ मध्ये त्यांच्या पत्नीचे निधन झाले.

राजेश हे चित्रपटांव्यतिरिक्त रिअल इस्टेट व्यवसायात सक्रिय होते. अलीकडच्या काळात त्यांनी ज्योतिषशास्त्रात विशेष रस घेत अनेक पुस्तके लिहिली आणि युट्यूब चॅनेलद्वारे या विषयावर आपली मतं मांडली. ते केवळ अभिनेतेच नव्हते, तर एक अभ्यासू व्यक्तिमत्त्वही होते.

शब्दात न मावणारी हानी

राजेश यांच्या जाण्याने तमिळ चित्रपटसृष्टीने एक ज्येष्ठ, गुणवान आणि बुद्धिमान कलावंत गमावला आहे. त्यांचा वारसा, भूमिका आणि विचार अनेक पिढ्यांना प्रेरणा देतील. त्यांच्या आत्म्यास शांती लाभो. राजेश यांचे स्मरण हे तमिळ चित्रपटसृष्टीसाठी सदैव प्रेरणादायक राहील.