Pushpa 2' ने ॲडव्हान्स बुकिंगमध्ये रचला इतिहास, जाणून घ्या किती केली कमाई

Pushpa 2 Advance Booking: दाक्षिणात्यातील प्रसिद्ध अभिनेता अल्लू अर्जुनचा आगामी चित्रपट 'पुष्पा 2' उद्या म्हणजेच 5 डिसेंबर 2024 गुरुवार रोजी चित्रपटगृहात प्रदर्शित होणार आहे. अल्लू अर्जुनच्या चाहत्यांमध्ये या चित्रपटाबद्दल प्रचंड उत्सुकता आहे.

या सिनेमाची सर्वत्र प्रचंड क्रेझ सर्वत्र पाहायला मिळत आहे. अशा परिस्थितीत ॲडव्हान्स बुकिंगमध्येच चित्रपटाने धुमाकूळ घातला आहे. ॲडव्हान्स बुकिंगच्या बाबतीत या चित्रपटाने रामचरण आणि ज्युनियर एनटीआरच्या ब्लॉकबस्टर चित्रपट 'आरआरआर'ला मागे टाकल्याचे वृत्त समोर येत आहे.

दक्षिणेतील प्रसिद्ध दिग्दर्शक सुकुमार यांच्या 'पुष्पा 2: द रुल' या चित्रपटाविषयी लोकांमध्ये प्रचंड उत्सुकता आहे. हा चित्रपट बॉक्स ऑफिसवर इतिहास रचू शकतो. मीडिया रिपोर्ट्सनुसार, ॲडव्हान्स बुकिंगमध्येच हा चित्रपट मोठ्या विक्रमाची नोंद करत आहे.

ॲडव्हान्स बुकिंगमध्ये 77.16 कोटीची कमाई

सॅकनिल्कच्या रिपोर्टनुसार 'पुष्पा 2: द रुल'च्या पहिल्याच दिवशी आतापर्यंत 21 लाखांहून अधिक तिकिटे विकली गेली आहेत. यासह, पुष्पा 2 ने सुरुवातीच्या दिवसासाठी ॲडव्हान्स बुकिंगमध्ये आतापर्यंत सुमारे 63 कोटी रुपयांची कमाई केली आहे. ब्लॉक केलेल्या सीट्ससह चित्रपटाची ॲडव्हान्स बुकिंगमधील एकूण कमाई 77.16 कोटी रुपयांवर पोहोचली आहे.

'पुष्पा 2'ने 'आरआरआर' चित्रपटाला टाकले मागे

पुष्पा 2 च्या ॲडव्हान्स बुकिंग कलेक्शनने एस.एस राजामौली यांच्या ब्लॉकबस्टर चित्रपट 'RRR' ला मागे टाकले आहे.'RRR' चित्रपटाने पहिल्या दिवसाच्या ॲडव्हान्स बुकिंगमध्ये 58.73 कोटी रुपयांची कमाई केली होती. ॲडव्हान्स बुकिंगमध्ये BookMyShow ॲपवर 1 दशलक्षाहून अधिक तिकिटे विकणारा हा चित्रपट सर्वात वेगवान चित्रपट ठरला आहे.

चित्रपट विश्लेषकांचे म्हणणे आहे की अल्लू अर्जुनच्या 'पुष्पा 2: द रुल' या चित्रपटाचे बंपर ॲडव्हान्स बुकिंग कलेक्शन पाहता हा चित्रपट त्याच्या ओपनिंग वीकेंडमध्ये 200 कोटींहून अधिक कमाई करू शकतो. मिळालेल्या माहितीनुसार 'पुष्पा 2'हा चित्रपट 5 डिसेंबर 2024 रोजी चित्रपटगृहात रिलीज होत आहे.