आर्यन खानच्या वेब सीरिजमुळे बदनामी; समीर वानखेडेंनी शाहरुख खानवर ठोकला मानहानीचा दावा!

Sameer Wankhede defamation case on Shahrukh Khan : आर्यन खान ड्रग्ज प्रकरणामुळे चर्चेत आलेले तत्कालीन तपास अधिकारी समीर वानखेडे यांनी अभिनेता शाहरुख खान आणि त्यांच्या निर्मिती कंपनीवर २ कोटी रुपयांचा मानहानीचा खटला दाखल केला आहे.

आर्यन खानने दिग्दर्शित केलेल्या "द बॅड्स ऑफ बॉलीवूड" (The Badass of Bollywood) या वेब सीरिजमुळे आपली प्रतिमा मलिन झाल्याचा आरोप वानखेडे यांनी केला आहे.

दिल्ली उच्च न्यायालयात दाखल केलेल्या या खटल्यात समीर वानखेडे यांनी शाहरुख खान आणि त्याची पत्नी गौरी खान यांची कंपनी रेड चिलीज एंटरटेनमेंट, ओटीटी प्लॅटफॉर्म नेटफ्लिक्स आणि इतरांविरुद्ध कायदेशीर कारवाई सुरू केली आहे.

मालिकेतील 'त्या' वादग्रस्त दृश्यामुळे आरोप

समीर वानखेडे यांचा मुख्य आरोप आहे की "द बॅड्स ऑफ बॉलीवूड" या वेब सिरीजमध्ये खोटा आणि बदनामीकारक व्हिडिओ दाखवण्यात आला, ज्यामुळे त्यांची प्रतिमा खराब झाली.

काय आहे वादग्रस्त दृश्य?

मालिकेच्या पहिल्या भागात बॉलिवूड सेलिब्रिटी एका पार्टीत असल्याचे दाखवले आहे. पार्टीच्या बाहेर एक अधिकारी ड्रग्ज वापरणाऱ्याला अटक करताना दाखवला आहे. हे पात्र समीर वानखेडेशी लक्षणीय साम्य दाखवते. मालिकेच्या रिलीजनंतर सोशल मीडियावर या पात्राची वानखेडे यांच्याशी तुलना करण्यात आली.

एजन्सींवर नकारात्मक परिणाम

वानखेडे यांनी आपल्या निवेदनात म्हटले आहे की, या मालिकेत ड्रग्जविरुद्ध काम करणाऱ्या एजन्सीजना नकारात्मक दृष्टिकोनातून दाखवले आहे, ज्यामुळे लोकांचा त्यांच्यावरील विश्वास कमी होतो.

वानखेडे यांची मागणी काय?

या मानहानीच्या खटल्यात समीर वानखेडे यांनी न्यायालयाकडे खालील मागण्या केल्या आहेत शाहरुख खान आणि त्यांच्या कंपनीला मालिकेतील बदनामीकारक आशय रोखण्याचे निर्देश द्यावेत. त्यांना झालेल्या नुकसानीची भरपाई म्हणून २ कोटी रुपये द्यावेत.

संपूर्ण प्रकरणातील सत्यता स्पष्ट करा!

समीर वानखेडे यांनी एक महत्त्वपूर्ण घोषणा करताना सांगितले की, या खटल्यात मिळालेली भरपाईची रक्कम ते टाटा मेमोरियल कॅन्सर हॉस्पिटलला दान करतील, जे कर्करोगाच्या रुग्णांच्या उपचारांसाठी वापरली जाईल.

आर्यन खान ड्रग्ज प्रकरण, वानखेडेंची भूमिका!

२ ऑक्टोबर २०२१ रोजी, तत्कालीन नार्कोटिक्स कंट्रोल ब्युरोचे (NCB) झोनल डायरेक्टर समीर वानखेडे यांच्या पथकाने कॉर्डेला क्रूझ जहाजावर छापा टाकून आर्यन खान आणि त्याच्या मित्रांना ड्रग्ज वापरल्याच्या आरोपाखाली अटक केली होती.

आर्यन खानला अनेक आठवडे आर्थर रोड तुरुंगात राहावे लागले. त्यानंतर, २७ मे २०२२ रोजी, पुरेशा पुराव्याअभावी आर्यन खानसह पाच जणांना क्लीन चिट देण्यात आली.

या छाप्यामुळे समीर वानखेडे हे देखील चौकशीच्या फेऱ्यात आले होते. त्या दरम्यान, शाहरुख खानने समीर वानखेडेकडे मदत मागितल्याच्या काही गप्पा (Chats) देखील सार्वजनिक झाल्या होत्या.

'बॅड्स ऑफ बॉलीवूड' मालिका पुन्हा वादात

आर्यन खानची गुगलवर ट्रेंडिंग असलेली "बॅड्स ऑफ बॉलीवूड" ही मालिका अनेक वादात अडकली आहे.

रणबीर कपूरचे दृश्य

मालिकेच्या सातव्या भागात अभिनेता रणबीर कपूर ई-सिगारेट ओढताना दाखवण्यात आला होता. कोणताही आरोग्य इशारा (Health Disclaimer) न दिल्यामुळे विनय जोशी नावाच्या व्यक्तीने तक्रार दाखल केली.

NHRCची नोटीस

या तक्रारीनंतर राष्ट्रीय मानवाधिकार आयोगाने (NHRC) माहिती आणि प्रसारण मंत्रालयाला नोटीस पाठवली आहे. अशा दृश्यांचा तरुण प्रेक्षकांवर नकारात्मक परिणाम होऊ शकतो, असे आयोगाने म्हटले आहे.

समीर वानखेडे यांनी दाखल केलेला मानहानीचा हा खटला, आर्यन खान ड्रग्ज प्रकरणाशी संबंधित नाट्यमय घडामोडींचा आणखी एक महत्त्वाचा टप्पा ठरला आहे. या प्रकरणावर दिल्ली उच्च न्यायालय काय निर्णय देते, याकडे आता सर्वांचे लक्ष लागले आहे.