रश्मिका मंदाना-विजय देवरकोंडाच्या लग्नाच्या चर्चांना दुजोरा?; रश्मिका म्हणाली-मी अभिनंदन स्वीकारते!

rashmika mandanna and vijay deverakonda wedding rumours : टॉलीवूडमधील सर्वात लोकप्रिय आणि बहुचर्चित जोडीपैकी एक असलेल्या रश्मिका मंदाना आणि विजय देवरकोंडा यांच्या लग्नाच्या अफवांना अखेर अभिनेत्री रश्मिका मंदानानेच दुजोरा दिल्याचे संकेत दिले आहेत.

सोशल मीडियावर गेल्या अनेक दिवसांपासून या दोघांनी गुपचूप लग्न केल्याची किंवा लवकरच विवाह करणार असल्याची चर्चा सुरू होती. आता रश्मिकाने एका कार्यक्रमात दिलेल्या उत्तरामुळे या अफवांना आणखी बळ मिळाले आहे आणि चाहत्यांची उत्सुकता शिगेला पोहोचली आहे.

अभिनंदन स्वीकारले, सस्पेन्स वाढवला!

रश्मिका मंदाना तिच्या आगामी 'थमा' चित्रपटाच्या प्रमोशनसाठी आयोजित केलेल्या एका कार्यक्रमात उपस्थित होती. यावेळी तिला तिच्या साखरपुड्याविषयी अभिनंदन करण्यात आले. यावर रश्मिकाने हसून आणि लाजत दिलेले उत्तर सध्या जोरदार चर्चेत आहे. रश्मिका म्हणाली, "मी तुमचे अभिनंदन स्वीकारते."

तिचा हा हलकाफुलका पण अत्यंत गूढ प्रतिसाद सोशल मीडियावर वाऱ्यासारखा पसरला असून, अनेकांनी हा विजय देवरकोंडासोबतच्या तिच्या नात्याला दिलेला अप्रत्यक्ष दुजोरा मानला आहे.

मुलाखतीतही 'गुगली'!

यापूर्वी एका मुलाखतीदरम्यानही रश्मिकाने सस्पेन्स वाढवला होता. मुलाखतकाराने जेव्हा तिचे अभिनंदन केले, तेव्हा ती सुरुवातीला गोंधळल्यासारखी झाली, पण लगेच हसून लाजली. मुलाखतकाराने तिचे अभिनंदन तिच्या नवीन परफ्यूम लाइनसाठी असल्याचे स्पष्ट केले, तेव्हा रश्मिकाने मोठ्या विनोदी पद्धतीने 'गुगली' टाकली. रश्मिका म्हणाली, "नाही, नाही... खरंतर, खूप काही चाललंय. म्हणून मी तुमचे सर्व अभिनंदन स्वीकारेन." रश्मिकाच्या या उत्तराने विजय देवरकोंडासोबतच्या तिच्या नात्याबद्दलच्या चर्चांना आणि लग्नाच्या अफवांना आणखी बळकटी दिली आहे.

ऑन-स्क्रीन केमिस्ट्री ते ऑफ-स्क्रीन अटकळ

रश्मिका आणि विजय यांनी २०१८ मधील 'गीता गोविंदम' आणि 'डियर कॉम्रेड' यांसारख्या सुपरहिट चित्रपटांमध्ये एकत्र काम केले आहे. पडद्यावरील त्यांची जबरदस्त केमिस्ट्री प्रेक्षकांना खूप आवडली होती आणि तेव्हापासूनच त्यांच्या नात्याबद्दल अटकळ बांधली जात आहे.

अलिकडेच या दोघांनी गुप्तपणे लग्न केल्याची आणि जवळच्या मित्रांच्या उपस्थितीत समारंभ केल्याची बातमी सोशल मीडियावर व्हायरल झाली होती.

गेल्या काही महिन्यांपासून विजय देवरकोंडा अनेकदा अंगठी घालून दिसला आहे, तर रश्मिकानेही एका व्हिडिओमध्ये हिऱ्याची अंगठी घातलेला हात दाखवला होता. या दृश्यांमुळे त्यांच्या साखरपुड्याच्या अटकळींना बळकटी मिळाली आहे.

विजय आणि रश्मिका २०२६ च्या फेब्रुवारीमध्ये लग्न करणार असल्याचेही वृत्त आले होते, मात्र यावर अद्याप कोणतीही अधिकृत घोषणा झालेली नाही.

रश्मिका कामाच्या आघाडीवरही व्यस्त

रश्मिका मंदान्ना सध्या तिच्या कामातही व्यस्त आहे. ती लवकरच आयुष्मान खुराना आणि नवाजुद्दीन सिद्दीकी यांच्यासोबत हॉरर-कॉमेडी चित्रपट 'थमा' मध्ये दिसणार आहे.

हा चित्रपट दिवाळीच्या मुहूर्तावर, 21 ऑक्टोबर 2025 रोजी प्रदर्शित होत आहे. याव्यतिरिक्तही रश्मिका अनेक मोठ्या चित्रपटांवर काम करत आहे.

रश्मिका आणि विजय या दोघांनीही 'होय' असे स्पष्टपणे म्हटलेले नसले तरी, रश्मिकाने 'अभिनंदन स्वीकारते' असे म्हणून त्यांच्या नात्याबद्दल चाहत्यांना एक आनंदी आणि मोठा संकेत दिला आहे, यात शंका नाही!