IIFA Awards : अलिया, कैतरिनाला मागे टाकून 'या' 17 वर्षिय अभिनेत्रीने जिंकला पुरस्कार; स्टेजवरच रडली

आयफा अवॉर्ड्स- २०२५ मध्ये सर्वोत्कृष्ट अभिनेत्री श्रेणीतील पुरस्कार १७ वर्षांच्या नितांशी गोयलने जिंकला. विशेष म्हणजे तिच्या स्पर्धेत सध्याच्या आघाडीतील अनेक अभिनेत्री होत्या. मात्र या सर्वांवर मात करत नितांशीने समीक्षकांना आश्चर्यचकीत केले.

नितांशीला सर्वोत्कृष्ट अभिनेत्रीचा पुरस्कार

किरण राव यांच्या 'लापता लेडीज' या गाजलेल्या चित्रपटातून नितांशी गोयलने प्रदार्पण केले. या चित्रपटात नितांशीने फूल कुमारीची भूमिका साकारली आहे. हा पुरस्कार स्वीकारताना नितांशीचे डोळे भरुन आले. बोमन इराणी आणि बॉबी देओल यांच्या हस्ते पुरस्कार स्विकारताना तिच्या डोळ्यात आनंदाश्रू तराळले. रुबी-लाल रंगाच्या गाऊनमध्ये नितांशीने हा पुरस्कार स्विकारला. पुरस्कारानंतरच्या तिच्या स्वागत भाषणाने प्रेक्षकांना भावूक केले. भावनेने भरलेल्या नितांशीने जवळजवळ अश्रू दाबले आणि चित्रपटाच्या टीमचे आणि तिच्या कुटुंबाचे आभार मानले.

दिग्गजांना टाकले मागे

नितांशीने आलिया भट्ट (जिग्रा), कतरिना कैफ (मेरी ख्रिसमस), यामी गौतम (आर्टिकल ३७०) आणि श्रद्धा कपूर (स्त्री २) यांना मागे टाकत तिचा पहिला अभिनय पुरस्कार जिंकला. या पुरस्काराबद्दल एएनआयशी बोलताना ती म्हणाली, "मला हे अपेक्षित नव्हते," ती पुढे म्हणाली, "मला आशा होती की लापता लेडीज मोठा पुरस्कार जिंकेल, परंतु मला वाटले नव्हते की मी स्वतः जिंकेन. इतर नामांकने उत्कृष्ट होती. ज्यांची नावे होती, त्या सर्व अभिनेत्रींची मी स्वतः चाहती आहे. मला मिळालेल्या प्रेमाने मी खरोखरच भारावून गेले आहे, असेही तिने स्पष्ट केले.

भाषणादरम्यान आले अश्रू

भाषणादरम्यान तिला तिचे अश्रू आवरता आले नाहीत. याबद्दल पत्रकारांनी तिला विचारल्यावर ती म्हणाली, "मी इतकी भावनाविवश झाले होते की, मला अश्रू आवरता आले नाहीत. खरे सांगायचे तर, हा पुरस्कार जिंकणे हे प्रत्येक अभिनेत्याचे स्वप्न असते आणि ते अखेर माझ्यासाठी खरे ठरले आहे. त्यामुळे मला अश्रू आवरता आले नाहीत. मी खूप आभारी आहे." ती पुढे म्हणाली की, "मी पहिली गोष्ट केली ती म्हणजे रडणे आणि भाषण करण्याचा प्रयत्न करणे. कारण मला विश्वासच बसत नव्हता की हे घडत आहे. मग मी माझ्या आईला एक मोठी मिठी मारली आणि किरण मॅडमला एक मोठी मिठी मारली. ते सर्व फक्त आनंदाचे अश्रू होते."

लापता लेडीजमध्ये काय आहे

किरण राव दिग्दर्शित लापता लेडीज हा चित्रपट २०२३ साली प्रदर्शित झाला. आंतरराष्ट्रीय स्तरावर लॉस्ट लेडीज या नावाने तो प्रदर्शित झाला. हा चित्रपट दोन नवविवाहित वधूंची कथा सांगतो. ज्या त्यांच्या पतीच्या घरी जाताना ट्रेन प्रवासादरम्यान चुकून एकमेकांच्या घरी जातात. या चित्रपटात प्रतिभा रांता, स्पर्श श्रीवास्तव आणि रवी किशन यांच्याही भूमिका आहेत. त्याच्या आकर्षक कथेसाठी आणि अभिनयासाठी त्यांनी कौतुकाचा वर्षाव केला.