सुनिधी चौहानच्या बोल्ड परफॉर्मन्सवर नेटकरी संतापले! 'कमली' गाण्यावरील डान्स पाहून युजर्स भयंकर चिडले

Sunidhi Chauhan Video Viral : बॉलिवूडची 'स्टेज क्वीन' म्हणून ओळखली जाणारी गायिका सुनिधी चौहान सध्या एका वेगळ्याच कारणाने वादाच्या भोवऱ्यात अडकली आहे. नुकताच नेहा कक्करच्या 'कँडी शॉप' गाण्यावरून अश्लीलतेचा वाद रंगलेला असतानाच, आता सुनिधी चौहानच्या एका लाईव्ह कॉन्सर्टचा व्हिडिओ सोशल मीडियावर व्हायरल झाला आहे. या व्हिडिओमधील सुनिधीचे कपडे आणि तिची देहबोली पाहून चाहत्यांनी तीव्र नाराजी व्यक्त केली आहे.

'कमली' गाण्यावर काय घडलं?

व्हायरल होत असलेल्या व्हिडिओमध्ये सुनिधी चौहान 'धूम ३' मधील प्रसिद्ध 'कमली कमली' गाण्यावर परफॉर्म करताना दिसत आहे. या शोसाठी सुनिधीने परिधान केलेले अत्यंत तोकडे आणि घट्ट कपडे (Bodycon Outfit) चर्चेचा विषय ठरले आहेत. गाण्याच्या तालावर सुनिधीने केलेल्या काही डान्स स्टेप्स आणि तिची स्टाईल अनेकांना खटकली आहे. सोशल मीडियावर या क्लिप्स व्हायरल होताच युजर्सनी तिच्यावर टीकेची झोड उठवली आहे.

नेटकऱ्यांच्या संतप्त प्रतिक्रिया

सुनिधीच्या या परफॉर्मन्सवर लोक केवळ टीकाच करत नाहीत, तर अश्लील कमेंट्सही करत आहेत. एका युजरने विचारले, "सुनिधीसारख्या दिग्गज गायिकेला अशा प्रकारे अश्लील डान्स करण्याची काय मजबुरी आहे?" तर दुसऱ्या एका युजरने उपरोधिकपणे कमेंट केली की, "गरम कपड्यांसाठीही गरम शरीर लागते." काहींनी तर तिच्या डान्सची तुलना 'एपिलेप्टिक अटॅक'शी (फीट येणे) करत तिची खिल्ली उडवली आहे.

सुनिधी चौहान: पाचव्या वर्षापासून सुरू झालेला प्रवास

टीका होत असली तरी सुनिधी चौहान हे भारतीय संगीत क्षेत्रातील एक दिग्गज नाव आहे. तिची कारकीर्द प्रेरणादायी राहिली आहे. वयाच्या अवघ्या ५ व्या वर्षी सुनिधीने स्टेजवर गाणे सुरू केले होते. १९९६ मध्ये 'मेरी आवाज सुनो' या रिॲलिटी शोने तिला घरोघरी प्रसिद्धी मिळवून दिली. १९९९ मधील 'मस्त' चित्रपटातील 'रुकी रुकी सी जिंदगी' या गाण्याने तिचे नशीब बदलले. सुनिधी केवळ आयटम नंबरच नाही, तर रोमँटिक, सुफी आणि शास्त्रीय गाणीही तितक्याच ताकदीने गाते. आज ती बॉलिवूडमधील सर्वात महागड्या गायकांपैकी एक आहे.

वैयक्तिक आयुष्य आणि पुनरागमन

सुनिधीचे वैयक्तिक आयुष्यही चढ-उतारांचे राहिले आहे. संगीत दिग्दर्शक बॉबी खानसोबतचे तिचे पहिले लग्न फार काळ टिकले नाही. त्यानंतर २०१२ मध्ये तिने तिचा मित्र हितेश सोनिक याच्याशी विवाह केला. आज ती 'तेग सोनिक' या एका मुलाची आई असून आपल्या कौटुंबिक आयुष्यात आनंदी आहे.