sushant singh rajput : सुशांत सिंह राजपूतचा मृत्यू नेमका कसा झाला, CBI रिपोर्टमधील 10 मोठे खुलासे

Sushant singh rajput death Closer Repot : बॉलिवूड अभिनेता सुशांत सिंग राजपूत 14 जून 2020 रोजी मुंबईतील त्याच्या वांद्रे येथील अपार्टमेंटमध्ये मृतावस्थेत आढळला. त्यानंतर त्याची आत्महत्या की हत्या आहे, यावरुन चर्चा रंगली. सुशांतच्या नातेवाईकांनी त्याच्या मित्रपरिवावर दोष देऊन कोर्टात धाव घेतली. दरम्यान, सुमारे साडे चार वर्षांच्या तपासानंतर अखेर सीबीआयने क्लोजर रिपोर्ट सादर केला आहे. यात अनेक मोठे खुलासे केले आहेत.

साडेचार वर्षांच्या तपासानंतर, सीबीआयने आता या प्रकरणाचा क्लोजर रिपोर्ट मुंबई न्यायालयात सादर केला आहे. तपासादरम्यान, सुशांतच्या सोशल मीडिया चॅट्स एमएलएटी द्वारे अमेरिकेला चौकशीसाठी पाठवण्यात आल्या. या चौकशीत असे आढळून आले की त्याच्या चॅटमध्ये कोणतीही छेडछाड झाली नाही.

सीबीआयच्या अहवालात सुशांतने आत्महत्याच केल्याचा दावा

सीबीआयच्या अहवालात सुशांत सिंह राजपूतच्या मृत्यूचे स्पष्टपणे आत्महत्या असे वर्णन करण्यात आले आहे. या प्रकरणाशी संबंधित अनेक महत्त्वाच्या गोष्टी क्लोजर रिपोर्टमध्ये नमूद करण्यात आल्या आहेत. क्लोजर रिपोर्टमधील दहा पॉईंट्स खालील प्रमाणे आहेत, चला तर जाणून घेऊया नेमकं काय झालं होतं ते...!

1. तपासादरम्यान, सीबीआयला असे कोणतेही पुरावे सापडले नाहीत की ज्यामुळे सुशांतला आत्महत्या करण्यास भाग पाडले गेले हे सिद्ध होईल.
2. अभिनेत्याला आत्महत्या करण्यास प्रवृत्त केल्याच्या दाव्यांना सीबीआयने स्पष्टपणे फेटाळून लावले आहे.
3. सुशांत सिंग राजपूत मृत्यू प्रकरणात, एम्सच्या फॉरेन्सिक टीमने अभिनेत्याचा गळा दाबून हत्या आणि विषबाधा झाल्याची शक्यता देखील फेटाळून लावली आहे.
4. सीबीआयच्या क्लोजर रिपोर्टमध्ये सुशांतच्या मृत्यूचे खरे कारण आत्महत्या असल्याचे सांगण्यात आले आहे.
5. सुशांतच्या आत्महत्येचा आणि कट रचल्याच्या आरोपांचा तपास सीबीआयने एम्सच्या तज्ज्ञांच्या मदतीने केला होता. एम्सच्या फॉरेन्सिक टीमने कोणताही कट रचल्याचा इन्कार केला होता.
6. सुशांतच्या सोशल मीडिया चॅट्स एमएलएटी द्वारे अमेरिकेला पाठवण्यात आल्या होत्या जेणेकरून त्याची चौकशी करता येईल. या चौकशी अहवालात, अभिनेत्याच्या चॅटमध्ये कोणत्याही प्रकारची छेडछाड झाली नसल्याचे स्पष्टपणे नमूद केले आहे.
7. सीबीआयने क्लोजर रिपोर्ट सादर केल्यानंतरही, जर सुशांतच्या कुटुंबाला खटला सुरू ठेवायचा असेल तर ते मुंबई न्यायालयात व्ही प्रोटेस्ट याचिका दाखल करू शकतात.
8. सुशांत सिंग राजपूतच्या कुटुंबीयांनी दिवंगत अभिनेत्याची प्रेयसी आणि अभिनेत्री रिया चक्रवर्तीवर त्याला आत्महत्येसाठी प्रवृत्त केल्याचा आरोप केला होता. मात्र, आता सीबीआयने या प्रकरणात रिया आणि तिच्या कुटुंबाला क्लीन चिट दिली आहे.
9. रिया चक्रवर्तीला क्लीन चिट मिळाल्याबद्दल तिचे वकील सतीश मानेशिंदे म्हणाले, 'मला अभिमान आहे की मी एका सैनिकाच्या कुटुंबाचा बचाव केला. मी रिया चक्रवर्ती आणि तिच्या कुटुंबाला सलाम करतो. रियाला अनंत त्रासांना तोंड द्यावे लागले.
10. वकिलाने असेही म्हटले आहे की, निष्पाप लोकांना त्रास देण्यात आला आणि त्यांना मीडिया आणि तपास अधिकाऱ्यांसमोर फिरवले गेले. त्यांना आशा आहे की हे कोणत्याही परिस्थितीत पुन्हा घडणार नाही.